Tau muaj ib cov kws teeb txheeb ntawm lub chaw teeb txheeb Murdoch Chindren's Research Institute (MCRI) tau tsim tau thawj cov kev taw qhia tshiab coj los pab tu tej me ab yug tau tshiab uas yug ntxov tshaj lub caij tsim nyog yug thiab tej leej niam kom tau txais kev noj qab nyob zoo tshaj qub ntxiv. Ces thiaj li yuav siv tej kev taw qhia no txij thaum lawv tawm ntawm tsev kho mob mus txog thaum lawv muaj hnoob nyoog 6 xyoo.
Tej kws paub zoo txog tej hauj lwm no hais tias tej tswv yim no yuav pab daws tau ntau yam kev pab cuam uas tseem tu ncua, yuav pab kom muaj teeb meem cuam tshuam tsawg rau tus me nyuam ntawd cov kev loj hlob, kev noj qab haus huv thiab nws cov kev txhim kho.
Ib xyoos twg ces yeej muaj tej me ab yug tau tshiab tshaj 3,500 tus uas yug ntxov tshaj lub caij tsim nyog yug ntawm teb chaws Australia no. Thiab yeej muaj tej me nyuam no txog li ntawm 60 feem pua yog cov yuav ntsib teeb meem rau lawv cov kev loj hlob, kev noj qab nyob zoo thiab kev txhim kho yog piv rau tej me nyuam txog caij yug mam li yug.
Professor Jeanie Cheong uas yog tus coj pawg neeg teeb txheeb txog tej me nyuam mos liab lub paj hlwb (Victorian Infant Brain Studies) ntawm lub ntawm lub chaw teeb txheeb MCRI thiaj hais tias ''Lub hom phiaj ntawm tej lus taw qhia no yog ib co tswv yim uas tsim raws li tej pov thawj uas siv tau hauj lwm zoo coj los qhia tej neeg kho mob thiab qhia tej niam txiav kom paub txog tus me nyuam ntawd cov kev noj qab nyob zoo thiab kev txhim kho thiab kev loj hlob. Kom thiaj paub tias seb ho puas muaj teeb meem dab tsi cuam tshuam rau tus me nyuam ntawd kom thiaj paub nrhiav tej peev txheej pab thiab raus tes pab kom tus me nyuam ntawd thiaj muaj peev xwm ua tau lub neej puv npo.''
Txawm li cas los nws hais tias ntshe yuav muaj cov kev taw qhia thiab tej kev pab cuam no sib txawv thiab, uas yuav tau tsim ib co kev taw qhia twg siv tsi ntsees rau ib tug me nyuam mos ab twg thiab lub tuam chav Neonatal Intensive Care Unit (NICU) ntawm ib lub tsev kho mob twg yob cov xyuas tej hauj lwm no raws li qhov lawv muaj peev xwm ua tau thiab raws li lawv tej peev txheej uas muaj peev xwm tsim coj los siv.
Ces tom qab uas siv tej tswv yim taw qhia txog cov kev tu tej me nyuam no txog 5 xyoos lawm mam li rov qab los txheeb dua ib zaug ntxiv seb ho puas muaj pov thawj tshiab qhia tias tsim nyog yuav tau ua dab tsi ntxiv.
Ua ke no los Professor John Newnham uas yog tus coj lub koom haum Australian Preterm Birth Prevention Alliance hais tias nws lub koom haum tab tom los ua tej hauj lwm kom muaj tej me nyuam uas pheej yug ntxov tshaj lub sij hawm yug no thoob teb chaws kom tsawg tuaj ntxiv.
Professor Newnham hais tias ''Cov kev xyuas kom kho tau cov kev tu saib xyuas tej me nyuam uas yug ntxov tshaj lub caij tsim nyog yus no kom zoo tshaj qub ntxiv yog tej yam tseem ceeb heev. Tab sis tam sim no peb yeej tab tom tswj ib co program coj los tiv thaiv kom tsis txhob muaj tej me nyuam no pheej yug ntxov tshaj lub sij hawm tsim nyog yug thiab yeej pom tias muaj ntau yam cim qhia rau peb tias tej program no yeej siv tau hauj lwm zoo heev.''
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcast. Download SBS Audio app thiab caum SBS Hmong pod follow.
