Sarah Thoj kuj yog ib tug ua hauj lwm ntawm Logan City Council thiab nws yog tus koom nrog tus nom tswv zos no los ua lub koom txoos qhia txog Hmoob tej kab lis kev cai ntawm Brisbane uas yuav ua rau hnub tim hnub zwj Cag (Saturday) zwj thaj tim 7 lub 3 hlis ntuj xyoo 2026 sij hawm 10am - 3pm.
Qhia kom tej zejzog paub txog tsav neeg Hmoob, Hmoob tej kab lis kev cai, Hmoob tej hno, Hmoob tej tsoos, thiab kom paub txog thiab nug txog tias Hmoob yog leej twg.Sarah Thao, Hmong Brisbane Festival organiser
Sarah hais tias 'ua lub koom txoos no yog ua coj los pab ntxiv rau lub caij qhia txog Hmoob tej keeb kwm tau 6 hli ntawm Living Museum of Logan.'
Nws qhia tias 'yuav muaj ntau cov workshops xws li kawm seev cev, xaws paj ntaub, kawm hnav khaub ncaws Hmoob, kawm lus Hmoob, kawm txog Hmoob kab lis kev cai, kos duab thiab pleev xim, muaj tej tub ntxhais paj nruag hu nkauj, ntxhais seev cev, tub ntxhais hnav tsoos zam fashion, dhia hlua.'
'Council hais tias lawv xav ua lub tshav puam no rau Hmoob xwb, kom Hmoob tswj, npaj tej khoom noj, tswj tej workshops, muag khoom, thiab xav kom Hmoob ua xwb kom sawv cev rau Hmoob tej kab lis kev cai, tiam sis lawv yeej yaum kom lwm haiv neeg tuaj koom kom thiaj paub thiab pom txog Hmoob. Thiab yeej muaj tej koom txoos no sab hauv Living Museum Logan thiab ntawm lub tshav puam no rau Hmoob siv.'
Yog tias tej neeg tuaj saib tuaj koom peb lub koom txoos no es lawv rov qab mus tsev es lawv paub me ntsis txog Hmoob kab lis kev cai ces peb kuj zoo siab tias peb ua tau peb cov hom phiaj zoo lawm.Sarah Thao, Hmong Brisbane Festival organiser
Sarah Thoj hais tias 'Kuv xav mas tam sim no lwm haiv neeg yeej kub siab heev txog Hmoob lawm, lawv paub thiab pom txog Hmoob me ntsis lawm, tam sim no lawv xav tuaj coob, lawv xav paub tias Hmoob yog leej twg thiab lawv cov kab lis kev cai zoo li cas.'
'Lawv nyiam Hmoob cov khaub ncaws, lawv tuaj txog mas lawv hais tias cov khaub ncaws mas ua cas yuav tshiab ua luaj, cas yuav zoo nkauj ua luaj es lawv xav paub txog.'
Kuv xav kom Hmoob rau siab kawm kom paub txog Hmoob kab lis kev cai, xaws yus tej tsoos, thiab qhia txog tias yus yog Hmoob thiab txaus siab zoo siab ua ib tug Hmoob.Sarah Thao, Hmong Brisbane Festival organiser
Sarah hais tias 'Peb yeej yaum kom Hmoob sawv daws mus koom thiab pab txhawb lub koom txoos no, mus tham txog Hmoob, mus ntsib nrog neeg Australia, mus tham qhia rau lawv tias yus yog neeg Hmoob, mus qhia thiab piav txog yus tej dab neeg, thiab yus tej kab lis kev cai rau lwm haiv neeg kom paub txog Hmoob.'
Nws kuj qhia ntxiv tias 'tom ntej tej zaum peb kuj yuav caw tej tub ntxhais hluas los kawm xyaum xaws paj ntaub thiab los xyaum qhia tej neeg seev cev thiab.'
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page.
