Raws li tau muaj cov kev teeb txheeb tshiab los ntawm lub koom haum Jesuit Social Services tau qhia ces kuj txheeb tau tias tej txiv neej uas pheej coj nruj, tsis nyiam poj niam thiab muaj cov kev ntseeg tias txiv neej yawg tsim nyog zoo li cas ntawd yog cov uas tej zaum yuav siv kev kub ntxhov tsim teeb meem rau tej poj niam dua. Thiab kuj yog cov uas ntsib kev nyuaj siab ntxhov plawv dua.
Lub koom haum no cov kev tau mus teeb txheeb hauv online nrog tej txiv neej neeg Australia coob tshaj 3,500 tus thoob teb chaws Australia uas muaj hnoob nyoog txij 18 txog 45 xyoos ces pom tau tias 36% raug tsub nias kom coj tej cwj pwm li txiv neej yawg. Thiab muaj 24% ntawm tej txiv neej no yeej pom zoo nrog tej cwj pwm txiv neej yawg, txhais tau tias muaj li ntawm 3 tug txiv neej ntawm 4 tug twg tsis pom zoo rau txiv neej yawg tej cwj pwm.
Michael Flood uas yog ib tug kws teeb txheeb ntawm tsev kaw qib siab Queensland University of Technology uas tau pab tsab ntawv cej luam no tshab txhais tias ib tug txiv neej yawg tsim nyog yuav coj tej cwj pwm zoo li cas.
Raws li ib txwm coj thiab muaj kev cia siab lawm ces ib tug txiv neej ywg, tsis hais me nyuam tub los yog ib tug txiv neej twg tsim nyog yuav yog ib tug neeg ua taus txiv, coj nruj, nyiam ua tej yam phom sij, tsis qhia txog nws txoj kev xav rau lwm tus paub, nyiam sib deev, thiab ua taus txiv.Michael Flood, a researcher from Queensland University of Technolgy explains the phrase 'Man Box'.
Flood hais tias muaj xov zoo thiab xov phem los ntawm cov kev teeb txheeb no.
Qhov zoo ces muaj kev pauv hloov rau tej txiv neej cov kev xav uas tsis tshua soj ntsoov tias lawv tus hluas nkauj mus rau qhov twg txhua sij hawm lawm. Tab sis qhov phem ces yeej tseem tsis tau muaj kev pauv hloov rau tej txiv neej cov kev coj nruj los yog pheej tseem siv cov kev tsim kev kub ntxhov los tswj lwm tus kom tau txais kev cam hwm. Ib yam tsis zoo ntxiv ces tej txiv neej hluas tseem txhawb nqa tus qauv piv txwv tias tsim nyog txiv neej yog ib tug coj phem, tsis nyiam poj niam, thiab yeej tsis muaj cov kev pauv hloov tej kev xav no rau 5 xyoos dhau los li thiab.Michael Flood, researcher from Queensland University of Technology.
Kate Fitz Gibbon uas yog tus coj ntawm lub koom haum Respect Victoria tau hais tias 'cov kev teeb txheeb no qhia tias muaj feem cuam tshuam ntawm tej cwj pwm tsis zoo no nrog cov kev tsim kev kub ntxhov rau tej poj niam thiab ua rau muaj teeb meem rau txhua tus yog li yuav tau nqes tes daws tej cwm pwm no.'
Phillip Ripper uas yog tus coj lub koom haum No to Violence uas nrhiav kev pab kom tej txiv neej uas pheej tsim teeb meem kub ntxhov tsis txhob tsim tej teeb meem no kuj hais tias 'txawm tias tsis yog tag nrho txhua cov kev tsis hwm poj niam yuav ras los ua teeb meem kub ntxhov hauv lub cuab yig, los tag nrho txhua yam teeb meem kub ntxhov uas tau tshwm sim hauv lub cuab yig yeej pib los ntawm cov kev tsis hwm tej poj niam.'
Yog li ntawd tsab ntawv cej luam no thiaj xav kom los ua 4 yam li hloov tej cai, los qhia tej zejzog kom paub, tsim kom tau ib cov tswv yim los tiv thaiv kom tsis txhob tsim teeb meem kub ntxhov thiab txhawb nqa kom tej neeg paub txog ib tug yam ntxwv ntawm ib tug txiv neej yawg zoo ho zoo li cas.
Cov kev cob qhia tej me nyuam tub kom paub txog tias txoj kev sib raug zoo zoo li cas, thiab txoj kev sib raug zoo uas muaj kev sib hwm zoo li cas nrog rau lawv tej phooj ywg thiab cov kev tsim kom tau ib tug qauv zoo thiaj yuav yog ib co kauj ruam tseem ceeb yuav xaus tau cov voj vooj tsim kev kub ntxhov.Minister for Social Services Amanda Rishworth's statement to SBS News.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
