Ntsiab lus tseem ceeb:
- Yog tham txog tej hluas ces, yeej tau muaj cov kev teeb txheeb txhawb nqa tias kom tsis txhob rawm mam haus dej cawv kom thiaj tsis ua rau lawv hauv caws ntau rau thaum lawv hnoob nyoog nto 18 xyoo lawm..
- Yeej muaj tej cai teev txog cov kev muag thiab tswj cov kev haus dej cawv uas teev tias hnoob nyoog li cas thiaj pub haus thiab thiaj pub yuav tau, tsis tas li ntawd tseem muaj tej cai tswj tias pub muag qhov twg thiab muaj ib co kev txwv tsis pub haus cawv ntawm zej tsoom qee cov chaw.
- Tej neeg Australia yuav tau nqa lawv tej dej cawv mus koom ib lub koom txoos twg ntawm ib tug twg tsev yog tias tus tswv tsev tsis npaj, tab sis yog tham txog tej chaw hau dej cawv lawm ces yeej muaj tej kab lis kev cai uas ib tug twg ua tus yuav dej caw rau lwm tus los yog ib pab neeg twg haus thiab..
Lub koom haum National Medical and Research Council yeej tau tsim ib co kev taw qhia txog cov kev haus dej cawv siv ntawm teb chaws Australia coj los pab kom tej dej caw tsis txhob ua rau muaj teeb meem tsis tau txais kev noj qab nyob zoo.
Tej kev taw qhia no yeej hais kom tej neeg ntiag tug uas tau txais kev noj qab nyob zoo tsis tsim nyog haus cawv ntau tshaj 10 fwj/khob rau ib limtiam twg thiab tsis pub haus ntau tshaj 4 fwj/khob rau ib hnub twg.
Ntawm Australia no ces ib co standard drink ces muaj cawv 10 grams tsis tim dab tsi xyaw li. Los sis yog xam yooj yooj yim tias yog ib khob beer 285ml, los yog ib khob cawv txiv 100ml, los sis yog ib khob cawv muaj 30ml. Thiaj yog tej yam tseem ceeb yuav tau nco tias tej dej cawv haus ntau yam ces yeej muaj tej cawv ntau tshaj qhov tsim nyog haus ib zaug lawm.
Ib tug twg nyias yeej muaj nyias cov kev cuam tshuam nrog dej cawv sib txawv. Ib txhia ces yeej tsis haus li los yog ib txhia ces yeej haus tsawg tshaj lawv tej phooj ywg los sis yog txiav txim siab haus tej khoom haus uas tsis yog cawv. Credit: Thomas Barwick/Getty Images
“Tej neeg hnoob nyoog 18 xyoo uas haus cawv raws li cov kev taw qhia no ces yuav muaj cib fim tsawg dua ib zaug ntawm ib puas zaug uas yuav tas sim neej los ntawm tej kab mob los yog cov kev raug mob cuam tshuam txog dej cawv. Tab sis kuj tsis yog tias yuav tsis raug teeb meem dab tsi li thiab.''
Cov kev haus cawv tsawg los sis tsis haus cawv li kuj yog ib co kev txiav txim siab uas yus muaj peev xwm ua tau.Kristie Cocotis
Tab sis Ms Cocotis hais tias muaj ib co kev teeb txheeb ntawm haiv neeg no uas lub koom haum FARE tau ua ntawd ces 44 feem pua ntawm tej neeg Australia uas lub koom haum no tau nrog tham yeej tau qhia tias lawv xav haus cawv kom tsawg los sis yog tso tseg tsis haus cawv lawm.
Dej cawv thiaj yog ib yam ntawm lub teb chaws no uas ua rau muaj teeb meem tsis tau txais kev noj qab nyob zoo ntev ntxiv tuaj, vim tej xov xwm tshiab uas lub koom haum Australian Institute of Health and Welfare tau qhia ntawd ces yeej qhia meej tias dej cawv tseem yog ib co xwm txheej ua rau tej neeg raug coj mus kho mob cuam tshuam txog tej yaj yeeb ua rau tej neeg tsis tau txais kev noj qab nyob zoo.
Ms Cocotis hais tias: "Dej cawv tau ua rau muaj tej neeg ze txog li 6,000 tus tas sim neej txhua xyoo thiab muaj neeg ntau tshaj 144,000 tus raug coj mus kho ntawm tsev kho mob,''
Ms Cocotis thiaj tau qhia txog tej zauv uas tau qhia rau xyoo 2023-24 tias:
"Thiab peb paub tias tej dej cawv cuam tshuam nrog tej cancer 7 yam sib txawv thiab ntau tshaj 200 hom kab mob thiab ua rau tej neeg raug mob.''
Cawv ces yog ib yam uas yuav muaj kev cuam tshuam rau tus me nyuam xeeb hauv plab uas tseem tsis tau yug. Thiab yeej tsis muaj ib lub caij uas yuav tau txais kev nyab xeeb rau cov kev haus cawv rau lub caij muaj me nyuam li. Credit: Barry Austin/Getty Images
Thaum twg mam li haus thiab neeg Australia haus cawv li cas?
Tej xov xwm tshiab tau ntawm Australian Bureau of Statistics (ABS) qhia tias ib tug ntawm plaub tug neeg muaj hnoob nyoog 18 xyoo ntawm teb chaws Australia no yeej haus tej dej cawv ntau tshaj tej taw qhia kom haus lawm.
Amy Pennay uas yog ib tug Senior Research Fellow thiab kuj yog tus lwm coj ntawm lub chaw teeb txheeb Centre for Alcohol Policy Research ntawm tsev lawm qib siab La Trobe University.
Nws hais tias Australia ces yeej yog lub teb chaws uas tsis tshua nrhiav tau dej cawv thiab cov kev teeb txheeb txog tej yaj yeeb.
Uas txawv cov “wet cultures,” uas yeej muaj dej cawv ntau rau tej neeg haus thiab ib txwm haus tsawg tsawg thiab haus tas li, tab sis cov kab lis kev cai dry culture ces yog tsis tshua hau dej cawv tas mus li - tab sis yog thaum tau haus ces hau ntau heev.
Lub caij caij nqaij noj ntawm tsev ces yeej pom muaj dej cawv haus, tsuas yog tias ntshe tus tswv tsev ho qhai meej tias npaj rau sawv daws haus xwb. Source: Moment RF / Attila Csaszar/Getty Images
Dr Pennay tshab txhais tias ''Tej zaum kuj cuam tshuam txog txog lub caij so ua tej kab lis kev cai kev ntseeg thiab lub caij yus tau so los yog thaum txog caij ntuj sov thiab yuav txog xyoo tshiab ntawd. Ces hnub Australia thiab Hnub Anzac Day los kuj yog cov hnub uas muaj neeg haus cawv ntau heev thiab.''
Nws hais ntxiv tias cov kev mus saib kev sib tw los kuj cuam tshuam nrog cov kev haus dej cawv ntau thiab.
''Thaum uas neeg Australia saib cov kev sib tw AFL (Footy), cricket los yog national rugby ces yeej muaj kev cuam tshuam txog dej caw nrog tej neeg uas tau mus koom saib ntawm tej chaw sib tw los yog tej neeg saib cov kev sib tw ntawm tsev.''
Tej kev cai haus cawv
Yog tias koj yog ib tug neeg tuaj tshiab rau teb chaws Australia no, ces yeej muaj ob peb yam kev cai haus cawv uas koj yuav tau nco ntsov.
Thawj co ces yog yus nqa yus li cawv mus koom nrog lwm tus haus — “Bring Your Own (BYO)” uas yeej ib txwm pom thaum mus noj mov picnics los yog tej neeg sib ntsib ntawm tsev.
Hos lwm cov kev cai haus cawv ces yog neeg Australia ib tug twg yuav dej cawv rau lwm tus haus ntawm ib lub bar los yog pub uas siv lo lus 'shouting'.
Tsuas yog tias tus tswv cuab qhia meej tias lawv yeej npaj dej cawv rau saws daws haus xwb, tsis li ntawd ces yog tias yus raug caw mus rau ib tug twg lub tsev mus noj nqaij ci (Barbecure -BBQ), noj mov picnic ces yus yuav tsum tau nqa yus cawv mus koom.Dr Amy Pennay
''Dua ntawm tej hais ntawd lawm ces peb yeej muaj ib co kab lis kev cai haus cawv ntawm tej chaw haus cawv thiab. Yog li ntawd yog tias koj mus rau ib lub khw noj mov twg los yog ib lub bar twg nrog koj tej phooj ywg poj niam, ces peb yuav sib hloov mus rau ntawm lub bar ntawd mus yuav cawv rau lwm tus ntawm tag nrho pab neeg ntawd haus.''
Yog tias koj raug caw mus rau ib tug twg tsev mus koom ib co koom txoos dab tsi, ces koj yuav tau nqa koj ib yam cawv twg uas koj nyiam haus mus koom tus tswv cuab yog tias koj npaj tias xav haus cawv. Credit: Jupiterimages/Getty Images
Tej cai tswj thiab txawv cov hnoob nyoog haus cawv
Ntawm Australia ces yuav tsum muaj hnoob nyoog nto 18 xyoo mas thiaj muaj cai yuav tau cawv haus ntawm tej chaw muag dej cawv haus li ntawm ib lub bar ntawd.
Tsis tas li ntawd los yuav tsis muaj cawv muag ntawm tej convenience stores los yog muag ntawm tej tub muag dej cawv haus. Thiab yuav tsum tau mus yuav ntawm tej chaw muag cawv uas muaj ntaub ntawv raug cai muag tau thiab ua luam muag cawv xwb li peb paub tias yog 'bottle-o' los yog bottle shops.
Kate Richardson ces yog ib tug senior solicitor ntawm lub koom haum Youth Law Australia. Nws hais tias tej zaum tej khw muag cawv yuav nug seb tej hluas uas mus yuav cawv ntawd puas muaj ntawv qhia lawv lub cim thawj — identification (ID) thaum lawv xav yuav cawv.
"Tej khw muag cawv yuav tsum tau nug tej hluas cov ID los yog yuav tsum muaj ib co ntaub ntawv twg qhia tau tias tus neeg ntawd muaj hnoob nyoog tshaj 18 xyoo los yog tej zaum yus muaj hnoob nyoog qes dua 25 xyoos raws li tej cai txheeb cov kev yuav cawv thiab haus cawv mas yus thiaj muaj cai yuav tau cawv haus thiab lawv thiaj muag tau cawv rau yus.''
Thiab tej cai teev txog lub hnoob nyoog haus tau/yuav tau cawv haus ces yeej siv tib yam thoob Australia xwb.
Tab sis kuj muaj lwm yam cai siv ntxiv thiab—li tej cai tswj tias pub haus cawv ntawm zej tsoom tej chaw ib qho qhov twg — los yeej sib txawv ntawm ib lub xeev rau lwm lub xeev thiab.
Tej zaum ib lub bar twg los yog ib lub khw muag cawv twg kuj nug kom yus muab yus daim ID rau lawv saib thiab. Credit: O2O Creative/Getty Images
Ms Richardson hais tias ''Yog li ntawd thiaj yog tej yam tseem ceeb heev yuav tau txheeb kom paub tseeb kiag tias muaj tej cai dab tsi siv tswj cov kev haus cawv ntawm tej zos uas yus nyob ntawd.''
Tsab cai Secondary supply laws — ces yog tej cai teev tseg tias tej neeg twg yog cov muaj cai muab tau dej cawv rau tej hluas hnoob nyoog qes dua 18 xyoo haus — tab sis kuj muaj tej cai no siv sib txawv thoob Australia thiab.
Ntawm qee cov xeev ces tsuas pub ib tug niam txiv twg los yog tus neeg saib xyuas tej hluas ntawd thiaj yog tus muaj peev xwm muaj cawv rau ib tug neeg hnoob nyoog qes dua 18 xyoo haus tau xwb. Hos ntawm lwm cov xeev ces yeej muaj ib tug twg yog tus muaj peev xwm muab tau cawv rau tej hluas li hais no haus thiab, tab sis yuav tsum tau txais kev tso cai ntawm tus me nyuam ntawd niam thiab txwv los yog tus neeg tu tsom kwm nws. Thiab txawm muaj peev xwm ua tau li hais ntawd los, yeej tseem muaj tej lus zoj khi los ua tib zoo xyuas kom tsuas pub haus tau cawv raws li qhov tsim nyog haus xwb thiab.
Tej ntawd ces yog:
- Seb tus hluas ntawd muaj hnoob nyoog li cas.
- Seb puas yog tus neeg uas muab cawv rau ib tug hluas twg haus ntawd puas qaug cawv.
- Seb tus hluas ntawd puas tau noj mov rau lub caij ntawd.
- Thiab seb ho muab cawv ntau npaum li cas los yog hom dej cawv twg rau tus hluas ntawd haus.
''Yog tias tej niam txiv los yog tej neeg tu tsom kwm lawv tej me nyuam ho mus koom ib lub koob tsheej twg ntawm lawv tej phooj ywg lub tsev ces lawv yeej txhawj tias tsam ho muaj ib tug twg yuav muab cawv rau lawv tus me nyuam haus.
Ms Richardson tshab txhais tias ''Ces thiaj li muaj tej cai no los teev tias leej twg yog tus neeg paub tab uas yuav los tswj tej xwm txheej no. Tsis yog yus tej phooj ywg uas muaj hnoob nyoog tshaj 18 xyoo xwb. Tab sis yuav tsum yog ib tug niam txiv los yog ib tug neeg tu tsom kwm tej hluas twg, los sis yog ib tug niam txiv los nrog xyuas.''
Yeej muaj tej cai lij choj txwv tsis pub muab dej cawv rau ib tug hluas hnoob nyoog tsis tau nto 18 xyoo haus txawm tias yus yog lawv ib tug phooj ywg uas muaj hnoob nyoog tshaj 18 xyoo lawm. Credit: Anchiy/Getty Images
Thaum twg thiaj yog lub hnoob nyoog zoo haus cawv?
Dr Pennay hais tias yeej muaj cov kev teeb txheeb txhawb nqa tias kom tej hluas ncua tsis txhob haus cawv mus txog hnub hnoob nyoog yam tsawg 18 xyoo tso.
Thiab cov kev ncua tsis haus cawv no los yeej haum raws li lub hnoob nyoog raug cai uas pub haus cawv ntawm Australia thiab yog lub hnoob nyoog raws li lub koom haum National Medical and Research Council taw qhia.
''Tej pov thawj teeb txheeb yeej qhia meej tias yog ncua tsis txhob haus cawv ntev npaum li cas, ces yuav ua rau tus hluas ntawd yuav ras los ua tus neeg haus cawv tsawg npaum li ntawd.''
Yog tias koj los yog ib tug twg uas koj paub xav tau txais kev pab
If you or someone you know needs support in relation to their alcohol use, you can call the National 24/7 Alcohol and Other Drugs Hotline on 1800 250 015, a confidential, non-judgemental telephone counselling, information and referral service, free of charge.
For crisis support please call Lifeline on 13 11 14.
Visit Department of Health's website to find out more about alcohol laws in Australia and your state or territory.
Subscribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia kom koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm australiaexplained@sbs.com.au
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
