Sanae Takaichi ntawm pab nom Liberal Democratic Party uas yog Japan thawj tug poj niam thawj pwm tsav uas nyuam raug xaiv los ua nom tshiab tau cog lus tias ''yuav raug sib ntso'' ua hauj lwm kom nws lub teb chaws rov qab zoo tuaj rau lub caij uas zoo li muaj tej kev tsis txaus siab rau tej lagluam thiab tej nuj nqes siv ua lub neej ua kim tuaj ntxiv.
Ms Takaichi tau yeej cov suab 237 lub suab hauv tsev kis xeev qes (House of Representative) ces nws thiaj tau yeej los ua Japan thawj tug thawj pwm tsav poj niam, uas nws tau lub npe tias yog tus 'Iron lady' li Askiv tus qub thawj pwm tsav Magaret Thatcher dhau los.
Txawm li cas los nws yog ib tug coj uas nyiam coj li qub, uas yeej tsis pom zoo nrog tej hauj lwm tsiv teb tsaws chaw, kub siab txog kev ruaj ntseg hais thiab tej kev coj taug ua zoo raws li ib txwm coj ntawm lub teb chaws no.
Txawm tias nws pab nom tau ua tsoom fwv los ntev los vim nws tsis muaj tej rooj nom feem coob ces thiaj muaj neeg xav tias xyov nws puas muaj peev xwm ua tau tej hauj lwm nws xav ua.
Tab sis zej tsoom Japanese xav tias ''vim tseem tsis tau txhais kev vam meej thiab poj niam neeg Japanese tseem poob qab ces xav kom nws nrog xyuas kom tau txais kev vaj huam sib luag rau poj niam, thiab cia siab tias nws yuav kub siab los daws ntau yam teeb meem kom zoo npaum li qhov nws muaj peev xwm ua tau.''
Nws kuj tau cog lus tias yuav xyuas kom muaj kev sib raug zoo nrog Meskas. Tab sis nws cov kev mus xyuas tus pej thuam qub tub rog ua rau Suav thiab South Korea tsis txaus siab tab sis lawv tej nom tswj tuam chav txawv teb chaws thiab tej dej num txawv teb chaws yeej cia siab tias yuav xyuas kom muaj cov kev sib raug zoo nrog ob lub teb chaws no thiab ua raws li tej ntaub ntawv tau sib pom zoo.
