Xov xwm luv tshaj tawm ntawm limtiam rau hnub zwj Quag tim 16.01.2024:
· Thawj pwm tsav Anthony Albanese mus xyuas seb ua tau txoj kev Pacific Motorway tiav li cas lawm.
· Tsoom fwv teb chaws qhia tias nws yuav tshwm nyiaj ntau tshaj $188 million pab daws cov teeb meem nyiag thiab muag luam yeeb txhaum cai.
· Penny Wong uas yog Australia tus nom txawv teb chaws tau mus xyuas Israel thiab Gaza thiab tau nrog ntau cov teb chaws ntawm Middle East tham. Ua ke no los tej koom haum pab cuam tej neeg txom nyem tau nqua hu kom sib kho xaus tsov rog Israel-Hamas. Txawm li cas los Australia lwm pab nom teb chaws tau tib tias Australia tsis kub siab txog nws tej teb chaws phooj ywg tom qab Meskas tau hais kom Australia xa tub rog mus pab Meskas thiab Aaskiv tawm tsam tub rog Houthi ntawm Yemen.
· Israel tej tsheb tanks thiab dav hlau tua rog tau mus tua ntau thaj chaw ntawm sab qab teb thiab plawv Gaza. Raws li Gaza lub tuam chav tswj kev noj qab haus huv hais ces muaj neeg yuav laug txog 24,000 tus raug tua tuag, thiab muaj neeg ntau tshaj 60,000 tus raug mob txij Hamas tau tua sab qab teb Israel tim 7 lub 10 hli ntuj 2023 los no.
· Tau muaj ib tug kws lij choj paub zoo txog pej kum haiv cai cav tias tej zaum South Africa yuav muaj peev xwm coj Israel mus hais plaub cuam tshuam txog cov kev tua neeg Palestinian npog nroj ntsuab txij thaum nws tau mus tua Gaza los no.
· Tsoom fwv teb chaws thiab tsoom fwv xeev New South Wales qhia tias yuav siv nyiaj tshaj $200 million mus pab them cov hauj lwm energy upgrades uas yuav kho tej vaj tse uas sov heev rau lub caij ntuj so thiab txiav heev rau lub caij ntuj no li nruab tej kiv cua, nruab twj tso cua txias etc., kom tej cuab yig 10,000 yim ua ntiav tsev social housing thiab community housing txuag tau nqe hluav taws xob txog li ntawm $600 rau ib xyoos twg.
· Richies IGA tus coj hais tias Australia tej gorceries market tseem muaj peev xwm sib tw lagluam rau lub caij tej Supermarket industry raug iab liam tias txhob txwm nce nqe khoom kom kim.
· Ms Mary Donaldson tau ras los ua Denmark tus niam vam ntxwv tom qab tub huab tais Frederick tau ras los ua Denmark tus huab tais zum 10.
· Tej neeg txhawb nqa Taiwan pab nom Democratic Progressiv Party hais tias William Lai cov kev yeej kev sib tw los ua Taiwan tus president tshiab yog ib cov kev muaj yeej rau txoj kev tswj hwm democracy. Mr Lai los kuj tau cog lus tias yuav nrog xyuas kom pov txwv Taiwan tau txais kev ywj pheej thiab tsis lees paub Suav tuam tshoj cov kev aws tias Taiwan yog Suav ib nrim av.
· New Zealand tus tsoom fwv tsis lees paub ib cov kev tshuaj ntsuam ywj pheej uas nqua hu kom txho lub hnoob nyoog xaiv tsa nom tswv ua 16 xyoo, uas tej zaum yuav pab kom tsev tsoom fwv tau ua hauj lwm ntev zog, thiab tej zaum kuj yuav muaj qee cov kev pauv hloov rau New Zealand cov txheej txheem xaiv tsa, thiab cov kev pab nyiaj rau cov pab nom.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
