Lub koom haum AUKUS ces raug teeb tsa rau lub 9 hlis ntuj xyoo 2021 thiab muaj 3 lub teb chaws tub koom siab li Australia, Askiv (United Kingdom) thiab Meskas (United States of America).
Lub hom phiaj yog muaj cov kev sib khom phom zoo kom tsim tau cov nkoj nuclear submarine rau Australia siv cov nkoj diesel electric submarines rau xyoo 2030s thiab yog thawj co hom phiaj uas yuav siv nyiaj txog li $368 billion.
Yog li cov hauj lwm toom 2 ces yog npaj yuav los tsim tej technology vam meej siv li tsim cov foob pob tua tau ceev tshaj suab nrov, tej drones siv hauv dej hiav txwv thiab cov hauj lwm electronic warfare.
Australia tus thawj pwm tsav Anthony Albanese tau hais tias 'Xav tau cov teb chaws muaj cov kev xav zoo siab xws los koom, thiab pom tias Japan yog ib lub teb chaws muaj peev xwm rau phab tug rog thiab muaj tej technology vam meej siv.'
Lub limtiam no uas Japan tus thawj pwm tsav tseem mua xyuas Meskas ib limtiam no America tus president Joe Biden tau qhia tias twb npaj tej hauj lwm no lawm.
Txawm li cas los Suav tsis pom zoo, thiab Mao Ning uas yog tus kis ntawm Suav lub tuam chav txawv teb chaws hais tias 'Xav kom tej teb chaws muaj feem xyuam cheem lawv tus kheej thiab tsis txhob ua rau tsis tau txais kev thaj yeeb thiab kev ruaj ntseg rau ntawm cheeb tsam (Indo-Pacific) thiab ntiaj teb. Thiab xav kom Japan rov qab kawm ntawm nws tej keeb kwm txog nws tej tub rog txoj kev hawv. Thiab xyuas kom nws koom tswj kev ruaj ntseg thiab ua raws cov kev txhim kho thaj yeeb xwb.'
Tab sis Japan tus thawj pwm tsav tau hais tias 'Suav lub sam thiaj tam sim no thiab nws lub zog tub rog uas ua ntau yam yam tsis tau pom dua no yog tej yam yuav ua rau ntsib teeb meem nyuaj, tsis yog tias yuav ua rau tsis tau txais kev thaj yeeb thiab kev tiaj tus rau Japan xwb tab sis tseem yuav ua rau muaj tej xwm txheej no rau zej zog pej kum haiv thiab.'
Professor Derek McDougall uas yog ib tug paub zoo txog cov teb chaws Asia sab hnub tuaj ntawm tsev kawm qib siab Melbourne University hais tias 'Japan yeej tau teev nws tsab cai pacifism - uas tsis pom zoo ua tsov rog thiab tsim kev kub ntxhov tab sis siv kev nom tswv sib kho, yeej raug teev zwm rau Japan tej txhooj cai tswj haiv lawm ces Japan yeej koom tau lub koom haum AUKUS, thiab yeej muaj cai tswj tias tsuas pub siv Japan tej tub rog li cas xwb.'
Professor John Blaxland uas yog ib tug paub zoo txog phab kev ruaj ntseg thiab kev soj xwm qab rooj ntawm tsev kawm qib siab Australian National University hais tias 'kuj tsem txhawj txog Japan me ntsis, nws tej keeb kwm ntau caum xyoo dhau los no, thiab nyuam qhuav tsim cai tshiab los siv tsis ntev los no xwb. Ntxiv ntawd los tseem yuav tau ua tib zoo xyuas kom tsis txhob muaj cov kev nyiag soj xwm, tsis txhob coj tej xov xwm txog cov kev koom tes no coj mus muag/qhia rau lwm tus uas tsis tsim nyog tau. Ces ntshe Japan thiaj yuav tau kub siab los npaj tej no kom zoo tso.'
Dr Euan Graham uas yog ib tug kws paub tshuaj ntsuam ntawm lub chaw teeb txheeb Australian Strategic Policy Institute hasi tias tej zaum kuj yuav muaj qhov nyuaj thiab 'li yog cia muaj ntau tus koom ces yuav ua tau tej hauj lwm no qeeb. Thiab yuav tau nug tias lwm lub teb chaws li New Zealand thiab Canada uas xav koom ntawd - yog thaum los koom lawm ho yuav pab kom tau txais txiaj ntsim dab tsi rau lub koom haum AUKUS no. Vim lub hom phiaj tiag ces Australia yeej txhawj tias yog muaj tej hauj lwm no ncua ntev npaum li cas ces ntshe tsam tsim tsis tau tej nuclear submarine no coj los siv raws siab xav xwb.'
Yog li ntawd dua ntawm Japan lawm yeej tseem tau muaj ntau cov teb chaws li New Zealand, Canada thiab South Korea los yeej xav los koom tej hauj lwm no thiab.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
