Lub ceeb toom: Tej zaum zaj xovxwm no yuav ua rau ib txhia ntxhov siab.
Yasmin* (uas tsis yog tus poj niam no lub npe tseeb tiag vim tsis xav kom lwm tus paub tias nws yog leej twg) tau ntsib nws tus txiv los ntawm ib cov kev sib qhaib ua txij nkawm. Tab sis thaum nws tau tuaj rau Australia ces nws tus txiv tej cwj pwm uas hlub tshua nws cia li tau hloov txawv lawm.
Nws tus txiv tau tswj Yasmin tej nyiaj uas nws tsev neeg muab ua khoom plig rau nws lawm kom tau siv rau lub caij ti tes ti taw lawm, thiab cia li coj mus siv rau nws ntiag tug lawm, thiab nws tseem tau siv Yasmin tej nyiaj uas nws txuag tau, thiab tseem txhob kom nws tsis txhob mus ua hauj lwm thiab.
Tau 7 xyoo uas Yasmin tau txiav txim siab nyob ua ib tug niam tsev zoo thiab cia siab tias yuav pab cawm tau nkawv txoj kev txij nkawm. Tab sis thaum kawg uas nws tau txais kev pab ntawm nws tej phooj ywg, ces nws thiaj tau qhia tej xwm txheej phem uas nws tus txiv tau ua rau nws rau tub ceev xwm. Tam sim no ces nws yog ib tug leej niam tab tom ua hauj lwm kheej los tab nws lub cuab yig.
Tej xwm txheej tau tshwm sim rau Yasmin no yeej yog ib hom teeb meem kub ntxhov ntawm ntau yam, tab sis nws tau hais tias tej xwm txheej no tau pib los ntawm cov kev siv nyiaj los ua phem rau nws.
Caroline Wall uas yog tus tswj cov hauj lwm Customer Vulnerability ntawm lub txhab nyiaj Commonwealth Bank hais tias:
"Tej zaum ces kuj pib ntsiag to yam yus tsis paub txog, li pheej hais kom yus qhib ib phau ntawv siv nyiaj ua ke thiab kom yus tso yus tej nyiaj hauj lwm uas khwv tau ntawd tso rau phau ntawv siv nyiaj ntawd, los sis yus tus txiv/tus poj niam pheej siv phau ntawv siv nyiaj ntawd los tswj yus tej nyiaj thiab zoo li yog tus paub tswj dua,''
"Thiab yeej muaj lwm yam cim uas txaus txhawj xeeb tshaj ntawd ntxiv qhia tias seb yus puas raug lwm tus siv nyiaj tsim teeb meem rau yus li pheej yuam kom yus mus qhib credit card siv los sis yog siv yus npe mus qev nyiaj siv tab sis yus tsis tau txiaj ntsim dab tsi ... tej zaum yus tus txiv/tus poj niam pheej tsis pub yus mua ua hauj lwm, los yog pheej kom yus yuav tau muab receipts rau nws los sis yog yuav tau qhia tag nrho tej nyiaj yus siv ntawm ib hnub twg rau nws tias coj mus siv ua dab tsi, txawm tias tej nyiaj siv ntawd yog tej nyiaj tsim nyog siv ua lub neej txhua hnub uas siv tsawg tsawg xwb.''
Dr Farjana Mahbuba ces yog ib tug neeg teeb txheeb txog cov kev siv nyiaj tsim teeb meem rau tej poj niam tsiv teb tsaws chaw neeg Bangladeshi uas nyob ntawm teb chaws Australia.
Nws tau hais tias tej teeb meem ntau yam pom muaj tas mus li uas pheej ua rau tej poj niam neeg tsiv teb tsaws chaw tsis muaj peev xwm khiav tawm ntawm tej teeb meem kub ntxhov hauv lub cuab yig ces yog teb chaws thiab tej kab lis kev cai cov kev vam kev cia siab, lawv tej visa, tej xov xwm cuav, thiab cov kev tsis paub zoo txog tub ceev xwm thiab tej cai lij choj.
Tab sis cov kev tau txais kev pab los ntawm ib tug phooj ywg twg yog ib co tseem ceeb tshaj plaws rau lawv.
Dr Mahbuba tau hais tias "Kuv yeej tsis pom ib tug poj niam twg li uas raug teeb meem kub ntxhov rau nws txoj kev txij nkawm/sib raug zoo nrog nws tus txiv yuav muaj peev xwm tsiv tawm ntawm tej xwm txheej no yog tsis tau txais kev pab los ntawm ib tug neeg twg li. Vim yeej tsis muaj ib tug poj niam twg yuav muaj peev xwm daws tau tej teeb meem no kheej li.''
Yog tias koj los yog ib tug twg ntsib teeb meem kub ntxhov hauv lub cuab yig, ces hu tau rau haiv neeg no lub koom haum pab daws teeb meem kub ntxhov 1800 RESPECT tus xov tooj 1800 737 732 tau.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
