Dr Kearrin Sims hais tias nws cov kev teeb txheeb uas tau mus tshawb fawb txog ntawd ces yog xav paub tias vim li cas Sombath Somphone thiaj li ploj nrhiav tsis tau hauv Nplog teb lawm tsuas yog xav paub tias yog tim dab tsi ua rau nws ploj thiab ho muaj dab tsi cuam tshuam nrog tej xwm txheej ua rau nws ploj.
Txawm nom tswv Nplog tsis lees paub tias nws muaj feem paub thiab cuam tshuam txog tej xwm txheej no, los Dr Sims tau qhia tias, lub caij Sombath Somphone ploj ntawd, yeej muaj tub ceev xwm cuam tshuam nrog thiab yeej muaj cov video cctv clip yees tau tej xwm txheej.
"Yeej tau muaj cov koob CCTV teev tseg tias tau muaj tub ceev xwm hais kom nws nres tsheb, muab nws hloov caij dua lub tsheb tshiab coj mus lawm thiab muaj neeg los muab nws lub tsheb tsav mus lawm", ces txij ntawd los yeej nrhiav tsis tau nws li lawm.
Raws li Dr Sims tau qhia, tej koom haum txhim kho yeej tuaj yeem xav pab nom tswv Nplog mus nrhiav Sombath Somphone seb dua twg lawm los nom tswv Nplog tsis lees paub lawv cov kev nqua hu. Koj muaj peev xwm yeem tau tej neeg cov npe thiab tej khoom haum li hais ntawd tau ntawm no.
Dr Sims ntseeg tias "Somphone cov kev ploj tsis yog tim nws tawm tsam tsoom fwv dab tsi, tab sis vim nws yog ib tug neeg nto npe thiab yeej tau ua hauj lwm pab txhim kho zej zog los ntev nrog nom tswv, tej no tsis yog cov txuam thawj ua rau nws raug yuam kom ploj vim txhua yam hauj lwm nws ua yeej zoo tib yam xwb."
Txawm li cas los yeej muaj tej neeg xav tias tej zaum yog tim Sombath Somphone tau mus ua tus koom tswj lub rooj sab laj Asia Europe Summit uas cuam tshuam txog cov kev txhim kho hauv Nplog teb uas ib txhia pej xeem tsis txaus siab tias nom tswv tau muab lawv tej av pub rau tej tswv lagluam coj mus txhim kho thiab ua lagluam thiaj ua rau nws raug tej teeb meem no.
Ib nqe uas Dr Sims tham txog ntawd ces xav kom nom tswv Nplog tso kev dav rau tej neeg cov kev tawm tswv yim tau ywj pheej rau li qhov lawv xav tham, tab sis nws kuj tau ceeb toom tias yuav tsum nrhiav tswv yim seb ho yuav ua li cas kom los txhawb nqa nom tswv Nplog kom tso kev dav rau tej hais no, thiab kom ho tau txais kev nyab xeeb rau tej neeg xav mus ua hauj lwm txhim kho hauv teb chaws Nplog los yog kom tau txais kev nyab xeeb rau tej neeg Nplog uas lawv ua hauj lwm ua ke ntawd.
"Nom tswv yeej tseem siv tej tswv yim kum xeeb tswj nruj tsis pub tej neeg tham tej yam tsis zoo tham los yog yuav tsim kev phom sij, ces nws thiaj li siv tej tswv yim ua kom tej neeg ntshai tsis txhob tham dab tsi."
Nws hais tias Nplog yeej yog ib lub tebchaws thaj yeeb thiab muaj tej kab li kev cai zoo thiab tseem xav tau txais kev txhim kho ntau yam uas nws xav tau, thiab yeej ntsib ntau yam teeb meem nyuaj li lwm lub teb chaws thiab, tab sis nws xav tias cov kev txhim kho ntau tshaj ob feem peb ntawm pej kum haiv uas tau mus nqes peev lagluam hauv teb chaws Nplog ntawd ces yeej tau tsim teeb meem rau tej ib puag ncig thiab muaj teeb meem rau tej neeg zejzog, raws li nws tau lus qhia rau ntawm JCU cov xov xwm.
Dr Sims hais ntxiv tias raws li nws tau mus koom ib lub rooj sab laj, ces yeej muaj neeg hais rau nws tias cov teb chaws txom nyem thiab tseem txhim kho li teb chaws Nplog yuav plam ntau yam txiaj ntsim yog lawv tseem xav kom dim ntawm cov kev txhob raug teev npe nrog cov teb chaws muaj kev txhim kho tsawg thiab (Least Developed Countries). Vim rau qhov tias yuav ua rau plan ntau yam txiaj ntsim tsis hais cov kev pab cuam rau tej kev txhim kho thiab tej txiaj ntsim lagluam uas tsis tau them se xa khoom muag txawv teb chaws ntawd.
Txawm li cas los Dr Sims hais tias, tsis xav kom muab tej teeb meem yuam tej neeg ploj tsis paub ntab ntw, tsis pub tej neeg tham tej yam tsis zoo tham los yog tej kev ua txhaum leej tig neeg txoj cai no los ua ib co qhau dag zog kom lwm tus neeg uas xav mus ua tej yam dab tsi zoo thiab pab txhim kho teb chaws Nplog tsis xav mus, tab sis xav kom yuav tsum tau xyuam xim ceev faj txawm cov neeg teb chaws muaj feem xwm tawm tau tswv yim ywj pheej zog los yuav tsis yooj yim rau tej neeg Nplog uas lawv koom ua hauj lwm ua ke. Kom lawv ua tib zoo xyuas thiaj li tau txais kev nyab xeeb, thiab tsis xav kom muab tej xwm txheej no ntaus nqe rau kis tsis zoo, vim teb chaws Nplog yeej muaj ntau yam zoo thiab.
Mloog tau SBSHmong rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm SBS Hmong Facebook thiab subscribe los sis yog download thiab mloog tau ntau cov podcasts (xov xwm ua suab) ntawm google podcasts, spotify, thiab apple podcasts los yog download SBS Radio App kom koj mloog tau SBS Hmong.
