Lub hom phiaj ntawm ntawm Australia tus thawj pwm tav Anthony Albanese mus xyuas teb chaws suav ntawd ces nws kuj tau sab laj sib tham txog ntau yam li leej tib neeg txoj cai, tej xwm txheej tsis haum xeeb cuam tshuam txog Taiwan thiab Australia tej khoom lagluam xa muag rau Suav tuam tshoj raug nyiaj txog $20 billion uas tseem raug Suav tsub se lagluam kim. Australia tej khoom lagluam raug tsub se kim ces yog nqaij nyuj, cawv txiv, lobsters, zib muv Manuka Honey, noob qoob barley thiab roj zeb ntsuam, tooj etc,..
Txawm li cas los tom qab uas nws tau ntsib Suav tus coj Xi Jinping thiab nom tswv Suav lawm, ces nws kuj hais tias cov kev mus xyuas zaum no ''tham tau zoo raws li siab xav''. Vim nws hais tias yog ib co hauj lwm tseem ceeb rov qab kho kho muaj kev sib raug zoo nom tswv ntawm Australia thiab Suav tuam tshoj. Tam sim no los Australia tsuas raug Suav tsub se lagluam raug nyiaj $2 billion lawm xwb.
Australia tus coj los kuj raug Suav tus coj qhuas tias kub siab nrog xyuas kom kho tau kev sib raug zoo ntawm Australia thiab Suav kom thiaj li ''muaj cov kev koom tes ntawm ob tog txuas ntxiv.''
Mr Albanese tau hais tias ''Yog tej yam yuav pab kom tau txais txiaj ntsim rau ob tog li Australia thiab Suav thiab Australia yeej yuav tsis pom zoo nrog tej yam dab tsis ua nws tsis pom zoo. Australia los yeej yuav qhia ncaj qha tias nws ua dab tsi rau lwm tus paub. Thiab peb ob lub teb chaws los nyiaj yeej muaj nyias cov kev tswj hwm txawv thiab muaj tej kev coj taug ua zoo txawv."
Beijing yeej tsis pom zoo nrog Australia cov kev pom zoo AUKUS nrog Meskas thiab Aaskiv vim nws txhawj tias tsam ua rau tsis muaj neeg ua raws li zejzog pej kum haiv cov kev txwv tsis pub tsim riam phom nuclear.
Tom qab nws tau ntsib Suav tus President lawm ces nws kuj mus ncig xyuas lub tsev teev hawm ntawm Beijing nrog Australia tus nom txawv teb chaws Penny Wong ua ntej nws yuav raug caw mus koom lub koom txoos tos txais nws ntawm Suav tus thawj pwm tsav Li Qiang ntawm tsev tsoom fwv Suav rau hnub kawg ntawm nws cov kev mus xyaus teb chaws Suav tuam tshoj.
Tom qab ntawd ces nws kuj tau mus koom lub rooj sab laj PIF (Pacific Islands Forum) nrog tej coj ntawm Pacific nations tham txog kev ruaj ntseg ntawm cheeb tsam no, huab cua pauv hloov thiab riam phom nuclear.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
