Ua lub neej zoo li cas ntawm teb chaws Australia
Maiv Yaj hais tias "It's hard (Nyuaj heev)".
Maiv Yaj hais tias nws los kuj yog ib tug me nyuam neeg thoj nam yug ntawm yeej thoj nam zos Vib Nais thiab tau tuaj rau Australia xyoo1990 thaum nws muaj hnoob nyoog ob xyoos, nyob tsis ntev ntawm Hobart ces kuj tsiv mus nyob ntawm Innisfail tau ntev loo ces mam txav chaw los nyob rau Brisbane lawm.
"Kuv yug nyob Ban Vinai Camp, kuv yog me nyuam Hmoob tawg rog nawb."
Mais hais tias ''Thaum me nyuam yaus ces yeej nyuaj heev nawb, rau qhov cov niam cov txiv Hmoob tawg rog tuaj ces yeej tsis txawj ntaub ntawv, tsis paub lus Askiv, tuaj nyob ua lub neej tshiab ntawm luab teb chaws xwb, ces txhua yam yeej txawv tshiab, lawv tsis paub dab tsi li, lawv tsuas paub coj yus mus teev npe kawm ntawv xwb. Dua ntawd lawv tsis paub pab yus ua homework li.
Qhov zoo ntawm kuv niam thiab kuv txiv nkawv no ces txawm nkawv tsis paub lus Askiv, tsis paub dab tsi tiam sis mas nkawv muaj lub zeem muag zoo rau peb lub neej pem suab, ces nkawv muaj nkawv tej lus rau rau siab txhawb peb, thiab nkawv kuj nrhiav kev pab rau peb sawv daws thiab yom.Maiv Yaj
Thaum tuaj txog Australia kawm ntawv zoo li cas
"Kuv niam coj peb mus ncig zos, kuv niam paub tias tus twg kawm tau zoo zog ces coj peb mus kom nws pab qhia, ces txij ntawd los peb thiaj kawm tau zoo zog lawm," raws li Maiv Yaj hais.
"Tsis muaj tus txawj hais lus Askiv li, yus loj ces yus yeej hais lus Hmoob xwb, ces yus mus kawm ntawv ces yus yeej tsis paub lus Askiv li thiab od! Yus mam xeem kawm, mam xeem hais lus Meskas (Askiv), yus twg loj mam paub mam hais ces yeej nyuaj heev. Yus communicate nrog lwm tsav neeg tej me nyuam yaus kawm ntawv ntawm yus chav yeej tseem nyuaj. Kuv twb kawm high school kuv tseem struggle, tseem find it hard to hais lus Meskas."
"Yus niam yus txiv yus pog yus yawg lawv tsis hais lus Meskas rau yus li thiab lawv pheej hais lus Hmoob rau yus xwb, thiab lawv tsis muaj kev pab rau yus ces yus hais lus Hmoob ntau xwb, kev kawm los lawv tsis paub pab yus ces yus kawm li yus kawm tau xwb ces yeej nyuaj nyuaj heev. Tiam sis mas kuj kuj ntau phooj ywg nrog luag lwm haiv neeg thiab ces, lawv kawm li cas los yus kuj qog lawv thiab, ces yus kuj tau me ntsis ntawm qhov ntawd los thiab, yus kuj siv lawv lub tswv yim thiab ces thiaj tau txij ntawd los."
Maiv Yaj thiab nws tsev neeg koom ua kev zoo siab rau nws tus nus Garry Yaj kawm tiav qib siab Credit: Garry Yang (Supplied)
Lub sij hawm ntawd kuv nco ntsoov peb cov Hmoob thaum peb kawm ntawv ntawd ces yeej tsis muaj tus kawm tau zoo npaum li luag lwm haiv neeg, rau qhov yus niam yus txiv thiab lub neej thaum ntawd yeej txawv tsis muaj kev pab li tam sim no.Mai Yaj
Vim li cas thiaj ua hauj lwm dental hygienist
"Lub sij hawm thaum ntawd ces kuv yeej yog tus hlob ntawm peb tsev neeg ces kuv tsis muaj lub zeem muag tias kuv lub neej kuv yuav ua dab tsi li, yus yog tus ntxhais thiab ces zoo li yus txoj kev npau suav yus tsis muaj mus deb yom."
"Kuv niam thiab kuv txiv lawv lub caij ntawd lawv yeej tseem txom nyem yeej pab tsis tau yus li tam sim no, ces yus ntshaw ntshaw nyiaj siv ces yus thiaj mus khwv, thaum ntawv kuv muaj 14 -15 xyoos kuv twb mus nrhiav hauj lwm ua lawm."
I think my work ethic came early.Maiv Yaj
"Kuv qhov work ethic no in a way good way that kuv piv ntxov, because txog tav no it is still in me that I believe it thiab niaj hnub no kuv yeej work hard, kuv feel li kuv twb comfortable kuv tsis need work lawm los kuv yeej tseem xav xav ua hauj lwm."
Studying to university is not the only way
"Kuv yuav kuv tus txiv thaum kuv kawm tag xyoo 12. Tiam sis kuv zoo siab tias wb ob leeg muaj zeem muag zoo tib yam. Wb sib sau ua neej ua ke tab sis wb muaj hom phiaj zoo ces wb kuj rau rau siab npaj wb lub neej."
"Kuv yuav nws ces kuv ho los kawm ntawv, nws kuj ho kawm thiab, thaum kuv yuav nws ces nws tseem kawm uni (university) ces kuv kuj ua hauj lwm txhawb nws, nws kawm tag ces kuv ho kawm ces nws ho txhawb kuv ces wb sib hloov sib pab li ntawd ces wb thiaj ua tau lub neej zoo li no."
Peb lub teb chaws Australia no yog tham txog cov kev kawm ntaub kawm ntawv nom tswv lawv pab zoo kawg nkaus nawb, yog yus xav kawm ces tsis nyuaj li od, yus rau rau siab kawm xwb. Yog yus xav kawm ces kuj kawm tau.Maiv Yaj
"Kuv kuj zoo siab tias lawv kuj muaj cov TAFE system rau yus kawm ua trade, kawm appreticeship ua lwm yam thiab kuj muaj tej sob kawm, Diploma los yog Advance Diploma, yog tias yus tsis mus kawm uni los kuj muaj ntau txoj xub ke pab yus kawm tau thiab es tsis yog ib qho nyuaj, yog yus rau siab ces yus yeej tau xwb."
Npaj lub neej pem suab
"Kuv xav tias tam sim no ces kuv thiab kuv tus txij nkawm wb yeej npaj txog rau theem uas ua tau raws wb siab xav lawm. Txij no mus ces wb tsuas xav tias wb yuav npaj li cas rau wb ob tug tub xwb, kom wb ob tug me nyuam tsis txhob muaj txoj kev txom nyem los txoj kev poob qab. Kom ib txheej no zoo zuj zus mus xwb."
Wb tsuas xav tias seb wb yuav pab wb tej me nyuam li cas kom lub neej tom ntej no es txawm tsis muaj wb lawm los kom lawv mus taus es kom lawv pab tau lawv mus taus es kom lawv pab tau lawv tej me tub me nyuam.Maiv Yaj
Maiv Yaj thiab nws tsev neeg Credit: Mai Yang (Supplied)
Life experience uas Maiv Yaj xav shares
Yus yuav tsum tau muaj qhov sacrifice. Yus xav xav tau ib qho dab tsi tam sim no los yus yuav tsum tau muab nws tuav cia, es yus focus on qhov tam sim no qhov yus xav xav tau. Thaum twg yus ua tau yus txoj kev npau suav lawm ces yus mam ho rov qab los peb tej uas yus tau muab ncua cia. Kuv xav tias peb cov me nyuam tam sim no yuav tsum tau muaj qhov sacrifice and peb thiaj caum cuag peb txoj kev npau suav.Maiv Yaj
Zeem muag yav pem suab
"Kuv kuj pom tau tias peb Hmoob peb kuj vam meej los deb lawm, lub neej tam sim no peb muaj vaj muaj tse, peb muaj teb ua, peb muaj lagluam, peb muaj cov tub ntxhais ua lagluam uas tseem hlua ua yeej muaj peev xwm lawm, peb yeej tsis txom nyem lawm, peb yeej txawv deb lawm, tshuav ib qhov peb qhib pib lub siab lawm, tab sis zoo li peb tseem qhib tsis tau tau tas rau lwm haiv neeg es welcome luag lwm haiv neeg. Qhov no yog ib qho uas peb yuav tsum tau nrog xyuas."
Piv txwv li yog peb noj peb caug los sis peb ua ib lub koom txoos dab tsi peb yeej tseem tsis tshua tau muaj kev sib cuag nrog lwm haiv neeg cov koom haum. Peb tsis tau qhib siab tias peb yuav muaj qhov caw los yog yuav welcome lawv tuaj koom peb. Peb pib lawm tiam siv kuv feel tias peb tseem tsis tau fully open.Maiv Yaj
"Peb tuaj tau 50 xyoo no peb kuj mus tau ib kauj ruam deb heev lawm, yeej zoo kawg nkaus lawm tiam si xav kom 10-20 xyoo tom ntej no peb yuav tsum tau qhib siab li lwm haiv neeg es starting connecting with luag lwm haiv neeg tej koom haum, welcome lawv koom peb thiab, lawv qhib lawv li los peb mus koom thiab, peb connect li no es kom peb tej tub hluas ntxhais hluas paub txog lwm haiv neeg thiab."
"Tsis tas li ntawd los kom lawv (Hmoob tej hluas) paub txog lawv caj ceg haiv neeg Hmoob tias zoo npaum li cas, rau qhov peb haiv neeg no it's very beautiful, tiam sis kuv mloog tau tias zoo li peb cov hluas tam sim no lawv tsis tshua paub lawv tej kab lis kev cai, thiab tsis paub lawv tej lus thiab tej ntawv lawm."
"Lus thiab ntawv mas kuv xav tias yeej muaj cov tsis tshua paub li lawm nawb, kuv kiag los sau ntawv Hmoob xwb kuv yeej tsis paub tag tag thiab. Kuv paub hais luv Hmoob, tab sis yog sau no kuv yeej tseem tsis tshua paub sau tas thiab."
Maiv Yaj, HCB's fund raiser and Dr Koobpheej Vaj, HCB's Education coordinator Credit: Mai Yang (Supplied)
Kuv xav tias peb cov hluas tam sim no lawv yeej struggle for sure. Yog ib qho uas peb tsis xav kom nws ploj nad! Rau qhov yog thaum plam ploj lawm ces, txhais tias peb Hmoob lub cim thawj (Hmong identity) nws yuav poj zuj zus tsis muaj lawm na! ces yog ib qho peb yuav tsum tau rau siab tiag tiag rau 50 xyoo ntxiv no kom peb cov me nyuam thiaj tuav tau peb tej kab lis kev cai txuas ntxiv.Maiv Yaj
"Kuv kuj zoo siab tias peb tuaj nyob teb chaws Australia tau 50 xyoo peb kuj hloov los deb lawm, yoog tau luag, peb yeej pauv deb, vam meej tuaj ntxiv, peb yeej ua tau zo heev lawm. Tsuas xav tias kom 50 xyoo tom ntej no kom peb ua kom zoo tshaj no ntxiv mus xwb, es kom peb tej me tub me nyuam los tseem paub tias lawv yog Hmoob no."
