Raws li tau muaj ib cov xov xwm tshiab qhia ces kuj txheeb tau tias tau muaj tej cuab yig ntau tshaj tej neeg ntiag tug tau mus qev tsoom fwv ib co program uas qev nyiaj rau neeg Australia siv yam tsis tau them paj tsaib no.
Thiab tej nyiaj uas qev los siv no ces feem ntau coj mus yuav tej khoom siv tseem ceeb hauv ib tse neeg twg uas khwv tau nyiaj hauj lwm ib xyoos twg tsawg dua $70,000 li tub tsaus txias, siv them nqe kho mob, yuav TV, tshuab ntxhua khaub ncaws, computers, tablets, siv rau tej tsheb, siv them nqe public transports los yog siv ua bonds zoj kom ntiav tau tsev nyob.
Tsoom fwv cov program qev nyiaj rau tej neeg siv yam tsis tau them paj no ces yog tau txais kev koom tes ntawm lub txhab nyiaj National Australia Bank nrog lub koom haum NGO hu ua Good Shepherd uas muaj qev raws tej koom haum pab cuam zejzog thoob teb chaws Australia rau tej neeg siv.
Tej neeg muaj peev xwm qev tau txij li ntawm $2,000 coj mus yuav tej khoom tseem ceeb siv hauv ib tse neeg twg los yog qev $3,000 coj mus siv zoj ua bonds kom ntiav tau tsev nyob, thiab mam li maj mam them rov qab kom them tag yam tsis tau them paj dab tsi.
Tsis tas li ntawd los lub koom haum Good Shepherd kuj tau qhia ntxiv tias tej neeg uas tsiv tawm ntawm tej teeb meem kub ntxhov hauv lub cuab yig los yeej muaj peev xwm qev tau tej nyiaj no siv yam tsis tas yuav muaj lwm yam eligibility criteria uas yuav tau ua raws thiab.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook
, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
