Raws li lub koom haum Scanlon Foundation Institute tsab ntawv ces luaj Mapping Social Cohesion Report 2023 zum 17th uas teeb txheeb ib xyoos ib zaug twg tau qhia ces kuj pom tau tias muaj ntau yam cuam tshuam txog tej laj fai kum xeeb thiab ntau yam cuam tshuam txog tej lagluam tau ua rau muaj teeb meem tsis tau txais kev koom npoj thiab kev haum xeeb ntawm teb chaws Australia lawm.
Tab ntawv cej luam no tau qhia tias cov kev sib tu ncua thiab tsis tau txais vaj huam sib luag rau cov kev khwv tau nyiaj siab npaug, tej kev txom nyem nyiaj txiaj, thiab tej xwm txheej kub ntxhov txawv teb chaws ntawm cheeb tsam li ntawm Middle East tau ua rau muaj kev koom npoj thiab muaj kev haum xeeb tsawg tuaj ntxiv ntawm teb chaws Australia lawm. Tsis tas li ntawd los kuj ua rau tej neeg mloog tau tias lawv tsis muaj feem koom thiab lawv tsis tshua txaus siab pes tsawg rau haiv neeg no lub cim thawj, thiab tsis tshua muaj kev ntseeg siab rau nom tswv lawm. Vim ua rau ib txhia mloog tau tias lawv tsis muaj feem koom thiab zoo li lawv tsis yog ib feem ntawm tej zejzog los yog ib feem ntawm teb chaws Australia.
Txawm li cas los kuj muaj tej neeg koom cov kev teeb txheeb txog 84 feem pua ntseeg tias muaj kev sib tu ncua rau cov kev khwv nyiaj ntawm tej neeg nplua nuj thiab tej neeg txom nyem. Muaj 89 feem puas ntawm tej neeg Australia pom zoo tias lub tswv yim txhawb nqa ntau tsav neeg coj ntseeg ntau yam kab lis kev cai yog tej yam zoo rau teb chaws Australia. Thiab muaj neeg txog li 89 feem pua ntseeg tias cov kev tsiv teb tsaws chaw yog tej yam zoo rau Australia tej lagluam thiab.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
