Tau muaj xov xwm qhia tias tam sim no tseem muaj neeg noj tshuaj qaug thiab tuag coob tshaj tej xwm txheej tsheb sib tsoo tuag tom kev thiab siv tej tshuaj noj kom tsis txhob mob ib ce ntau tshaj cov kev siv heroin ntawm Australia no lawm thiab.
Yog li ntawd txij lu xyoo 2020 los lub koom haum Therapeutic Goods Administration (TGA) thiaj li tau los tsim ib cov cai nruj tuaj ntxiv los tswj tej kws kho mob cov kev sau tej tshuaj noj kom tsis txhob mob ib ce uas muaj yeeb xyaw kom sau tsawg rau tej neeg mob, li muag cov tshuaj no kom tsawg ntsiav, thiab sau ntawv mus qhia tag rnho tej kws kho mob tias nws yuav soj seb tej kws kho mob sau tej tshuaj no rau leej twg noj.
Ces thiaj tau muaj ib tug kis ntawm Australia lub tuam chav tswj dej num noj qab haus huv teb chaws qhia rau SBS tias TGA cov kev txwv no kuj pib siv tau hauj lwm zoo lawm. Li 'ua rau muaj tej neeg raug mob thiab tas sim neej los ntawm cov kev noj tej tshuaj tswj mob no tsawg lawm.'
Tab sis yeej tseem muaj ib txhia hais tias cov tswj cov kev siv tej tshuaj no nruj tau ua rau muaj tej neeg tig mus yuav tej tshuaj no ntawm tej kiab khw muag txhaum cai ntau tuaj ntxiv, vim lawv yuav tau tsawg los yog raug txwv yuav tsis tau nrog Pharmaceutical Benefits Scheme (PBS) lawm.
John Ryan uas yog tus coj lub chaw teeb txheeb Penington Institute uas tau sau tsab ntawv cej luam txog tej neeg noj tshuaj ntau heev uas tas sim neej xyoo 2023 hais tias 'tej kws kho mob txhawj heev, vim muaj ntau yam pauv hloov rau lub sij hawm 10-15 xyoos los no..yog li thiaj yuav tau xyuas kom muaj kev sib raug zoo thiab kev sib ntseeg siab nrog tej neeg mob kom los tswj tau cov kev mob no ..vim cov kev tswj uas tsis ua tib zoo los xyuas seb tej neeg xav tau tej tshuaj no siv li cas kuj yog tej yam tsis tsim nyog thiab.'
Thiab raws li tsoom fwv tsab ntawv cej luam End Gender Bias Survey uas tau teeb txheeb nrog tej poj niam ntau tshaj 2,500 tus ces kuj txheeb tau tias tej poj niam tseem ntsib teeb meem rau cov kev siv Australia cov health system. Uas tej poj niam puas cev thiab tej neeg LGBTQI+ thiab tej neeg puas cev yog cov neeg uas tsis muaj peev xwm siv tau cov health system ntau tuaj ntxiv txog li 80 feem pua.
Yog li Kate Sear uas yog ib tug zeskasi ntawm lub chaw teeb txheeb Australian Research Centre in Sex, Health and Society tsev kawm qib siab La Trobe University thiab yog tus Deputy Chair of the Victorian Pain Inquiry qhia tias, ''Tej kev mob ntev no tau ua rau muaj 2 tug ntawm 5 tug pom niam tsis tau txais kev noj qab nyob zoo. Yog li thiaj xav kom txheeb tej neeg no tej hnoob nyoog sib txawv, sexuality thiab seb lawv yog tsav neeg twg thiab cov neeg pawg tsawg twg es mam li tsim cov kev taw qhia los pab kom tau txais kev pab cuam raws li tej poj niam no xav tau siv.''
Txawm li cas los tsis yog tib cov kev raug cais nkaus xwb thiab. Dr McMullen hais tias kom tsim lwm cov kev kho tej mob uas mob ntev no thiab li muaj cov kev sab laj daws kev nyuaj siab, cov exercise physiologist, thiab cov physiotherapists uas pab kom tej neeg zoo.
Txawm li cas los Susi Tegen ntawm lub koom haum National Rural Health Alliance hais tias tej neg mob yeej tsis muaj peev xwm siv tau cov kev kho mob yog tias lawv tsis muaj peev xwm mus txog ntawm chaw kho mob los yog tsis muaj nyiaj siv cov kev kho mob, 'vim tej nyiaj medicare los yog grants ntawd yeej tau tsis txaus coj los tswj tej chaw kho mob kom pab tsim tau tej kev kho mob txaus rau tej neeg mob nyob yaj sab siv. Thiaj xav kom tsoom fwv paj nyiaj rau nws cov nyiaj puag xyoo tshiab tom ntej no rau cov kev kho mob yaj sab kom ntau tuaj ntxiv.
Vim nws hais tias ib xyoos twg tseem pab nyiaj tswg dua 6.55 billion rau tej yaj sab.
Ms Tegen hais tias 'yeej siv nyiaj tsawg heev rau cov kev kho mob yaj sab. Tsis muaj neeg ua hauj lwm kho mob txaus li ces thiaj ua rau muaj neeg tas sim neej ntau dua. Thiab ua rau tej neeg nyob yaj sab muaj mob ntau dua tej neg nroog txog li 1.4 npaug.'
Guilia Jones ntawm lub koom haum Pain Australia thiaj hais tias xav kom peb cais cov kws sau tshuaj siv thiab lwm cov kev kho mob los tswj tej mob no nyias cais nyias, 'vim tej kws tshuaj cov kev sau tshuaj noj no nkaus xwb yeej tsis muaj peev xwm yuav tswj tau tej mob uas mob ntev no thiab tsuas yog ib feem ntawm lwm cov kev kho mob ntau yam rau tej neeg mob siv xwb.'
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
