Ntsiab lus tseem ceeb:
- Tej cai ua tswv av yuav ua rau thim tsoom fwv qee thaj av rov qab rau neeg txum tim Aboriginal thiab Torres Strait Islander tej zejzog kom lawv tau txiaj ntsim rau lawv tej kab lis kev cai, lawv tej zejzog thiab tau lagluam tsis yog yuav thim tej neeg ntiag tug tej av rov qab.
- Land rights, native title, thiab treaty muaj ntsiab cai lij choj thiab tej txheej txheem laj fai kum xeeb sib txawv, tab sis tag nrho tej no muaj hom phiaj lees paub neeg txum tim cov kev sib cuag nrog lawv lub teb chaws thiab pab lawv cov kev txiav txim siab ua lawv lub neej.
- Tau pib muaj cov koom txoos Wave Hill Walk - Off xyoo 1966 uas tau ras los ua rau tsim tau ib co cai tseem ceeb li tsab cai Aboriginal Land Rights (Northern Territory) Act 1976, thiab yeej tseem siv sij hawm txog niaj hnub niam no los ua tej xwm txheej no.
- Muaj neeg txum tim cov kev ua tswv av dab tsi ntawm teb chaws Australia?
- Ho muaj cov kev pib tawm tsam kom neeg txum tim Aboriginal muaj cai ua tswv av li cas?
- Aboriginal land rights kuav txog dab tsi?
- Dab tsi yog qhov sib txawv ntawm Aboriginal land rights, native title thiab treaty?
- Vim li cas neeg txum tim Aboriginal cov kev muaj cai ua tswv av thiaj tseem ceeb tam sim no?
- Ib co piv txwv zos: Darkinjung Aboriginal Land Council
- Yuav muaj teeb meem nyuaj dab tsi txuas ntxiv rau yav pem suab rau neeg txum tim Aboriginal cov kev muaj cai ua tswv av?
- Vim li cas neeg txum tim tej kev muaj cai ua tswv av thiaj tseem ceeb rau txhua tus neeg Australia?
Muaj neeg txum tim cov kev ua tswv av dab tsi ntawm teb chaws Australia?
Yeej tau ntau xyoo uas neeg txum tim Aboriginal thiab Torres Strait Islander yeej muaj kev sib cuag nrog lawv tej teb chaws tsis raug lees paub. Ces thiaj tau tsim tej cai muaj cai ua tswv av (Land rights laws) los pab kom lawv muaj cai tswj tej av lawv ib txwm tswj.
Ua ntej yuav muaj cov kev tuaj txeeb liaj ia tswj hwm ces neeg txum tim Aboriginal thiab Torres Strait Islander yeej tau tu saib xyuas lawv tej teb chaws los tau ntau caum txheeb xyoo.
Tab sis cov kev txheeb nam nias liaj ia tswj hwm no yeej tsis tau muaj ib co kev sib khom pom zoo dab tsi li, thiab tsuas ua raws li lub tswv yim cuav terra nullius uas txhais tias ''yog lub teb chaws tsis muaj tsw''.
Thawj pwm tsav Gough Whitlam tau tso xuab zeb rau Vincent Lingiari txais tes ua lub cim qhia tias tau rov qab rov tej liaj ia teb chaws rau neeg txum tim Gurindji hnub tim 16 lub 8 hli ntuj xyoo 1975. Source: AAP
Ho muaj cov kev pib tawm tsam kom neeg txum tim Aboriginal muaj cai ua tswv av li cas?
Tau muaj cov kev tawm tsam kom muaj cai ua tswv av tiam vam meej hu ua Wave Hill Wall-Off no tau pib xyoo 1966 tom qab tau muaj ib co neeg txum tim Gurindji thiab lawv tej cuab yig tau tawm tsam ntawm Northern Territory. Cov kev tawm tsam no qhia txog qhov tseem ceeb ntawm tej zwj ceeb ua hauj lwm tsis zoo ntau yam thiab cov kev xav tau tej av ib txwm yog neeg txum tim li rov qab.
Xyoo 1976 ces kuj tau muaj cov kev tso cai rau muaj kev tawm suab kho txhooj cai tswj haiv uas tsoom fwv Australia muaj cai tsim tej cai rau neeg txum tim Aboriginal and Torres Strait Islander siv. Tej xwm txheej no thiaj tau qhib kev rau muaj cov kev tsim tsab cai Aboriginal Land Rights (Northern Territory) Act 1976 — uas yog thawj tsab cai uas tau lees paub neeg txum tim cov kev aws tej av uas ib txwm yog lawv li.
Kuj muaj qee cov xeev los lawv kuj muaj lawv tej cai teev txog cov kev muaj cai ua tswv av thiab, tab sis teb chaws Australia yeej tseem tsis tau muaj ib tsab cai nkaus xwb uas teev txog cov kev muaj cai ua tswv av uas siv tau thoob teb chaws coj los siv li.
Aboriginal land rights kuav txog dab tsi?
Tej cai ua tswv av (Land rights) tsuas siv tau rau nom tswv tej av xwb — uas yog tej av sawv daws paub tias yog Crown land — thiab tsis yog neeg ntiag tug tej av. Tej av uas tau thim rov qab rau neeg txum tim yog tej tsis muaj peev xwm yuav muab muag los yog coj mus siv ua vaj tse. Tab sis yog tej av teev ua cov trust kom neeg txum tim tej zejzog muaj peev xwm tu thiab txiav txim siab seb yuav siv li cas.
Thiab tau teeb tsa lub koom haum Land councils sawv ces rau neeg txum tim Aboriginal and Torres Strait Islander thiab pab lawv tswj tej av uas lawv tau rov qab. Tej koom haum no pab tej zejzog siv tej av no ua lawv tej kab lis kev cai, zejzog, tej ib puag ncig thiab khwv nyiaj los yog pab kom tau hauj lwm ua.
READ MORE
Explainer: The '67 Referendum
Dab tsi yog qhov sib txawv ntawm Aboriginal land rights, native title thiab treaty?
Txawm tias yeej tau sab laj txog cov lus no ua ke tas mus li, los nyias yeej muaj nyias lub ntsiab lus sib txawv thiab:
- Land rights: yog tej cai uas tej tsoom fwv tsim kom thim tau tsoom fwv cov av Crown land ntawm ib thaj chaw twg rov qab rau neeg txum tim Aboriginal and Torres Strait Islander, uas tej koom haum land councils yog cov tswj.
- Native title: yog cov kev lees paub raws cai lij choj tias neeg txum tim tseem muaj cai ua tswv rau lawv tej av tej dej raws li lawv tej cai thiab tej kab lis kev cai uas lawv ib txwm siv.
- Treaty: ces yog ib co kev pom zoo ntawm tej tsoom fwv nrog neeg txum tim. Uas yeej muaj tej teb chaws li New Zealand thiab Canada uas tau muaj ntau cov treaties, tab sis teb chaws Australia yeej tseem tsis tau muaj ib co national treaty dab tsi siv li.
Tej cai ua ke li hais no thiaj muaj hom phiaj xyuas kom tau txais kev ncaj ncees, ua kev lees paub thiab pab tej neeg txum tim cov kev txiav txim siab ua lawv lub neej raws li qhov lawv xav ua.
Vincent Lingiari yog tus pib cov kev tawm tsam Wave Hill walk-off, uas yog ib cov kev tawm tsam tseem ceeb rau Australia cov neeg txum tim Aboriginal tej keeb kwm muaj cai ua tswv av. Xyoo 1966 ces tej neeg tu saib xyuas tsiaj, tej neeg ua hauj lwm tus vaj tse thiab lawv tej cuab yig tau tawm tsam tsis ua hauj lwm ntawm lub chaw yug tsiaj Wave Hill Station tsis pom zoo nrog tej zwj ceeb ua hauj lwm tsis zoo thiab tsis muaj cai ua tswv av. Credit: National Museum Australia
Vim li cas neeg txum tim cov kev muaj cai ua tswv av thiaj tseem ceeb tam sim no?
Cov kev thim tej av rov qab rau neeg txum tim pab kom lawv tej zejzog rov qab muaj kev sib cuag tau nrog lawv tej lus, kab lis kev cai thiab lawv lub teb chaws. Tsis tas li ntawd los kuj pab kom lawv tau vaj tse nyob, tau txais kev noj qab haus huv, kev kawm thiab tau txais kev ywj pheej rau fab kev lagluam thiab hauj lwm ua.
Dr Virginia Marshall uas yog ib tug poj niam neeg txum tim caj ceg neeg Wiradjuri Nyemba thiab kuj yog ib tug kws paub zoo txog tej cai ua tswv dej tshab txhais txog cov kev xav sib txawv tias:
"Tej dej nrog peb tham, tej xyoob ntoo nrog peb tham, thiab peb tsis tas pheej yuav siv tej neeg ntawm cov teb chaws vam meej tej tswv yim ib puag ncig...Peb tej cai thiab peb tej dab neeg txog ntuj tsim teb raug yog cov qhia kom peb muaj kev nkag siab lawm.''
Tej cai ua tswv av no tsis yog yuav txeeb ib tug twg lub tsev los yog lawv tej chaw qab vag tsib taug. Tsuas yog cov kev thim qee thaj chaw Crown land twg uas raug lees paub tias muaj kev sib cuag nrog neeg txum tim tej keeb kwm thiab tej kab lis kev cai xwb.
Ib co piv txwv zos: Darkinjung Aboriginal Land Council
Lub koom haum Darkinjung Local Aboriginal Land Council yeej tau raug tsim raws New South Wales tsab cai Aboriginal Land Rights Act, uas qhia tias muaj cai ua tau tswv av li cas.
Uncle Barry Duncan ces yog ib tug txiv neej neeg txum tim caj ceg neeg Gomeroi thiab kuj yog ib tug ntawm ntau tus uas tau teeb tsa lub koom haum no, yeej tseem nco tau tias tau pib tsim li cas ntawm nws niam thiab txiv qab vaj xyoo 1983:
"Lub koom haum no tau pab kom lub zos no tau tuaj sib koom ua ke. Thiab yog ib txoj xub ke siv tej av los nqes peev pab rov qab rau tej tswv neeg txum tim Aboriginal."
Ntau xyoo dhau los no ces Darkinjung yeej tau pab tsim kom muaj cib fim lagluam thiab txhim kho kom zejzog muaj cov kev txiav txim siab ruaj khov zoo tshaj qub ntxiv.
Uncle Barry qhia tias: "Tam sim no ces tej neeg yeej paub tias ... peb tshaj lij thiab txawm ntse heev rau cov kev tswj peb tej av no."
Vincent Lingiari nyob ntawm ib sab ntawm daim phiaj qhia txog cov kev teev txog cov kev rov qab thim cov kev ntiav av ntawm Wattie Creek xyoo 1975. Credit: National Museum Australia
Tseem yuav muaj teeb meem nyuaj ntau yam dab tsi txuas ntxiv rau neeg txum tim Aboriginal cov kev muaj cai ua tswv av rau yav pem suab?
Tej txheej txheem ua tswv av yog ib co sib chab sib chaws thiab qeeb heev. Tsis tas li ntawd los tsuas muaj tej av tsawg tsawg uas yuav raug thim rov qab rau neg txum tim xwb, thiab qee cov kev aws tej av rov qab los tseem cuam tshuam txog plaub ntug los sis tej teeb meem laj fai kum xeeb thiab.
Txawm yuav tseem muaj tej teeb meem nyuaj no los, cov kev ua tswv av kuj tseem yog ib feem tseem ceeb ntawm Australia tej xub ke yuav pab kom sib kho kom muaj kev haum xeeb, tau txais kev ncaj ncees thiab cov kev lees paub txog neeg txum tim cov kev twj hwm twj lij thiab.
Vim li cas neeg txum tim tej kev muaj cai ua tswv av thiaj tseem ceeb heev rau txhua tus neeg Australia?
Tej neeg uas tuaj tshiab rau Australia no ces cov kev kawm kom paub txog tej cai ua tswv av yog ib txoj xub ke pab kom lawv sib cuag tau nrog tej keeb kwm tau muaj los ntev ntawm lub tebchaws no. Tsis yog cov kev plam liaj ia teb chaws xwb, tab sis yog cov kev lees paub thiab cov kev rov qab kho ntiaj teb ib cov kev sib raug zoo ntawm tej neeg thiab tej luaj pua uas qub tshaj plaws thiab.
Cov kev sib cuag no yeej tau muaj los ntev tshaj 60,000 xyoo lawm thiab yeej tseem muaj txuas ntxiv los txog niaj hnub niam no.
Subscribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia kom koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm australiaexplained@sbs.com.au
