Vwj thoj hais tias "Ntshe lawv (peb tej me nyuam/tej hluas) tsis txawj txuag xwb yog txawj txuag ces yeej yuav tau vaj tau tsev nyob xwb. Hos yog lawv tsis txawj txuag ces txawm lub caij twg los lawv yeej yuav tsis tau vaj tsis tau tsev nawb.
"Qhov tseem ceeb tshaj qhov ntawm peb swb mas - swb tib qho tias peb cov me nyuam tuaj txog tim no (Australia) ces cia li tuaj muaj kev lom zem li ub li no ces lawv tsis xav txog txoj kev txuag nyiaj txuag txiaj los yuav vaj yuav tsev los los tsim neej lawm. Lawv tsuas yog khwv los es khwv hnub no noj hnub no khwv tag kis noj tag kis xwb, ces lawv tsis xav txog qhov yuav txuag nyiaj los yuav vaj tse, ces qhov nod yog ib qho.
"Kuv pom tias peb yuav muaj teeb meem tom ntej mas yog los ntawm teeb meem ntiag tug xwb tsis yog tias lagluam tsis zoo los sis yog tsev nce nqe lawm ces ntshe yuav tsis tau tsev, vaj tse nce los yeej khwv tau nyiaj ntau tuaj ntxiv lawm thiab, yog lawv ua tiag ces yeej tau thiab.
" Kuv txuag nyiaj mas yeej yog ib yam tseem ceeb heev, sawv daws yuav tsum txuag nyiaj."
"Yog koj nyob tib qho chaw nkaus xwb ces zoo li koj tsis pom yam qub nkaus xwb, tsis pom kev hloov, tsis pom luag kev noj kev haus nyob sab tod seb zoo li cas."
"Kuv yeej xav kom sawv daws tsis txhob nyob hauv vaj hauv tsev, sawv daws mus ncig txawv teb chaws los tsis txhob mus qi muag nti, mus nrhiav kev lom zem rov qab los xwb ces tsis pom dab tsi li.
Peb Hmoob ces tsis hais cov nyob teb chaws Meskas, nyob Nplog los yog tuaj Australia tib yam nkaus, peb tuaj txog cov teb chaws vam meej no tab sis peb lub cev tuaj txog xwb peb lub siab tuaj tsis txog li. Peb yeej tsis pom tias luag kev vam meej nyob qhov twg li. Yog yus tsis pom luag lub tsev tsoom fwv thiab luag kev nom kev tswv tswj hwm ntiaj teb zoo li cas. Yus tsis paub tej no ces txhais tias yus lub cev tuaj txog xwb yus siab tseem tuaj tsis tau txog.Vue Thaow
Kuv xav kom sawv daws yeej meem mus ncig teb chaws kom pom luag tej kev vam meej no ib lub teb chaws txawv ib lub li cas, luag lub neej txawv yus lub li cas, kom yus kho yus lub neej los ntawm luag txoj kev yus mus pom luag lub neej thiab es tsis txhob niaj hnub nyob qe muag nti es yus yeej tsis pom kev vam meej li es txawm tuaj txog teb chaws Australia no los yus tseem coj yus tus cwj pwm qub nyob tim Nplog teb, tseem yog lub siab ntsws nyob Nplog teb, tseem ua plaub ntug li nyob Nplog teb, kab tshoob kev kos, ib siab ob qeg los tseem zoo li nyob Nplog teb yeej tsis hloov li, tej no tej zaum peb ua tsis tau li ntawd lawm.Vue Thaow
Yuav kom yus vam meej nrog luag ces yuav tsum rau rau siab kawm ntaub kawm ntawv kom yus muaj laj muaj kam ua siab kom yus pab tau luag lub teb lub chaw. Nco ntsoov tias yus tuaj txog lawm yus yuav tsum pab lub teb chaws npaum li qhov yus pab tau. Txoj kev yuav pab lub teb chaws no yog yus pab yus ua ntej. Yog yus tau zoo laj kam ua ces yus pab lub teb chaws no tib yam nkaus nawb. Lub teb chaws no luag ntshaw ntshaw neeg txawj neeg ntse, luag ntshaw ntshaw neeg paub tab luag thiaj pheej niaj hnub tos neeg txawv teb chaws tuaj.Vue Thaow
Peb cov muaj hmoo uas tau tuaj teb chaws no mas npaum nkaus li peb nce mus qaum ntuj nawb, thiab peb khwv npaum li cas peb thiaj tau tuaj, nej cov tuaj tom qab no nej tsis tau khwv ib qho dab tsi li los cia li tau tuaj tas vaj tas tsev tas niam tub txiv nyuag tas kwv tas tij tuaj txog tim teb chaws Australia no, tab sis tuaj txog tsis qhia me tub me nyuam mus kawm ntaub kawm ntawv, tau ib ob tiam neeg no los tseem zoo li qub, qhov no yog ib qho kev txhawj ntawm kuv tias peb puas yuav nyob tau nrog luag. Tsis tas li ntawd los txog thaum kawg luag puas yuav hlub peb.Vue Thaow
Kuv txhawj tias peb tsis muaj kev sib hlub, peb tsis muaj kev koom siab, peb tsis muaj ib hnub tias yog peb hnub noj peb caug uas qhia tau rau luag mab sua es peb yuav ua li cas peb thiaj ua tau ib tug Hmoob. Peb yeej coj peb tej kab lis kev cai kev coj noj coj ua coj los share rau luag thiab, kom peb coj haum nrog luag, qhia rau luag noj taus nyob taus uas ke. Peb muaj tej txuj zoo los peb tsis coj los siv, peb lam tau lam ua, tsis raug teb raug chaw tsis raug ntsej raug muag, loj tshaj plaws ntawm peb yog kev noj tsiab peb caug tsis muaj paus ntsis, koom noj tsis tau ua ib lub ua tib hnub, luag cia li saib tsis taus Hmoob li lawm, ces luag saib peb tsis muaj nqe dab tsi. Tsis yog luag txo peb hos peb cia li txo peb lub npe xwb nas.Vue Thaow
Mloog tau ntau zaj xov xwm thiab tej zaj lus ntxiv hauv qab no:
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page.
