Vim li cas thiaj kawm tej txuj tes taw Taekwondo
Ntsuab Pov Vaj qhia tias nws niam tau coj nws mus kawm xyoo 1988 thaum nws tseem kawm primary school, vim lub caij ntawd ces pheej muaj neeg thab ntaus yus, kom thiaj pov puag tau yus tus kheej. Mr Vaj kuj qhia txog qhov sib txawv ntawm ob co txuj tes taws Karate thiab Taekwondo tias txawv li cas.
Karate no mas koj lub cev yuav tsum ua hnyav hnyav, zoo li tsob ntoo kom yus nyob ruaj li cag ntoo txhos ruaj rau hauv av uas yus txav tsis tau thiab siv lub zog, hos Taekwondo mas ua kom yus lub cev sib sib, yus dhia plwb plaws, thiab nrawm nrawm.Ntsuab Pov Vaj
Rwm Thoj uas yog Ntsuab Pov Vaj tus tab zag hais tias ''Kuv yeej nyiam ntau yam sport li ntaus tis qaib (badminton) thiab ntau npas (volleyball) tab sis kuv tus txiv hais tias yeej zoo kawg tab sis yuav pab tsis tau yus tus kheej thaum muaj laib poun yus (muaj neeg phem ntau yus), ces xyoo 1999 ces nws thiaj coj kuv mus kawm tes taw thiab nws qhia kuv ces txij ntawd los wb thiaj kawm."
Nws kuj qhia tias "thaum nws kawm ces ho yug nws cov me nyuam ces kuj tso tseg tau 10 xyoo thiab mam li rov qab mus kawm ntxiv. Mloog tau tias yus laus lawm ces yus tes taw yeej txhav zog lawm thiab."
Qhov txawv ntawm cov kev kawm thiab qhia tes taw
Ntsuab Pov hais tias ''Thaum kuv tseem ua hauj lwm ntawm Euroa ces kuv cov phooj ywg hnov tias kuv txawj ces lawv kom kuv mus qhia, tab sis yeej muaj neeg tuaj sim ntsuas zog nrog yus seb yus puas txawj ntag od!"
Rwm hais tias ''Peb kawm no mas peb yeej xyaum ntau heev vim peb pheej mus sib tw thiab, hos thaum yus los qhia kiag lawm ces txawv lawm, yeej qhia lawv sib ntaus, thiab muaj ntau yam qhia, thiab qhia tej neeg kawm mus sib tw li cov kev sib ntaus thiab ntau cov kev sib tw raws cov patterns. Ces thaum sib tw ces yus yog tus coach ces yus yuav tau coach tej me nyuam mus sib tw thiab. Yuav tau kawm thiaj ua tau ib tug coach thiab."
Tau txiaj ntsim dab tsi ntawm cov kev kawm tes taw Taekwondo
Ntsuab Pov hais tias "Ua rau yus fit. Ua rau yus nquag, ua dab tsi los ua tau. Yus xaiv noj me ntsis kom yus tau txais kev noj qab haus huv. Yog yus haj yam txawj yus haj yam tsis confident lawm, vim tias muaj cov txawj tshaj yus lawm. Qhov pab tau yus tus kheej ces yus yeej ntseeg tias yus saib xyuas tau yus tus kheej lawm. Ces yus tsis thab plaub lawm, rau qhov yus niaj hnub mus sib ntaus lawm, ntaus ces mob nqaij xwb. Ces yus learn not to fight. Muaj neeg hais lus phem rau yus tom tej kev los yus uv taus. Thiab yog yus tau siv dub lawm ces yus yuav poob yus daim license thiab txim tseem loj tshaj tej neeg tsis txawj, vim lawv tias yus twb yog tus paub tab, tab sis yog ua self-defence xwb tsis ua li cas. Rwm: yog lawv ntaus yus ua ntej ces yus self-defence tau tsuas yog yus tsis txhob xub pib ntaus lwm tus ua ntej xwb."
Rwm hais tias ''Ntawm peb cov poj niam yog mus kawm tes taw ces yus mus ib qho qhov twg yus yeej muaj confidence me ntsis, yus mus ua dab tsi los yus yeej paub tias yus tiv thaiv pov puag tau yus tus kheej, yus lub cev yeej sib tshaj thiab, ua dab tsi los yooj yim me ntsis rau yus thiab."
Ntsuab pov hais tias "Qhov tseem ceeb mas yog thaum yus tej me nyuam mus txog siv dub ces lawv tshaj lij txaus lawm, yog tias yuav mus sib tw international los yog world champion ces tus me nyuam yuav tsum nyiam, nws yuav tsum muaj peev xwm nws tus kheej, nyiam tiag tiag, peb ua niam ua txiv peb tsuas pab xwb nawb, nws yuav tsum nyiam tiag tiag, yuav tsum ua tiag tiag, rau qhov tias mus rau level no ces keej heev lawm, lawv tuaj ntaus yus lawv tsis ntaus ua si lawm, lawv ntaus kom yus swb, ces yog tias yus tus me nyuam tsis nyiam ces txog theem no ces yus tsis txhob push nws tsam nws raug mob. Hos yog nws nyiam nws ntshaw mas nws mus tau nawb."
Ntsuab Pov hais tias ''Cov kev kawm txuj tes taw Taekwondo no pab kom yus tej me nyuam tau phooj ywg thiab tau kev lom zem rau nws tus kheej. Nws qhia rau yus tias yog yus xav tau dab tsi ces yus yuav tau rau rau siab. Yus tsis rau siab ces yus tsis nce qib thiab xub tsis yeej lwm tus. Qhov no qhia tus me nyuam tias yog nws ntshaw dab tsi, nws rau siab ces nws yuav tsum tau xwb."
Rwm hais tias "Kuv xav tias kawm lawm qhia kom lawv (yus tej me nyuam) coj zoo, tsis txhob mus thab plaub, paub tswj (control) lawv tus kheej, so it is good in a lot of different ways, it's good in self-defence, and also disciplincing as well. Thiab pab kom yus tus me nyuam sib ceev rub nws lub siab kom ua siab ntev thiab."
Lus fi rau tej niam txiv uas xav coj yus tej me nyuam mus kawm txuj tes taw Taekwondo
Rwm hais tias ''Yuav tsum yog yus tus me nyuam nyiam ua ntej mas yus coj mus kawm nws thiaj nyiam thiab thiaj xav kawm."
Ntsuab Pov hais tias"Kuv tus tub hlob nws yog cov neeg introvert uas muaj dab tsi los khaws cia rau nws tus kheej, tsis xav hais lus siab rau leej twg, nws tsis tshua hais lus, muaj dab tsis los khaws cia rau ntawm nws tus kheej xwb tsis qhia lwm tus, nws chim chim los nws tsis xav ua dab tsi kom yus tu siab, ces kuv thiaj coj nws mus kawm kom nws express tau nws tus kheej, nws thiaj muaj confidence thiab nws thiaj control tau nws tus kheej. Yog kuv tsis coj mus kawm ces ntshe tam sim no kiag kuv tus tub hlob yeej tsis hais lus li od! Nyob twj ywm xwb, hais lus tsawg tsawg heev. Tab sis tam sim no ces nws tham tham lawm thiab muaj confidence lawm."
Rwm hais tias ''Yog tej niam txiv uas muaj tej me nyuam uas pheej txaj txaj muag, yus coj mus qhov twg los tsis kam mus, ces yus yog niam yog txiv ces yus yuav tau nug thiab nrhiav tej yam uas yus tus me nyuam nyiam ces coj nws mus ua yam nws nyiam ntawd. Kom lawv xyaum mus koom, poo socialise nrog lwm tus, kom tau kev phooj ywg.''
Koj yuav tsum qhia koj cov me nyuam kom lawv tsis txhob txaj muag, ces lawv ua dab tsi los lawv thiaj ua tau. Vim yog tias lawv txaj txaj muag ces lawv ua dab tsi los zoo li lawv tsis muaj confidence mus ua.Rwm Thoj
Ntsuab pov hais tias ''Yog koj nyiam li wb ua no ces yus yeej invest rau yus cov me nyuam, yus yeej tsis muaj nyiaj nawb, rau qhov yus yeej muab yus tej nyiaj mus siv rau yus tej me nyuam, siv lawm tsheej pob, vim cov kev mus competition, mus training ces nyiaj txiaj xwb. Ces yus yeej khaws tsis tshua tau nyiaj.
"Ces yog yus xav xa yus tus me nyuam mus koom ib yam sports twg tsis hais soccer (ncaws pob) los yog Taekwondo, yog yus xav tias tsuas coj mus ua hnub no xwb tag kis tsis coj mus lawm no ces nkim sij hawm xwb nawb.
"Yus ua niam ua txiv yuav tsum txiav txim siab tias seb yus puas commit tias raug npaum li cas los yus txhawb yus tus me nyuam mus ua. Li kuv hais ua qhov no tab sis tsis pub ua qhov tom no, yog koj tias koj txiav txim siab cia yus tej me nyuam ua lawm no ces, ua tag nrho mas nws thiaj li tsis xiam."
Rwm hais tias ''Hais ncaj ncaj yom, peb cov poj niam Hmoob ces yeej tsis tshua muaj cov kawm, cov kawm tam sim no li phaum hluas tam sim no mas kuv tsis paub, tab sis li kuv phaum ces yeej tsis muaj thiab. Peb cov poj niam Hmoob no mas lawv pheej xav tias yog yus muaj neej lawm ces yus los ua ib tug niam tsev los tu me nyuam lawm xwb,
"Tab sis mas kuv yeej xav txhawb nqa peb tej poj niam Hmoob tias txawm lawv muaj txiv los yog tias lawv tus txiv txhawb nqa thiab kam, ces kuv xav txhawb nqa kom cia lawv cov poj niam nyiam dab tsi los kav liam, cia lawv mus kawm ua ib yam dab tsi kom lawv tej poj niam ntawd muaj kev kawm rau sab nrauv thiab, es peb cov poj niam Hmoob xav tau txais kev txhawb pab ntawm peb tej txiv los pab peb. Vim yog tus txiv pab lawv ces lawv yeej mus taus thiab tsis li ntawd ces yog tus txiv tsis support ces tseev tus poj niam nyiam los yeej mus tsis tau nawb. Kuv mas kuv ho lucky tias kuv tus txiv nyiam ces nws support kuv ces kuv ua tau.
"Hais ncaj ncas tias kuv ua Taekwondo no mas tsis yog tias mus kawm es rov qab los tsev xwb nawb. Kawm siab lawm ces yeej travel thiab. Ces kuv tus txiv yeej muaj siab loj siab dav tias yog kuv tseem mus nrog peb pab es kawm qhia tes taw ntawd thiab peb cov instructors ntawd mus txawm nroog los kuv yeej mus kuv li nws yeej tsis hais, nws yeej siab loj nawb, ces koj tus txiv los yuav tsum siab loj li ntawd thiab. Kuv mus kuv lawm, yog nws tsis mus los kuv coj kuv cov me nyuam mus li lawm. Hos txawm kuv cov me nyuam tsis mus es kuv mus kuv xwb los kuv yeej lawm kuv li thiab. Vim yog txog theem tias yus yuav mus sib tw lawm, ces yus yuav tsum hais tias kuv tus txiv kam ces kuv mus lawm xwb ces koj thiaj ua tau, hos yog koj tus txiv tsis support koj ces koj yeej ua tsis tau li nawb."
Rwm hais ntxiv tias ''Peb kawm Taekwondo no ces koj kawm tag ces tsis yog tag li lawm xwb, yeej muaj lwm yam rau yus kawm thiab li kawm mus ua referee, ces yus los ua coach qhia los tau thiab."
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page.
