Lub caij Australia tus coj thiab tej nom tswv tau mus xyuas Suav tuam tshoj rau lub sij hawm 1 limtiam (12-18 July 2025) no ces Australia thiab Suav ob tug coj kuj tau hais tias yuav rov qab los ua lagluam ua ke kom ob tog tau txais txiaj ntsim thiab yuav txhawb nqa kom muaj txoj kev sib raug zoo tshaj qub ntxiv.
Tib lub caij no Australia tej nom tswv tswj lagluam ntoj ncig kuj txhawb nqa kom Suav tej neeg ntoj ncig mus ncig teb chaws Australia, uas Australia tus thawj pwm tsav Anthony Albanese hais tias ''xyoo 2019 ces twb muaj neeg Suav txog 1.4 million tus mus ntoj ncig Australia thiab siv nyiaj ntshaj $9 billion.''
Lub caij ob lub teb chaws no rov qab muaj kev ua lagluam zoo tuaj ntxiv Meskas los yeej xav kom Australia siv nyiaj ntau tuaj ntxiv los ua nws tej hauj lwm tiv thaib teb chaws. Thiab kuj tau muaj ntau lub teb chaws koom xyaum tug rog nrog Australia ntawm Queensland.
Thiab kuj tseem muaj cov kev tsis haum xeeb cuam tshuaj txog Suav tej nkoj xyaum tub rog uas siv cov muas txwv tiag ntawm zejzog pej kum haiv tej ciam dej ze Australia thiab Australia tus neeg sau ntawv Yang Henjun uas tseem raug Suav muab kaw tsev laj cuj.
Thiab Pat Conroy los kuj hais tias Australia yuav tsis ua raws li Meskas cov tswv yim yog tias ho muaj tsov rog ntawm Suav thiab Taiwan, thiab ''tus tsoom fwv Australia ua nom lub caij ntawd mam txiav txim siab tias seb yuav ua li cas xwb.''
Australia tus coj los yeej qhia tias yeej tseem tsis tau muaj kev hloov Australia cov kev xav thaib cov kev pab Taiwan uas yuav tsis pab ib tug twg ua ib yam dab tsi kheej.
David Littleproud uas yog tus coj pab nom Nationals thiaj hais tias ''kom Australia tus thawj pwm tsav yuav tau los tham ntau yam xwm txheej nyuaj uas Australia tus nom tswj dej num txawv teb chaws tau teev txog thaum nws ntsib Xi Jinping, vim rau qhov nws hais tias yeej tseem ceeb tib yam li cov kev sib khom lagluam thiab, vim yog peb tsis tau txais kev nyab xeeb ces txawm ua luam los tsis tau txiaj ntsim dab tsi rau peb.''
