Ntawm teb chaws Australia no ces yeej muaj neeg Australia yuav laug txog li 300,000 tus ua lub neej nyob nrog tus kab mob siab hom B los yog hom C (Hepatitis B/C) uas yeej tsis muaj tej yam ntxwv qhia tias lawv mob siab li, thiab ib xyoos twg los yeej muaj neeg tas sim neej txog li 1,000 tus.
Xam yooj yooj yim tias yog 100 tus neeg mob siab ces yuav muaj 69 tus tau cov kab mob siab hom Hepatitis B thiab muaj tej neeg yuav laug txog li 25 leeg yog cov mob hom Hepatitis C. Hom C ces kho tau zoo tab sis tsis muaj tshuaj vaccine hno. Hos B ces muaj tshuaj vaccine hno thiab yeej muaj tej xub ke kho tau thiab tab sis kho tsis tau kom zoo tu qab kiag.
Ces cov kev kho tus kab mob siab (Hepatitis) no thiaj yog ib co hauj lwm tseem ceeb rau teb chaws no. Tab sis lub koom haum Hepatitis Australia hais tias yog pheej kho li qub no xwb ces ntshe yuav tsis muaj peev xwm kho tau tej neeg mob no raws li tau teeb tej hom phiaj rau 10 lub xyoo. Thiab lub koom haum no xav kom kub siab tshaj no thiab muaj cov kev xov xwm ua ntau hom lus kom siv tau rau ntau cov zejzog.
Lub koom haum Hepatitis Australia tsab ntawv cej luam tshiab txheeb tau tias muaj tem neeg tsiv teb tsaws chaw coob heev yog cov neeg uas mob tus kab mob siab tab sis lawv tsis paub tias tau tus mob no los yog tsis tau siv cov kev kho mob raws li qhov lawv xav siv.
Pom tias 70 feem pua ntawm tej neeg uas tau hom mob siab Hepatitis B ces yog tej neeg yug txawv teb chaws, thiab muaj tej neeg ntawm cov teb chaws Southeast Asia yog cov mob coob, thiab yog tus mob muaj peev xwm kis ntawm tus leej niam mus rau tus me nyuam tau, thiab yeej pom muaj tej xwm txheej no.
Thiaj ua rau Professor Gregory Dore ntawm lub chaw teeb txheeb Kirby Institute hasi tias vim tus mob no yog ib tug mob ntsiag to ces thiaj yog tej yam tseem ceeb heev uas peb yuav tau mus sim thiab txheeb tas mus li.
Nws hais tias ''Vim txawm tsis muaj yam ntxwv mob los tej zaum nws twb mob tau ntau caum xyoo lawm, ces thiaj yog ib tug mob uas mob ntsiag to uas ua rau muaj teeb meem rau lub siab yam yus tsis paub. Vim li ntawd thiaj tseem ceeb heev uas peb yuav tau xa ib tsab xo qhia rau tej neeg kom mus txheeb thiab mus sim."
Lucy Clynes uas yog tus CEO ntawm lub koom haum Hepatitis Australia hais tias cov kev nkag siab tias leej twg yog cov neeg mob yog ib co txheej tseem ceeb heev.
Clynes hais tias "Peb paub tias ib nrab ntawm tej neeg mob siab no ces yeej tseem tsis tau raug txheeb kom paub tias lawv mob, thiab tsis tau siv tej kev kho mob li lawv xav tau. Cancer mob siab yog ib co ua rau neeg tas sim neej coob heev ntawm Australia thiab."
Mei Mak uas yog ib tug leej niam uas mob siab hom B (Hepatitis B) hais tias tsis txhob cia cov kev ntshai tsam raug lwm tus ntaus nqe tsis zoo rau yus los txwv txiav yus kom tsis txhob kub siab txog yus txoj kev noj qab haus huv.
Mak hais tias "Yog tej yam tseem ceeb uas tej neeg ua lub neej nyob uas mob kab mob siab no yauv tau ua cov neeg muaj peev xwm, thiab xav paub thiab tshawb kom paub txog tus mob no thiab pab kom lawv lub siab tau txais kev noj qab nyob zoo, thiab nrhiav kev pab cuam txawm tias yus tsis muaj tej yam ntxwv mob."
Mloog tau xov xwm ntxiv ntawm SBS Hmong lub vas sab, download SBS Adio app thiab caum SBS Hmong Facebook page.
