Tsoom fwv cov nyiaj puag xyoo pab puas tau neeg Australia thiab nws tej lagluam tiag? (Hmong)

Emilie Dye uas yog tus coj tswj cov cai ntawm lub koom haum the Australian Taxpayer's Alliance hais tias "tej zejzog thiab tej nom tswv xeev yog cov muaj peev xwm tsim tau cov kev pab cuam rau tej neeg zejzog tau zoo dua tsoom fwv teb chaws, thiab xav kom tsoom fwv teb chaws txhob siv nyiaj ntau thiaj yuav pab tau tej lagluam los yog sawv daws dua. Thiab yuav tsum tau los kho cov structural reform tsis yog yuav los tshwm nyiaj pab subsidy xwb thiaj yuav daws tau teeb meem tiag."

Headshot of Emilie Dye smiling-Courtesy of Emilie Dye, Director of Policy, the Australian Taxpayer Alliance Source: Courtesy of Emilie Dye

Emilie Dye uas yog tus coj tsim cov cai ntawm lub koom haum sawv cev rau tej neeg ua hauj lwm them se (The Australian Taxpayer's Alliance qhia tias tsoom fwv Australia cov nyiaj puag xyoo no poob peev ntau heev thiab yuav ua rau teb chaws Australia tiv nuj nqe txog li $966 billion dollars uas yuav ua rau neeg Australia yuav tau them se nrog paj rau ntau caum lub xyoo thiab yuav muaj teeb meem rau Australia tej lagluam.

Txawm Josh Frydenberg tau qhia tsoom fwv cov nyiaj puag xyoo 2020 no yog muaj lub hom phiaj siv nyiaj coj los pab tej hauv paus txhim kho thiab pab tej lagluam kom tsim tau hauj lwm rau tej neeg ua thiab pab tau tej lagluam kom zoo tuaj, los Emilie Dye tau qhia tias cov kev siv nyiaj ntau heev no yuav ua rau muaj teeb meem, yog li yuav tsum tau ua tib zoo xyuas kom txhob siv nyiaj ntau thiab yuav tsum txhawb nqa kom tej neeg muaj hauj lwm ua thiaj sau tau se coj los pab kom tej nyiaj puag xyoo zoo thiab txhob poob peev thiab tsis muaj nuj nqi uas yuav ua rau muaj teeb meem rau Australia tej lagluam thiab pej xeem Australia txoj kev ua lub neej.

Mloog tau Emilie Dye cov lus tham ua lus Askiv txog tsoom fwv Australia cov nyiaj puag xyoo 2020 tau ntawm no:

Ms Dye tau qhia tias tsoom fwv cov nyiaj puag xyoo no yeej muaj ib cov neeg tau txais txiaj ntsim li tej hluas hnoob nyoog qes dua 35 xyoos thiab tej laus uas so tsis ua hauj lwm lawm coj los pab rau lawv li cov nyiaj JobSeeker los yog Jobkeeper thiab cov nyiaj pension uas pab rau lub caij tseem muaj kab mob no. Thiab cov kev txo se rau tej neeg sawv daws kom tau them se tsawg thiab tau nyiaj coj los siv pab lawv tus kheej uas yuav pab tej lagluam, mus txog rau nyiaj pab rau ntau txheeb tus neeg xub yuav tsev nyob ua thawj zaug xwb tab sis yuav tsum pab rau tej neeg sawv daws tsis yog yuav pab ib co tseg ib co.

Tab sis kuj tseem muaj ib txhia neeg plam txiaj ntsim thiab xws li tej neeg ua hauj lwm muaj hnoob nyoob tshaj 35 xyoos rov sauv los yog cov neeg ua hauj lwm muaj hnoob nyoog siab tshaj ntawd lawm tsis tau kev pab cuam dab tsi. 

Yog li ntawd Ms Dye thiaj qhia tias tseem tsis tau pom tsoom fwv los kub siab kho tej housing market strcuture kom pab tau tej lagluam vaj tse tiag, los yog tseem tsis tau ua tib zoo xyuas kom pab tau tej peev txheej nyiaj txiaj coj mus pab rau tej zejzog thiab tej xeev raws li qhov tsim nyog kom thiaj li pab tau tej zejzog thiab tej lagluam tsim tau cov kev pab cuam tseem ceeb pab rau lawv tiag tiag thiab txhob nkim tej nyiaj no, txhob ua nyuaj rau lawv los yog tsim teeb meem rau tej lagluam no tab sis yuav tsum xyuas kom tau txais kev yooj yim li xeev New South Wales thiab Victoria uas xav los kho cov stamp duty los siv cov land tax los sis yog los kho cov payroll tax kom thiaj li pab tau tej neeg los yog tej lagluam.

Vim yeej tau pom lawm tias tsoom fwv tej nom yeej tau siv tej nyiaj community grants dhau los rau cov project tsis tsim nyog thiab pab rau tej neeg xaiv lawv kom lawv tau txais ntxiaj ntsim rau tej laj fai kum xeeb xwb yog li ntawd lub koom haum the Australian Taxpayer's Alliance thiaj yuav tau ua lub qhov muag dav soj tsoom fwv tej nyiaj pab cuam no kom thiaj siv tau tej nyiaj no pab rau Australia tej neeg zejzog kom tau txais txiaj ntsim ntau tshaj plaws.

Ms Dye qhia tias thaum tsoom fwv yuav tsis muaj peev xwm yuav txo se rau tej neeg thiab siv nyiaj ntau heev rau tib lub caij los spab rau tej neeg ua hauj lwm thiab tej lagluam tib txhij ua ke tau. Txawm cov kev txo se rau tej neeg uas ib txhia yuav coj mus siv los yog yuav coj mus khaws cia los yeej yuav tau txais txiaj ntsim rau tej lagluam tib yam.

Ms Emilie Dye uas yog tus coj policy ntawm lub koom haum Australian Taxpayer's Alliance thiaj qhia tias tej zejzog thiab tej nom tswv xeev yog cov muaj peev xwm los tsim tau cov projects los yog programs zoo pab rau tej zej zog dua tsoom fwv teb chaws. Vim tsoom fwv teb chaws tsuas pom txog qhov dav dav xwb tab sis tsis paub ntxaws tias tej zejzog xav tau kev pab cuam dab tsi tiag.

Txawm li cas los Anthony Albanese uas yog tus coj pab nom Labor los yog federal opposition yeej tau los teb tsoom fwv cov nyiaj puag xyoo 2020 no tias nws yuav kub siab los nrog xyuas kom tej cuab yig txog 97% tau siv cov nyiaj pab zov me nyuam kom tej poj niam thiaj li muaj peev xwm rov qab mus ua tau hauj lwm tsis tas li no los yuav los kub siab xyuas kom 10% ntawm tej neeg ua hauj lwm rau tej hauv paus txhim kho ntawd yuav tsum yog cov hluas mus xyaum hauj lwm tshiab, thiab Labor kuj qhia tias nws yuav kub siab los kho Australia tej ncej thiab xov xa hluav taws xob thiab kho tej chaw khaws hluav taws xob kom vam meej tuaj thiaj pab kom tej nqe hluav taws xob pheej yig.

Ib qho tseem ceeb uas Ms Dye pom ntawd ces tsoom fwv cov nyiaj puag xyoo 2020 no pab xyuas kom tej neeg ua hauj lwm txhob tau them tej nqe khaws lawv cov nyiaj superannuation kim yog tias tej super funds khwv tsis tau nyiaj zoo coj los pab rau tej tub koom siab.

Koj muaj peev xwm sim teb qee cov lus nug cuam tshuam txog Australia cov nyiaj budget xyoo 2020 no seb koj yog cov neeg yuav tau txais txiaj ntsim los yog yuav plam txiaj ntsim tau yog koj nyem rau ntawm lo lus "Get Started" hauv qab no:

Listen to  SBS Hmong on Thursday at 6 pm AEST or Sunday 11 am AEST, follow us on SBS Hmong Facebook, listen and subscribe to podcasts from google podcasts, Spotify, and Apple podcasts or download SBS Radio App to listen to SBS Hmong radio Program.