Ntxawm Muas yog ib tug ntxhais Hmoob dawb uas hais lus zoo tib yam li cov Hmoob nyob ntawm ntau cov teb chaws sab hnub poob (Meskas, Canada, Fabkis, Australia etc) thiab nws nyob ntawm Paj tawg Lag, teb chaws Suav.
Nws hais tias Hmoob yeej nquam hauv toj thiab tsa hauv toj (noj tsiab peb caug thiab tse ncej ntxheb ncej ntxhoo) txhua xyoo tab sis ua tib lub caij li Suav lub xyoo tshiab.
Qhov sib txawv ntawm Hmoob Suav lub tsiab peb caug ces yog tsis pov pob tab sis xaws mom pob ncaws siab siab rau saum ntuj thiab ua ntau yam li lwm cov Hmoob thoob ntiaj teb ua, tsis hais xaiv ntxhais nkauj ntsuab, txeeg txuj paj nruag, hais kwv txhiaj, paj huam, ntau tuj lub, dhia qeej, tso nyuj sib nraus etc.
Ntxawm hais tias muaj 4 yam laj thawj (reasons) tos ho tsa tus ncej ntxheb ncej ntxhoo:
I. Fi pob koob yawm koob, Hmoob txiv yawg thiab tej tub rog txheej thaum ub.
Ntxawm Muas hais tias "Thaum ub lub chiv keeb ntawm cov kev tsa ncej ntxheb ncej txhoo yog ua lo txi rau Hmoob tej poj yawm txwv txoob thiab Hmoob txiv yawg thiab txi cov tub rog uas nruam sim lawm."
"Raws li tej laus piv dab neeg, tej nkauj los yog cov zaj qeej ces yeej tau hais tias thaum ub Hmoob nyob qaum teb, Hmoob txiv yawg thiab nws tej tub rog nyob tom qab thaiv kom Hmoob khiav los hla dej dag thaum sib ntaus sib tua nrog Suav. Ces Hmoob thiaj muaj tub ki tom qab kom tsis txhob tu noob."
"Thaum ub mas tsa hauv toj yeej tsa nyob saum ib ntav roob, nyob kiag saum lub toj, ces Hmoob paub tias tsa tus ncej ntxheb ncej ntxhoo lawm ces sawv daws rov qab mus sab laj seb Hmoob yuav ua li cas, los yog kom sawv daws tau rov qab mus sib ntsib sib pom thaum mus rau ntawm lub tshav toj."
II. Siv ntoo thuv thiab ciab tsa ua ncej ntxheb ncej ntxoos kom Hmoob tsis txhob ciaj noob
Ntawm hais tias "To pheej siv tsob ntoo thuv thiab ntoo ciab uas tsis pub txiav ntsis los tsa ua ncej ntxheb ncej ntxhoo los lub ntsiab lus tiag yog xav kom tom qab txuas ntxiv tuaj Hmoob muaj tub muaj ki tsis poob noob."
III. Muab ncej ntxheb ncej ntxhoo ua txaj pw kom muaj me nyuam
"Yog tias ib nkawm niam txiv twg sib yuav ua txij nkawm tau ntau xyoo tab sis pheej tsis muaj me nyuam ces nkawv kuj tsa toj rau sawv daws tuaj nquam, thiab yog tus pov plob txhua yam, tom qab dhau toj (ua lub hauv toj dhau mus lawm) ces mam li mus tus ncej ntxheb ncej ntxoo coj los txua ua lub txaj rau nkawm niam txiv ntawd pw kom thiaj muaj me nyuam."
IV. Tsha ncej ntxheb ncej ntxhoo thov tub ki
Ntxawm ais tias "Thaum nqaum toj dhau ...ua tsiab peb caug dhau mus lawm ... ces tej txij nkawm uas tsis muaj tub kis mus de tej txiv thuv txiv ciab coj mus tso rau ntawm qab hauv ncoo ces ntseeg tias yuav pab kom lawv muaj tub ki."
V. Cov kev tsa hauv toj (Noj tsiab peb caug) yog ib cov kev qhia txog Hmoob tej kab lis kev cai rau lawm haiv neeg
Ntxawm hais tias "Tam sim no ces yeej muaj lwm haiv neeg tuaj koom Hmoob lub hauv toj thiab, lub hauv toj yog ib qho chaw qhia tias Hmoob cov culture yog li cas, thiab kom sawv daws tau tuaj ua lagluam."
VI. siv tej ntaub liab khi ntawm tus ncej ntxheb ncej ntxoo khi rau tus me nyuam muaj mob kom xis neej
Nws hais tias ''Hmoob yeej muaj ib co kab lis kev cai uas yuav tau siv ntaub liab khi rau tus ncej ntxheb ncej ntxhoo ntawm lub haiv toj, ces yog tej laus paub ces lawv mam nqa lawv ib txoj ntaub liab tuaj pauv tus tswv tsa hauv toj ib txoj ntaub liab coj mus khi rau lawv tus me nyuam uas pheej muaj muaj mob tsis xis neej ntawd txhais tes kom zoo."
Ntxawm Muas kuj hais ntxiv tias tsam no ces yeej muaj lwm haiv neeg ua tus tswv cuab tswj Hmoob lub hauv toj thiab yeej ua Hmoob tej kab lis kev cai xyaw rau hauv thiab. Tab sis qhov tseem ceeb nws xav hais rau ib tsoom Hmoob sawv daws yog khaws Hmoob tej kab lis kev cai thiab qhia ntawv/lus Hmoob rau Hmoob tej me nyuam kom paub. Vim tam sim no ces Hmoob tej me nyuam yeej hu niam thiab txiv raws lus mas lus sua piv txwv li Phob (ພໍ່) los yog Meb (ແມ່) los sis cov nyob Suav teb chaws pheej hu raws li Suav hu niam tias mama (母母) los yog hu txiv ua papa (父父) lawm xwb.
Xav kom txhua txhua lub teb chaws muaj Hmoob nyob muab Hmoob tej kab lis kev cau (culture), los sis Hmoob tej lus saib tseem ceeb me ntsis. Ho qhia yus tej me nyuam hais lus Hmoob thiab qhia kom lawv paub tias Hmoob tej culture ho muaj dab tsi thiab ua li cas rau yus tej me nyuam thiab.Ntxawm Muas xav lo lus rau ib tsoom Hmoob thoob ntuj
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page.
