Koj puas tau xav tias yog thaum muaj yus ib tug phooj ywg tas sim neej lawm, los sis yog muaj ib tug neeg yus hlub tshua hauv yus tsev neeg muaj mob muaj nkeeg, yuav tau mus kho thiab tas sim neej lawm yus ho yuav ntsib ntau yam xwm txheej li cas, thiab yuav ua li cas kom yus thiaj ntxeem dhau tej xwm txheej no. Michele Lis tau tsim nws zaj yeeb yam - These Other Things coj los qhia thiab piav txog tej xwm txheej uas nws ntiag tug tau ntsib tau pom rau sawv daws coj los ua yeeb yam lom zem thiab ua kev xav rau sawv daws.
Txuas ntxiv no yog tej neeg uas tau mus saib nws zaj yeeb yam no tej lus tawm tswv yim.
Michele Lee:
''‘Kuv zoo siab nas, kuv zoo siab’. Kuv zoo siab heev tias kuv tau ua cov yeeb yam no txog kuv txiv thiab ua rau kuv txiv thiab kuv zoo siab tias koj pab coj mus nthuav qhia rau ib tsoom Hmoob sawv daws. Ua tsaug ntau, ua tsaug nawb''.
Rafe Yang:
''Ua tau zoo heev. Ua tau zoo kawg li. Kuv yeej txhawj txog tej suab kuv tso nrog cov kev ua yeeb yam no tab sis zoo li kuj siv tau zoo. Thiab cov kev ua yeeb yam no teev txog ntau yam xwm txheej txog lub caij xyoo 1990s. Txawm tias tej nkauj kuv tsim yog tej nkuaj xyoo 1990s los cov nkauj no kuj yog ib co tsim rau tiam vam meej no. Tsis tas li ntawd los zaj yeeb yam no kuj yog Hmoob tsim, suav kuv nrog thiab, txawm tsis yog Hmoob nkaus xwb los kuv yeej tau tso qee yam sawv cev rau suab Hmoob thiab, txawm li cas los kuv kuj zoo siab tias txhua yam ua tau sib dhos zoo thiab. Kuv xav tias zaj yeeb yam no yog ntiag tug ib zaj dab neeg. Thiab txawm tias ua raws li Hmoob cov kev xav los yeej yogi b zaj cuam tshuam nrog sawv daws, vim yogi b zaj yeeb yam ntawm ntiag tug uas muaj tseeb qhia txog cov kev xav txog txoj kev tas sim neej''.
Oneyiwah:
''Kuv xav tias cov kev ua yeeb yam no zoo heev. Raws li kuv xav lawm ces nws yeej qhia txog nws cov kev xav tau meej tseeb heev li, thiab ua rau txhua yam lom zem, kuv nyiam tej no heev. Zaj yeeb yam no kuj qhia txog lub caij sai sai uas yuav muaj ib tug neeg yus hlub tshua ntawm yus tsev neeg yuav tas sim neej, tsis hais yog cov kev ua ntau yam yuam kev ntau yam uas pab kom yus tsev neeg muaj kev sib raug zoo tshaj qub ntxiv, thaum yus tau loj hlob tuaj. Tam sim no ces kuv pog kuj tseem mob sab heev txawm tseem tsis tau nruam sim, ces thaum Michele qhia txog nws txiv cov kev tas sim neej vim mob cancer tau ua rau kuv pheej xav txog kuv pog tam sim no''.
Pat Vammab Vaj:
''Qhov show no zoo kawg nkaus los mas, vim rau qhov tias hnub no peb tuaj xyuas Michele uas yogi b tug ntxhais Hmoob zaj dab neeg hu ua ‘These other things’ ces nws kuj hais txog kev ploj tuag txog nws cov phooj ywg, txog rau thaum nws txiv yuav tas sim neej. Nws qhia tias ua ntej nws txiv yuav tas sim neej ho zoo li cas, thiab txoj kev uas thaum ib tug neeg yus hlub tas sim neej ces yus tsis yuav coj yeeb yam zoo li cas, qhov no yog ib qho zoo kawg nkaus li nawb. Ua tsaug ntau''.
Angpao Vang Xuexa Hmong lao student RMIT:
''Kuv nyiam zaj dab neeg no heev, thiab yogi b zaj yeeb yam zoo, vim kuv tuaj ntawm Nplog teb tuaj. Kuv xav tias zaj yeeb yam no sawv cev rau neeg Hmoob thiab neeg Nplog thiab. Kuv zoo siab heev''.
Ib tug tub kawm Nplog uas tuaj kawm ntawm teb chaws Australia:
''Kuv xav tias yog ib zaj dab neeg rau sawv daws. Kuv yeej hnov tej neeg tawm tswv yim sib txawv rau tus neeg ua zaj yeeb yam no. Ib tug twg nyias yeej muaj nyias ib zaj dab neeg uas lwm tus xav paub txog thiab. Kuv xav tias nyias yeej muaj nyias ib lub tswv yim los qhia txog nyias zaj dab neeg''.
Austin Virathone:
''Kuj yogi b zaj yeeb yam uas zoo thiab lom zem uas Michele qhia txog nws zaj dab neeg no. Tsis tas li ntawd los kuj tau paub txog nws thiab nws tsev neeg me ntsis thiab. Yog ib hmo zoo, thiab yogi b zaj yeeb yam ua rau sawv daws kub siab txog zaj yeeb yam uas sau tau zoo heev thiab''.
Txooj cawv thoj:
''Zoo siab tau pom tej yam tham tau tias lub neej thaum hluas tsis xav tias yuav muaj mob thiab tas sim neej. Tab sis tam sim no ces mam nco txog thiab mam los piav txog lub neej tias muaj dab tsi thiab dab tsi. Kuj zoo siab tias peb kuj muaj ib tug Hmoob es muaj lub tswv yim los ua tej yeeb yam no. Txawm tias peb tsuas muaj ib tug ntxhais Hmoob los sau cov zaj yeeb yam no nthuav tawm xwb, los kuv ntseeg tau tias qhov no tsuas yog qhov pib xwb tseem yuav muaj ntau yam rau yav tom ntej thiab''.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
