Yeej muaj cov kev sib tw nrhiav hauj lwm coob heev hauv teb chaws Australia, qhov no txhais tau tais yeej yuav muaj ntau puas tus neeg mus nrhiav tib txoj hauj lwm uas yus xav nrhiav kom tau ua ntawd thiab. Yog li ntawd yog yus npaj yus tus kheej txhij zoo lawm ces yog thaum tej tuam txhab uas xav tau neeg ua hauj lwm hu yus mus interview ces yus thiaj yuav teb tau tej lus nug zoo uas yuav pab kom yus nrhiav tau hauj lwm ua.
Marg Davis yog ib tug neeg sib txuas lus nrog lwm tus neeg thiab pab lawv kom nrhiav tau hauj lwm ua ntawm lub koom haum qhia ntawv Askiv rau cov neeg tsiv teb tsaws chaw (Adult Migrant English Services-AMES) hais tias tsis yog yus tsis npaj dab tsi li es cia li mus koom cov job interview thiab pheej tseem xav tias lawv yuav nug kev dab tsi ne, no xwb?
Yus yuav tsum uas tib zoo xyuas kom yus nkag siab txog txoj hauj lwm uas raug haub tau yaum no zoo, paub tias yuav ua txoj hauj lwm no li cas, thiab nkag siab tias vim li cas lawv thiaj xav tau tej neeg muaj tej txuj ci los yog paub hom txuj ci, kev paub thiab cov kev paub ua txoj hauj lwm ib yam twg tsi ntsees kom yus muaj peev xwm los los ua tau txoj hauj lwm no zoo.
Yuav tsum tau tshawb fawb
Xav kom xub pib mus txheeb xyuas lub tuam txhab uas lawv yuav interview koj ntawd yog lawv hu koj mus interview. Mus txheeb xyuas lawv lub vamsab (Website), mus saib lawv cov social media thiab yog tias koj ho paub tej neeg ua hauj lwm ntawm lub tuam txhab ntawd ces ho mus nrog lawv tham thiab nug seb ho zoo li cas.
Tim James uas yog tus coj ntawm lub tuam txhab Hays uas ntiav dag zog loj tshaj plaws hauv teb chaws Australia hais tias “Yus yeej muaj peev xwm mus txheeb tau tej neeg uas yuav interview yus ntawd seb ho yog leej twg kom ho ib nyuag paub lawv zoo me ntsi tau thiab." Tab sis nws tsis xav kom yus mus ntau phooj ywg nrog tej neeg yuav interview yus hauv Linkedin ua ntej yuav mus interview.
Thiaj xav kom ua tib zoo nyem tej lus qhia txog txoj hauj lwm ntawd kom ntxaws thiab yuav tsum kub siab txog tej txuj ci, kev paub thiab cov kev tau ua tej hauj lwm no los yog yuav siv ua tau txoj hauj lwm no zoo los teb tej lus no rau lub caij lawv interview yus. Yuav tsum nkag siab tias tus tswv tuam txhab hos xav nrhiav cov neeg ua hauj lwm zoo li cas ces yuav tsum tau npaj tias seb lawv ho yuav nug tej lus nug li cas thiab tsim nyog yus yuav tau teb tej lus nug ntawd li cas.
Npaj koj cov lus teb
Tej neeg interview koj yeej yuav nug kom koj qhia txog koj tus kheej, koj ho paub lub tuam txhab lagluam no li cas thiab qhia lawv seb koj ho tau ua hauj lwm li cas dhau los, thiab lawv yuav nug kom qhia ib cov piv txwv ntawm tej hauj lwm koj tau ua dhau los rau lawv mloog.
Marg Davis tshab txhais tias vim cov kev qhia tej hauj lwm koj tau ua dhau los rau tus tswv lagluam uas koj mus interview ntawd yuav qhia rau lawv tias seb koj ho yuav ua tau txoj hauj lwm tshiab uas yog lawv ntiav koj ntawd li cas txuas ntxiv rau yav pem suab.
Tej lus nug no cov cov heev yog li no thiaj xav kom sawv daws yuav tsum tau npaj kom zoo. Yog li thiaj yog ib lub tswv yim zoo heev yuav tau ua tib zoo nyem txog txoj hauj lwm uas raug haub tau yaum ntawd kom yus totaub zoo txog txoj hauj lwm ntawd, thiab yuav tsum xav txog qee cov zwj ceeb uas yus tau ua tej hauj lwm dhau los thiab muab sau tseg cia ua ib nqe ib nqe li yuav tsum muaj qhov pib, qhov lub ntsib thiab muaj cov kev xaus lus txog ib yam xwm txheej ntawd.
Xav kom ho nrog ib tug neeg twg xyaum cov kev interview uas nug thiab teb lus nug ntawd ob peb zaug, tsis hais yuav xyaum nrog yus ib tug phooj ywg los yog zoo tiag ho xyaum nrog ib tug neeg uas yeej tau ntiav neeg ua hauj lwm dhau los los yog tej neeg ua tau ntiav neeg ua hauj lwm dhau los.
Getty Images
Yuav tsum tau qhia txog yus tus kheej
Yog tej yam tseem ceeb heev uas yuav tsum nrhiav ib txoj xub kev los qhia rau tej neeg interview yus tias yus yeej muaj tej txuj ci, kev paub thiab yog tus yuav ua tau txoj hauj lwm ntawd, tab sis tej neeg interview yus ntawd yeej tseem yuav nug tias seb yus ho nyiam ua dab tsi rau lub caij khoom uas tsis ua hauj lwm ntawd thiab.
Yog li ntawd tej zaum lawv yuav xub pib tham pem me ntsi ua ntej, li nug tias seb yus ho mus rau thaj chaw lawv yuav interview yus ntawd li cas, thiab yus ho ua dab tsi rau hnub ntawd.
Career coach Ray Pavri uas yog ib tug neeg pab qhia kom lwm tus paub mus nrhiav hauj lwm ua (Career coach) xav taw qhia kom tej neeg yuav tsum npaj kom paub txog ntau yam txwm txheej tseem ceeb los yog tej xov xwm uas tau tshaj tawm thiab tau tshwm sim rau hnub ntawd kom zoo.
Kuv xav tias yog tej neeg sawv daws, los yog yus ho yog cov neeg tsiv teb tsaws chaw tuaj nyob teb chaws Australia no thiab, ces xav kom tawm rooj mus koom nrog lwm tus neeg tham pem thiab kom yus thiaj li paub txog tej kab lis kev cai thiab paub tias ho muaj tej xwm txheej dab tsi tseem ceeb tau tshwm sim. Vim thaum xub xub pib cov kev interview ntawd li peb los yog tsib ntiag tiv (minutes) ntawd ces lawv yuav tham pem sib fim me ntsi kom yus swm thiab txhob ntshai ua ntej tso. Piv txwv li lawv yuav nug seb yus ho nyob li cas? Yog li yog yus paub tias muaj dab tsi tshwm sim ces kuj yog tej yam xub tham ua ntej coj los pib kom zoo tham txuas ntxiv rau cov kev interview no, vim tsis yog lawv yuav cia li nug ncaj qha txog ntau yam cuam tshuam txog tej hauj lwm uas yus mus interview ntawd nkaus xwb.
Hnav khaub ncaws kom kom zoo du dais
Yuav tsum tau mus txheeb xyuas seb lub tuam txhab ntawd hos hnav khaub ncaws li cas, uas tib zoo los xyuas kom yus hnav phim kom zoo tib yam. Feem ntau mas yeej muaj ib txhia lagluam yeej hnav khaub chaw ua lagluam uas yuav tau khi hlua caj dab (tie), hos lwm cov lagluam kuj tsis xav li cas tsuav yus hnav kom du dais li teb li chaw xwb ces kuj siv tau lawm thiab.
Yog li ntawd thiaj xav kom yuav tsum tau mus txheeb tias seb lub tuam txhab yus yuav mus interview ntawd ho hnav khaub ncaws li cas, yog tsis paub meej los yus yeej muaj peev xwm hu xov tooj mus nug tus neeg txais tos qhua ntawm lub tuam txhab lagluam ntawd los kuj tau thiab. Yog li ntawd ces tsis hais yuav yog yus raug hu kom mus koom cov job interview rau qhov twg li, xav kom yus yuav tsum hnav khaub ncaw kom zoo thiab rau khau kom hu si ntsis plaub hau los yog txiav plaub hau thiab rau tes kom du dais.
Yuav tsum hais lus kom nrov thiab hais lus kom meej
Hnub uas koj mus interview ntawd, yuav tsum ua tib zoo xyuas kom koj xub mus txog ua ntej li ntawm 5 los yog 10 ntiag tiv (minutes), kom yus tsis txhob maj maj.
Yuav tsum ntseeg yus tus kheej, xav rau kis zoo thiab yuav tsum ua tus neeg ua kom tej neeg interview yus pom tau tias yus yeej kub siab thaib xav tau txoj hauj lwm ntawd ua tiag tiag. Thaum yus nrog tej neeg no tham los yus yuav tsum nco ntsoov tuav lawv tes thaum xub sib fim thiab thaum sib tham tag, thiab lub caij sib tham thiab teb lus nug ntawd los yuav tsum nco ntsoov saib tej neeg nug yus ntawd qhov muag thiab yuav tsum hais kom nrov thiab mam mam tham kom lawv thiaj nkag siab tias yus tham dab tsi.
Marg Davis hais tias yog lawv ho ces fwj dej los yog ib kho dej rau yus ces xav kom yus tsum txais uas yog ib lub cim zoo rau cov kev yuav pib interview thiab kuj yog tej yam zoo yuav pab kom yus ho muaj sib hawm me ntsi los xav thiab npaj tias yuav teb ib lo lus nug li cas thiab.
Getty Images
Npaj ib cov lus nug mus nug lawv thiab
Thaum xaus cov job interview ntawd lawm, ces lawv kuj pub lub sij hawm me ntsis rau yus seb ho puas muaj lus nug dab tsi txog txoj hauj lwm los sis yog lawv lub tuam txhab thiab. Yog li ntawd thiaj xav kom yuav tsum tau npaj ob peb nqe lus nug tseg cia.
Davis hais tias cov kev nug txog ib yam dab tsi cuam tshuam txog txoj hauj lwm los yog txog lub tuam txhab no qhia tau rau lawv paub tias yus yeej kub siab mus tshawb thiab teeb txheeb txog lub tuam txhab no thiab yus yeej kub siab heev xav tau txoj hauj lwm ntawm lub tuam txhab ntawd ua tiag. Vim yeej yog ib lub zoo tswv yim yuav tau npaj ob peb nqe lus nug tsam lawv ho twb xub teb yus lawm ces thiaj li ho tshuav ib ob nqe nug lawv.
Yog li ntawd Tim James ntawm lub koom tuam txhab ntiav dag zog Hays thiaj hais ntxiv tias kuj yog tej yam tseem ceeb heev tias yus yuav tsum tau ua tib zoo txheeb xyuas seb puas yog txoj hauj lwm uas yus nyiam ua los yog tsis nyiam ua thiab.
Getty Images
Soj qab taug lw seb yuav ua li cas ntxiv
Thaum interview tag lawm, yuav tsum nco ntsoov ua cov neeg interview yus tsaug, thiab nug lawv tias interview tag lawm ho yuav ua li cas ntxiv. Marg Davis los yeej xav kom yus yuav tsum tau xa ib tsab email mus ua tsaug rau tej neeg interview yus tej sij hawm thiab qhia rau lawv paub tias yus xav tau txoj hauj ntaw ua thiab cia siab ntsoov tias yuav hnov xov zoo ntwm lawv ntxiv.
Thiab vam thiab cia siab tias lub tuam txhab ntawd yuav muab txoj hauj lwm ntawd rau yus ua. Tab sis txawm lawv muab rau lwm tus thiab yus tsis tau los tsis txhob tag kev cia siab thiab txhob tu siab thiab. Vim yus yeej yuav tau mus interview ntau txoj hauj lwm mas thiaj mam li tau ib txoj hauj lwm rau yus ua.
Tab sis qhov tsee, ceeb tshaj mas yus yuav tsum kawm tej sob kawm qee yam los ntawm cov kev interview no thiab, tias seb yus ho ua tau yam twg zoo thiab tshuav qhov twg yuav tau kho rau kom zoo tshaj qub ntxiv. Kom yus thiaj li ho mus koom thiab teb cov job interview rau lwm zoo kom zoo tshaj qub uas cia siab tias yuav nrhiav tau txoj hauj lwm rau yus ua.
