Xov xwm luv tshaj tawm hnub zwj Feej (Wednesday news 01.10.2025)
Nyiaj zoj yuav tsev 5 feem pua
Txij hnub tim 1 lub 10 hli ntuj xyoo 2025 no mus ces tej neeg Australia yuav tsev thawj zaug nyob muaj cai siv tau nyiaj 5 feem pua ntawm tus nqe tsev zoj yuav tsev nyob, uas yog cov program pab yuav tsev uas tsis tau them mortgage insurance. Thawj pwm tsav Anthony Albanese hais tias tej zaum tsuas ua rau tej nqe vaj tse kim me ntsis xwb, tab sis pab nom Greens hais tias yuav ua rau muaj teeb meem rau tej nqe tsev. Claire O'Neil uas yog tus nom tswj dej num vaj tse thiaj hais tias yog ib co tswv yim coj los daws tej teeb meem tsis muaj vaj tse txaus nyob thiab tsis muaj tej vaj tse nqe pheej yig ntiav tau nyob uas nom tswv tsis kub siab los ntev.
Suav thiab BHP cov lagluam muag hlau
Jim Chalmers uas yog tus nom tswj nyiaj txiaj rau tsoom fwv Albanese tau nrog lub tuam txhab BHP tham txog tej hlau xa muag rau Suav vim Bloomberg tau tshaj tawm tias Suav tau ncua tsis yuav tej hlau ntawm tej nkoj thauj hlau rau lub caij tseem sib khom nqe.
Av qeeg ntawm Philippines
Tau muaj av qeeg muaj ceem txog 6.9 magnitude ze ntawm Philippines lub nroog Bogo lub pov txwv Cebu tau ua rau muaj tej neeg tas sim neej tam sim no 60 leej thiab raug mob yuav laug txog 150 leej thaib muaj 22 lub tsev puas los yog raug puas tsuaj.
Txwm tsis pub muag ib co sunscreen
Kuj tau muaj 10 cov sunscreens tau raug txwv tsis pub muag ntawm tej txee muag khoom ntawm tej khw ntawm Australia vim txhawj txog lawv cov kev cav tias siv tau pov puag zoo tiag. Ces tam sim no thiaj tau muaj 18 hom sunscreens raug tshem los yog raug cheem ntawm teb chaws Australia kom tsis txhob rawm muag.
Tus me nyuam tub ploj ntawm South Australia
Tsev neeg uas muaj tus me nyuam tus hu ua Gus uas muaj 4 xyoos uas tau ploj tau 5 hnub ntawm tsev neeg no lub tsev ntawm thaj teb yug yaj ntawm xeev South Australia nruab nrab sab qaum teb ib lub zos toj siab txij hnub Saturday tim 27 lub 9 hlis ntuj los no lawm. Tsev neeg no thiaj cia siab tias tseem yuav nrhiav tau nws.
Tej tshuaj pab cawm siav
Tau muaj neeg Australia cov kev txhawj xeeb tias tsam tsis muaj peev xwm yauv tau tej tshuaj tseem ceeb pab cawm tau lawv txoj siab rau lub caij uas Meskas tus coj tau qhia txog ib co tswv yim txo nqe tshuaj ntawm nws lub teb chaws. Meskas tus thawj tsav meem tau kos mem tes executive order hais kom Meskas tej tuam txhab tshuaj txo nqe raws li cov kev pom zoo tshiab uas Pfizer twb pom zoo yuav txo lawm.
Daim phiaj zeb hnoob nyoog ntau caum xyoo
Tau nrhiav tau ib daim phiaj zeb luaj li tib neeg siab 6 feet ntawm qaum teb Saudi Arabia uas kos tej duab tsiaj camels, sai thiab lwm yam tsiaj rau uas txheeb tau tias muaj hnoob nyoog txog li ntawm 12,000 xyoo.
