Tos ho muaj tej neeg coob heev xav ua ib tug fan uas nyiam tej neeg muaj koob nto npe los vim ua rau lawv mloog tau tias lawv yog ib feem ntawm tej zejzog, muaj peev xwm tsim tau kev sib raug zoo hauv online los yog tsim tau kev sib raug zoo nrog tej neeg tiag thiab tsim tau cov kev sib raug zoo ib txhis.
BTS ces yog Kaus Lim qab teb ib pab txiv neej nqua yas suab K-POP uas muaj koob nto npe heev. Txhua hli twg yeej muaj neeg mus mloog lawv cov nkauj (yas suab) ntawm Spotify tshaj 28 million tus. Thiab raws li Hyundai Research Institute cov tsab ntawv cej luam uas tau tshawb fawb rau xyoo 2018 ces txheeb tau tias BTS pab khwv tau nyiaj ntau tshaj 3.6 billion dollars ib xyoos twg pab rau teb chaws Kaus Lim qab teb tej lagluam.
Ms Dela Pena uas yog ib tug tau tuaj nyob teb chaws Australia 7 xyoo dhau los hais tias 'BTS tej nkauj qhia txog qee yam dab tsi ntawm kuv lub neej, ua rau kuv tau tsim kev phooj ywg hauv online los yog tsim kev phooj ywg nrog tej neeg tiag, thiab tau ntsib tej neeg poob rau tej xwm txheej muaj ntsis sib xws li kuv, uas yog cov neeg uas nyiam pab tub nqua yas suab no.'
Nws hais ntxiv tias 'hnoob nyoog, pab pawg neeg, los yog haiv neeg yeej tsis muaj peev xwm yuav txwv txiav tau ib tug twg kom tsis txhob ua fan nrog ib pab tub nquas yas suab twg tau li. Ua ke no los cov kev tau koom ua ib tug fan tseem yuav pab kom yus paub txog tej neeg Kaus Lim tej kab lis kev cai thiab.'
Dr Ailsa Lipscombe yeej yog ib tug neeg nyiam Meskas tus poj niam nqua yas suab nto npe li Taylor Swift. Thiab nws kuj tau mus teeb txheeb txog tias vim li cas tej neeg thiaj yuav nyiam Swift ua luaj li.
Ces nws txheeb tau tias 'twb vim yog nws pheej ua rau tej neeg nco txog ib yam dab tsi ntawm yus tus kheej yav tag los.'
Dr Zena Burgess uas yog tus coj lub koom huam Australian Psychology Society hais tias tos tej neeg pheej nyiam tej neeg muaj koob nto npe los vim lawv tau tej yam dab tsi zoo los ntawm cov kev ua fan rau tej neeg no.
'Tsis hais yog ua rau yus mloog tias yus yog ib feem ntawm lub zejzog uas nyiaj tus neeg nto npe ntawd, yus yog ib tug uas muaj cov kev nyiam tus neeg ntawd tib yam li lwm tus, yog ib txoj xub ke pab kom yus tau sib ntsib sib cuag nrog lwm tus, thiab tau ua tej yam yus nyiam, thiab mloog tau tias yus yog ib feem ntawm tej yam loj tshaj yus lawm, ua rau yus mloog tau tias yus muaj ib lub hom phiaj ua ib yam dab tsi, thiab pab kom yus totaub txog tej nkauj los yog tus neeg hu nkauj ntawd,' raws li Dr Burgess hais.
Tab sis Dr Burgess kuj hais ntxiv tias 'yog tham txog Meskas tus poj niam nqua yas suab nto npe li Taylor Swift lawm ces yeej cuam tshuam txog ntau yam. Tsis hais nws tej yas suab, tej tsoom zam (fashion), tej kev ua yeeb yam, tej dab neeg qhia txog lub neej raug tsim txom, qhiav txog txoj kev nyiaj ntxeem kom yus ua tau lub neej ywj pheej, tau txais kev hwm ntawm lwm tus thiab qhia txog txoj kev tu siab rau txoj kev hlub kev sib raug zoo nrog lwm tus. Ces nws thiaj muaj ntau yam ntawm lub neej uas tej zaum tej neeg coob leej ntau tus kuj yuav tau ntsib lawm. Ces thiaj yog tej yam yooj yim tej neeg pom tias Taylor Swift sawv cev rau dab tsi.'
Dr Burgess los kuj qhia tias kuj muaj qee yam tsis zoo los ntwm cov kev ua ib tug neeg nyiam thiab qhuas tej neeg muaj koob nto npe thiab. 'Piv txwv li yog lawv lam ua tej yam dab tsi tsis tsim nyog los yog lwm tus tsis pom zoo, los yog cia li tsis koom zej tsoom lawm, ces kuj ua rau tej neeg nyiam thiab caum lawv qab nyuaj siab los sis yog mloog tau tias zoo li lawv tsis kub siab txog lawv lawm.'
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
