Tej ncauj lug tseem ceeb li kev kho kom muaj kev sib raug zoo rau sab lag luam, kev pov pua leej tib neeg txoj cai thiab kev ruaj ntseg rau cheeb tsam Indo-Pacific yog ib co ncauj lus tseem ceeb ntawm Suav tus thawj pwm tsav Li Qiang cov kev tuaj xyuas Australia thawj zaug rau lub sij hawm 7 xyoo uas tau muaj nom tswv Suav theem siab tau tuaj xyuas rau lub caij uas tseem muaj cov kev sib cov nyom rau kev nom tswv ntawm ob lub teb chaws Australia thiab Suav tuam tshoj.
Suav tus thawj pwm tsav Li Qiang tau hais tias 'peb yuav tsum muaj kev sib hwm, fwm ib tug twg uas coj txawv peb, txhawb nqa kom muaj tej kev koom tes uas yuav tau txais txiaj ntsim rau ob tog tam li yog tej neeg paub tab, thiab tsim kom tau tej tswv yim koom tes ntawm ob tog.'
Ces thiaj ua rau Suav pub sij hawm 15 hnub rau neeg Australia mus ncig tau teb chaws Suav yam tsis tas thov visa siv.
Txij li xyoo 2020 uas tus tsoom fwv koom tswj dhau los tau hais kom txheeb lub chiv keeb seb tus kab mob COVID-19 xub kis qhov twg tuaj ces tau ua rau Suav tau rau txim lagluam txog $20 billion rau Australia tej lagluam xa muag rau teb chaws Suav.
Txawm tias txij li thaum nom tsoom fwv Albanese tau los ua nom uas nws tau nrog xyuas kom kho tau kev sib raug zoo thiab kom Suav thim cov kev txwv thiab tsub se rau Australia tej lagluam cawv txiv lawm los yeej tsem muaj cov kev tsub se rau Australia tej cws hiav txwv thiab tej nqaij nyuj.
Australia tus thawj pwm tsav Anthony Albanese hais tias 'Australia yeej txhawb nqa kom muaj kev thaj ceeb rau cheeb tsam no, tsim nyog txhua lub teb chaws koom tes ua ke, tsis xav kom muaj ib lub teb chaws twg ua tus tswj lwm lub teb chaws los sis yog ib lub teb chaws twg raug lwm lub teb chaws tswj. Kuv yeej qhia meej tias ntau haiv neeg nyias yeej muaj nyias tej keeb kwm, tej kev tswj hwm, tej kev coj taug sib txawv. Peb yuav koom tes raws li qhov peb muaj peev xwm koom tau, thiab peb yuav tsis pom zoo ras li qhov peb yuav tsum tau ua, thiab yuav xyuas kom tau txais txiaj ntsim rau peb haiv neeg.'
Ces thiaj tau muaj 4 co ntaub ntawv tsim kev nkag siab txog ob lub teb chaws no tej kev ua lagluam ywj pheej, tswv yim daws teeb meem huab cua pauv hloov, kev kawm thiab kev teeb txheeb thiab tej tswv yim npaj tseg los sab laj txog lagluam.
Australia tus thawj pwm tsav Albanese los yeej tau qhia tias nws yeej tau nug txog Dr Yang Hejung uas yog ib tug neeg sau ntawv uas raug kaw ntem teb chaws Suav nrog lwm tus neeg Australia uas raug txim. Thiab Australia 'tsis pom zoo rau lub tswv yim rau txim tuag rau tej neeg'.
Nyob sab nraum Australia lub tsev tsoom fwv ces kuj muaj tej neeg uas mus rwg npoj txhawb nqa nom tswv Suav cov kev tuaj xyuas teb chaws Australia, tab sis tej neeg zejzog Uyghur, Tibetan and Hong Kong kuj tawm tsam tsis pom zoo nrog tsoom fwv Suav tej kev tswj hwm thiab tej cai txwv txiav lawv tej kev ywj pheej.
Txawm li cas los Suav tus thawj pwm tsav yeej tsis kam teb tej lus nug ntau yam uas tej neeg nthuav xov xwm nug.
Suav tus coj thiaj tau xaus nws cov kev tuaj xyuas teb chaws Australia ntawm lub xeev Western Australia thaum nws mus xyuas Australia tej lagluam khawb peev txheej kom muaj cib fim los ua tej lagluam no.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
