Xyoo 2024 no tsoom fwv Australia tau kho nws tej migration system tshiab ces thiaj ua rau muaj kev pauv hloov ntau yam rau tej kev thov visa siv suav tej tub kawm pej kum haiv tej visa thov tuaj kawm ntawv (Student visa) nrog tib si.
Yog li nom tswv Australia thiaj yuav siv ntau yam tswv yim li ib tug tub kawm pej kum haiv uas xav thov visa tuaj kawm yuav tsum qhia kom tau tias muaj nyiaj Australia txog li ntawm $30,000 coj tuaj siv, xeem kom tau cov zauv IELTS (International English Language Testing System) kom tau txij 6 rov sauv, thiab tseem yuav raug txheeb tias seb puas yog xav tuaj kawm ntawv tiag tiag.
Pheej Muas uas yog tib tug tub kawm uas siv nws nyiaj ntiag tug tuaj kawm master degree rau sab education thiab management thiaj hais tias, yuav tau npaj koj tej ntaub ntawv seb koj kawm tau zoo li cas, koj daim ntawv ua hauj lwm, tej sob kawm uas koj xav tuaj kawm, thiab koj kawm dab tsi thiab yuav rov qab mus ua dab tsi thaum kawm tiav. Nws hais tias yuav tau npaj tej ntaub ntawv no kom tiav ces muab rau tej migrant agents pab khiav rau koj.
''Yog tias koj ua tau zoo txhua yam thiab xav tuaj kawm tiag ces yeej tau tuaj kawm xwb, yuav tau nug yus tus kheej tias seb tsuas lam xav tuaj kawm xwb, los yog xav tuaj nyob, thiab kawm tag lawm puas nrhiav tau hauj lwm ua ntawm yus lub teb chaws thaum rov qab mus tsev lawm. Yog koj xav nyob ces tsis txhob kawm tej sob kawm koj xav kawm tab sis yuav tau kawm tej uas nom tswv teb chaws Australia xav tau mas koj thiaj tau nyob,'' raws li Pheej Muas hais.
Lus tim tsum:
Pheej Muas cov lus tawm tswv yim no tsuas yog piav raws li tej xwm txheej nws tus kheej tau ua thiab tau paub tau pom xwb, thiab tsuas tham ua kev paub rau sawv daws xwb, yog koj xav tau txais kev pab cuam tiag ces tsim nyog koj nrog tej certified migrant agents sab laj thiaj yuav pab tau raws li qhov koj xav tau.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
