Raws li tau muaj ib co xov xwm tshiab qhia ces yeej tseem muaj tej neeg kawm tiav phab kho mob txawv teb chaws tej qualification yeej tsis tshua raug lees paub ntawm Australia. Ces thiaj tau muaj kev nqua hu kom tsoom fwv Australia thiab lub koom haum Australian Medical Council (AMC) nrog xyuas.
Tej neeg tsiv teb tsaws chaw uas tau kawm kho mob txawv teb chaws uas xav tuaj ua hauj lwm kho mob ntawm Australia yuav tau mus xeem ntawv Askiv thiab xeem AMC ob cov kev xeem uas tus nqe kim thiab xeem nyuaj heev.
Thiaj ua rau tus coj lub koom haum Bangladesh Medical Association of New South Wales tau qhai tias ''yeej muaj tej neeg tsiv teb tsaws chaw no coob heev ntsib teeb meem nyuaj rau lawv ntiag tug thiab lawv tsev neeg. Ua rau muaj tej neeg no coob heev nyuaj siab ntxhov plawv, tag kev cia siab rau cov kev xav kawm los yog ua cov hauj lwm kho mob no ntxiv lawm. Thiaj tsim nyog pab lawv kom lawv thiaj pab tau teb chaws Australia.''
Dr Ayaz Chowdhury uas yog tus teeb tsa lub koom haum Federation of Bangladesh Medical Societies of Australia thiaj xav kom ''tsoom fwv Australia tsim cov bridging course thiab workplace assessment pab tej neeg kawm kho mob no ua ntej lawv yuav mus xeem kom paub tias Australia cov system kho mob zoo li cas thaib kom xub pab Australia tej neeg uas twb nyob ntawm lub teb chaws no muaj peev xwm ua tau tej hauj lwm kho mob no.''
Raws li tau muaj cov kev txheeb txog Australia tej neeg ua hauj lwm kho mob tsis ntev los no ces pom tau tias muaj 860 kws kho mob yog cov xav tau kiag tam sim no ua kws kho mob thiab tseem xav tau tej kws kho mob tshaj 10,000 tus rau lub sij hawm 8 xyoo ntxiv tom ntej no.
Tsoom fwv teb chaws Australia thiaj tau cog lus tias yuav los pab kom ua tau tej hauj lwm no thiab yuav tshwm nyiaj $90 million los pab kom tej neeg kho mob txawv teb chaws muaj peev xwm tuaj ua tau tej hauj lwm no yooj yim ntawm teb chaws Australia.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcast. Download SBS Audio app thiab caum SBS Hmong pod follow.
