Lub limtiam (plua) 28.10.2018 no Dr. Vam Huas Yaj muaj xov xwm tseem ceeb ntau yam hauv ntiaj teb no rau koj mloog.
Thawj cov xov xwm tseem ceeb yog txoj kev sib raug zoo ntawm 2 lub teb chaws America thiab Russia.
Tom qab America tau thim tawm ntawm tsab cai Strategic Offensive Reductions Treaty uas America tus president Renault Reagan tau kos xyeem mem tes nrog Soviet tus coj Mikhail Kabochove dhau los kom xau tau cov tso rog txias uas 2 lub teb chaws no tshuav qhov siv riam phom nuclear sib tua rau xyoo 1980s ntawd lawm, ces America tau tso nws tus nom tswj kev ruaj ntseg haiv mus nrog nom tswv tham, thiab kom John Bolton xa ib daim ntawv caw kom Russia tus coj Mr. Vladimir Putin mus ntsib America tus coj Donald Trump tim tsev dawb. Tab sis Mr. Putin yeej tseem tsis tau teb thiab tsis tau qhia tias nws puas mus raws li America cov kev caw no, vim America tau liam Russia ua ntuv zus los txog tam sim no tias Russia raus tes rau America cov kev xaiv tsa president xyoo 2016 thiab tau pab kom Mr. Donald Trump yeej los ua America tus president uas Robert Muller yeej tseem txheeb xyuas cov teeb meem no tsis tau tiav.
America cov kev thim tsis ua raws cov kev pom zoo tsis tsim thiab tsis siv cov foob pob nruab nuclear tua tau mus deb International Ballistic Missiles (IBM) no tau ua rau Mr. Putin tau hais kom Russia rov qab txhim kho Russia cov riam phom nulcear kom zoo tshaj qub ntxiv thiab nws kuj tau qhia tias Russia tau tsim tau ib cov foob pob tshiab uas zoo tshaj cov qub thiab tsis muaj peev xwm txais tau thiab nws tau hais kom Russia tsim ib cov phom tshiab uas zoo tshaj tej qub coj los siv lawm thiab.
Tos America hos thim tsis ua raws tsab cai no los twb vim yog America liam tias Russia tau muab nws cov foob pob IBM tshem mus teeb ze raws cov ciam teb sab hnub poob uas npuab rau cov teb chaws eastern European lawm.
Txij thaum lub koom haum The North Atlantic Treaty Organization (NATO) uas muaj cov teb chaws North America thiab cov teb chaws Europe sib koom ua ke pheej tau xyaum tub rog thiab coj tej tub rog mus nyob rau cov teb chaws Eastern Europe tom qab Russia tau pab thiab txeeb tau Crimea ntawm Ukraine los ua lub teb chaws ywj pheej tsis nyob qab tswj hwm ntawm Ukraine lawm ces lub koom haum NATO no thiaj txhawj xeeb heev txog tej xwm txheej no thiaj pheej xa tej peeb zej mus zov thiab ho xyaum tub rog ntau zaus.
Tab sis cov kev xyaum tub rog zaum no txij hnub tim 25.10.2018 mus txog rau tim 23.11.1018 ntawm teb chaws Norway, North Sea ntawd ces lawv xyaum tub rog txij ntawm Baltic Sea mus txog rau Iceland.
Muaj tub rog txog li 50,000 tus ntawm 31 lub teb chaws tau mus koom. Cov kev xyaum tub rog zaum no muaj tsheb hlau (tanks), lawm yam tsheb, thiab tej cuab yeej ua tsov rog nrog rau cov kev xyaum tua phom deb (sniper) training thiab xyaum dav hlau tua rog tib si.
Thiaj yog ib cov kev xyaum tub rog loj tshaj plaws hu ua "Trident Juncture 18" ntawm teb chaws Norway txij li tau muaj kev xyaum ib zaug rau lub caij xyoo 1980s dhau los ntawd.
Tham txog cov teb chaws Central America ntau lub xws li Honduras, El Savador thiab Guatemala uas muaj lawv tej pej xeem sib sau ua tsheej pab ntau txheeb tus taug kev mus rau teb chaws America thiab tseem khuam daig ntawm Mexico ntawd ces lawv qhia tias, lub hom phiaj yog xav mus komt xog teb chaws America, vim lawv raug tej nom tswv tsis kub siab, txom nyem kev noj haus, kev nkawm ntaub kawm ntawv, tsis muaj dej num ua, tsis tau txais kev nyab xeeb thiab raug tej neeg phem khuj hawv hem kom ntshai tsis pub nyiaj rau tsis xiab nyiaj rau tej neeg phem ces yuav raug teeb meem ces lawv thiaj khiav mus rau teb chaws America tab sis yog lawv mus tsawg ces yuav raug teeb meem, ces lawv thiaj sib khoom ua tsheej pab txog ntau txheeb tus mus ua ke kom tau txais kev nyab xeeb.
Tom qab UN lub koom haum saib xyuas tej me nyuam yaus hu ua UNICEF tau qhia tias muaj cov me nyuam yuav laug txog li 2,000 ua nrog cov neeg no ntau txheeb tus khiav mus ntawd muaj mob thiab cev qhuav dej, nws thiaj tau nqua hu kom tsoom hwv Mexican pab cuam dej huv rau lawv haus, nrhiav zaub mov rau lawv noj thiab nrhiav cov hygiene products rau tej me nyuam siv, ces nom tswv Mexican kuj tau los pab tej neeg tawm cov teb chaws Honduras, El Savador and Guatemala uas taug kev ua ke yuav mus rau America no lawm.
Nom tswv Mixican kuj tau qhia ntxiv tias nws yuav tso cai rau cov neeg uas twb teev zwm npe ua neeg thoj nam (refugee) lawm ua hauj lwm tau ib ntus, lawv muaj cai tau txais kev tswj kev noj qab haus huv thiab lawv tej me nyuam muaj cai mus kawm ntawv tau hauv tej teej kawm thiab.
Txawm li cas los lub hom phiaj ntawm cov neeg tsiv teb tsaws chaw no yog xav mus kom txog thiab mus kom tau rau hauv teb chaws America xwb xwb li.
Tab sis America tus thawj tsav meem (US President) Donald Trump tau qhia tias nws yuav tsis tso cai thiab tsis pub cov neeg no mus tau rau teb chaws America li. Nws twb tau sab laj nrog John Bolton uas yog America tus nom tswj kev ruaj ntseg thiab twb tau xa ib cov peeb zeej ze txog li 1,000 tus mus zov America cov ciam teb npuab teb chaws Mexico ntawd lawm.
Raws li lub chaw nthuav xov xwm Reuters tau cej luam, tsoom hwv Honduran tau qhia tias twb muaj nws cov pej xeem txog li 4,500 tus uas tau mus ntawd rov qab los rau nws lub teb chaws lawm.
Hos hais txog cov teb chaws tseem ceeb ntawm suam av Northeastern Asia li Suav tuam tshoj thiab Japan ntawd ces, Japan tus coj hu ua Shinzo Abe nrog rau nws pab neeg tseem ceeb txog li 500 leej kuj tau mus xyuas thiab mus ntsib Suav tuam tshoj tus coj thiab tej nom tseem ceeb lawm. Cov kev sib tham zaum no ua rau China thiab Japan muaj kev koom tes lagluam txog li USD 31 billion thiab cia siab tias yuav tsim kev thaj yeeb, kev phooj ywg, thiab kev koom tes nrog rau pab kom 2 lub teb chaws no los yog cov teb chaws ntawm cheeb tsam no tau txais txiaj ntsim thiab tau txais kev thaj yeeb.#
