Tsis hais yuav yog txoj kev kawm txog kev sib daj deev, poj niam nyiam poj niam txiv neej nyiam txiv neej, poj niam thiab txiv neej, tej neeg lub cim thawj (identity) tseem yog ib cov sob lus uas muaj kev cov nyom heev thiab yeej tsis tham txog li hauv Hmoob tej neeg zejzog raws li Dr. Brian V. Xiong ntawm lub txhooj faj lem (Tsev kawm qib siab) Minnesota State University tau los teeb txheeb txog.
Dr. Xiong tau hais tias Hmoob tej zejzog yeej tsis tshua tham txog cov kev sib daj dee tsis hais yuav tham txog tias seb yuav sib deev li cas kom tsis txhob muaj me nyuam los yog tsis txhob kis tej kab mob los ntawm txoj kev sib deev li, los yog yeej tsis tham txog cov neeg LGBTQI cov teeb meem cuam tshuam txog lawv li. Yog li no thiaj ua rau lawv tsis totaub zoo txog tej hais no li.
Hmoob tsuas paub thiab pom cov neeg gay thiab lesbian thaum tseem nyob Thaib teb hu ua "Kab thaw" uas yog ib lo lus piav qhia txog cov neeg uas yog txiv neej tab sis hais lus thiab coj tus cwj pwm zoo li poj niam rau lub caij Hmoob khiav tim nplog los nyob rau Thaib teb ntawd xwb.
Tab sis Dr. Xyooj hais tias cov neeg gay thiab lesbian yeej txawv qhov hais ntawd. Lawv yeej zoo li tej poj niam los sis tej txiv neej li peb pom uas yeej sib yuav ua txwj nkawm nrog tau nrog poj niam los yog txiv neej uas muaj tau tub ki tib yam, tab sis lawv yeej tsis muaj chaw sov siab zoo siab npaum li thaum lawv tau hlub tau yuav thiab tau nyob nrog cov txiv neej li lawv los yog cov poj niam li lawv.
Cov neeg gay thiab lesbian yeej yug los zoo li no. Thiaj li tsim nyog peb yuav tau cam hwm thiab lees paub tias lawv yeej zoo li ntawd thiab lees paub lawv txoj kev ua lub neej. Tsis tsim nyog tej ua niam ua txiv los yog Hmoob tej neeg zejzog yuav muab lawv tej me nyuam los yog muab lawv cov tub koom siab txiav tu nrho tsis xav yuav lawv tsis xav lees paub los yog tsis txhob faib cai ntxub ntxaug tsis nyiam lawv." "Ntxiv ntawd los nws tseem xav xa ib tsab xo rau Hmoob cov neeg LGBTQI tias lub sij hawm yog lawv li, lub neej yog lawv lub, lawv yog tus paub lawv tus kheej zoo tshaj lwm tus, tsim nyog lawv yuav tsum zoo siab thiab kub siab los ua lawv lub neej raws li lawv txoj kev ntshaw yam tsis tas yuav kub siab txog lwm tus txoj kev txwv tsis pom zoo.Dr Brian V. Xiong
Hmong LGBTQI issues and LGBTQI marching at Trump tower, Washington DC - Courtesy of Dr. Brian V. Xiong, Ted Eyton - Wikimedia Commons - CC BY-SA 2.0 Source: Wikimedia Commons, Courtesy of Dr. Brian V. Xiong
Dr. Brian Va Tou Xiong thiaj qhia tias yeej tau muaj Hmoob ib txhia cuab yim neeg ua siab los lees paub thiab hlub lawv tej me nyuam uas yog cov neeg gay thiab lesbiane. Tab sis tseem muaj ib txhia tau mus coj kev cai tshiab los lawv phau vaj luj kub yeej tseem tsis lees paub cov neeg ua txiv neej nyiam txiv neej los yog poj niam nyiam poj niam thiab sib yuav ua txwj nkawm vim lawv ntseeg tias yog ib cov kev npam.
Lub koom haum Hmoob 18 xeem uas sawv cev rau Hmoob tej neeg zejzog thiab Hmoob tej zejzog los yeej tsis tau tawm los hais meej tseeb kiag tias yuav pom zoo txhawb nqa cov eneg no sib yuav ua txwj nkawm los yog sib hlub sib tham tau. Ntawm 18 xeem kiag los yeej tseem tsis tau tsim cai meej tseg tias yog muaj cov neeg no sib yuav ne yuav ua tshoob kos li cas thiab.
Yog li no, Dr. Xiong thiaj xav hais rau Hmoob tsoom niam tsoom txiv thiab Hmoob tej neeg zejzog tias kom yuav tsum lees paub thiab lees txais cov neeg no thiab tsis txhob faib cai lawv li America cov kev faib cai cov neeg dub li keeb kwm tau muaj dhau los lawm.
Kevin Kab Yeeb Xyooj uas yog ib tug hluas LGBTQI ntawm St Paul Minnesota yeej tau qhia tias:
Kuv ntshai tsam kuv tsev neeg tsis xav yuav kub nos sis muab kuv nrauj pov tseg los yog tsis hlub kuv lawm ces Kuv thiaj tos txog thaum nws muaj hnoob nyoo 22 xyoos lawm es nws mam li qhia rau nws niam paub tias kuv yog gay, ces kuv niam wb thiaj muaj kev dub muag txog 1 lub xyoo. Tab sis kuv kuj tau ua tib zoo hais rau kuv niam tias kom kuv niam lees paub thiab hlub kuv vim kuv yeej yug los zoo li no thiab kuv txawm zoo li cas los kuv yeej tseem yog kuv niam tus tub. Vim tsis yog tias kuv xav xav los ua cov neeg LGBTQI vim kuv yeej yug los li no thiab xaiv tsis tau lawm.
