ဖဲလါမ့ၤ ၁၄သီအနၤန့ၣ် ကီၢ်စၢဖှိၣ်ပှၤပၢၤစ့ Jim Chalmers ဟ့ၣ်လီၤဝဲဒၣ် ၂ဝ၂၄နံၣ် စ့တိာ်ကျိၤစရီ လၢအပာ်တၢ်ပညိၣ်လၢကမၤစှၤလီၤ တၢ်အီၣ်တၢ်အီအပှ့ၤဒိၣ်ထီၣ်တၢ်ဆီၣ်သနံးဒီး စ့သွၣ်သွံလၢအကတၢၢ်တသ့ဘၣ် အတၢ်ဆီၣ်သနံးသ့ၣ်တဖၣ်န့ၣ်လီၤ.
ဖဲကီၢ်စၢဖှိၣ်ပဒိၣ်စ့တိာ်ကျဲၤအပူၤန့ၣ် ဟံၣ်ဒူၣ်သ့ၣ်တဖၣ်ဒီး ပနံးတၢ်ဖံးတၢ်မၤဆံးဆံးဖိသ့ၣ်တဖၣ် ကဒိးန့ၢ်ဘၣ်ဝဲဒၣ် ဂ့ၢ်ဂီၢ်အူတၢ်ဟ့ၣ်မၤစၢၤ ဂံၢ်သဟီၣ် အဘူးအလဲသ့ၣ်တဖၣ် လၢအလီၤလၢဝဲဒီၣ်လၣ် ၃.၅ ဘံလယၢၢ်န့ၣ်လီၤ. စးထီၣ်ဖဲလါယူၤလံ ၁သီန့ၣ် ဟံၣ်ဒူၣ်အါန့ၢ်အကကွဲၢ် ၁ဝ သ့ၣ်တဖၣ်ကန့ၢ်ဘၣ်ဝဲဒၣ် စ့တၢ်မၤစၢၤ ဂံၢ်သဟီၣ်အပှ့ၤ ဒီၣ်လၣ် ၃ဝဝ လၢဒီတနံၣ်ညါအဂီၢ်န့ၣ်လီၤ. ပနံးတၢ်ဖံးတၢ်မၤဆံးဆံးဖိလၢ အပတီၣ်အိၣ်ဒ်သိးတၢ်ပာ်ပနီၣ်အသိးသ့ၣ်တဖၣ် ကဒိးန့ၢ်ဘၣ်ဝဲဒၣ် စ့တၢ်မၤစၢၤ ဂံၢ်သဟီၣ်အပှ့ၤ ၃၂၅ ဒီလၣ် လၢဒီတနံၣ်ညါအဂီၢ်န့ၣ်လီၤ.
မ့မ့ၢ်ပှၤလၢ အဒိးန့ၢ်ဘၣ် တၢ်အိၣ်လဲဟံၣ် စ့တၢ်မၤစၢၤသ့ၣ်တဖၣ်န့ၣ် ဆူမဲာ်ညါ ၅နံၣ်တီၢ်ပူၤအဂီၢ် Commonwealth Rent Assistance ကဟ့ၣ်အါထီၣ်ဝဲ စ့တၢ်မၤစၢၤ အမျးကယၤ ၁ဝ ဒီး လၢတၢ်အံၤအဂီၢ်န့ၣ် တၢ်ကသူဝဲဒၣ် ဒီလၣ် ဘူးထီၣ်လၢ ၂ဘံလယၢၢ်ဃၣ်ဃၣ်န့ၣ်လီၤ.
အဃိပှၤလၢအဒိးန့ၢ်ဘၣ် Rent Assistance လၢအမ့ၢ် မိၢ်ထဲတဂၤ မ့တမ့ၢ် ပၢ်ထဲတဂၤ မ့တမ့ၢ် ပှၤနီၣ်ဒီမါဝၤခံဂၤလၢအဖိအိၣ် တဂၤ ဒီး ခံဂၤသ့ၣ်တဖၣ် ခံနွံန့ၣ် ကန့ၢ်ဘၣ်အါထီၣ် ဒီလၣ် ၇ဝ ဘျဲၣ်န့ၣ်လီၤ.
မ့မ့ၢ်လၢတၢ်အိၣ်ဆူၣ်အိၣ်ချ့ဒီးကသံၣ်ကသီ အဘူးအလဲအဂီၢ်န့ၣ် ပဒိၣ်ကဟ့ၣ်လီၤအါထီၣ်ဝဲဒၣ်စ့ဆူမဲဒံၢ်ခဲအအိၣ် ဒီလၣ် ၈၈၂ကကွဲၢ် — အတၢ်ပညိၣ်မ့ၢ်ဒ်သိးကမၤစၢၤပှၤအီစထြ့လယါဖိသ့ၣ်တဖၣ် ကန့ၢ်ဘၣ်ကသံၣ်ကသီ တၢ်ဆီၣ်ထွဲမၤစၢၤ လၢအတလိၣ်ဘၣ်အိၣ်ဖဲတၢ်ဆါဟံၣ်အပူၤဘၣ် အဃိ ကမ့ၢ်တၢ်မၤလီၤဟိအါထီၣ်ဝဲဒၣ် တၢ်ဆါဟံၣ်ပှၤဆါအလီၢ်မံသ့ၣ်တဖၣ်စ့ၢ်ကီးန့ၣ်လီၤ. လၢနီၣ်သးဆူၣ်ချ့ဝဲၤကျိၤသ့ၣ်တဖၣ်အဂီၢ်န့ၣ် ပဒိၣ်ကမၤအါထီၣ်ဝဲဒၣ် စ့တၢ်မၤစၢၤ ဒီလိၣ် ၃၆၂ကကွဲၢ်န့ၣ်လီၤ.
မ့မ့ၢ်တၢ်ဆါတၢ်ပှ့ၤဆူၣ်ဖၢၣ်မၣ်ကဲၣ်သ့ၣ်တဖၣ်န့ၣ် ပဒိၣ်တၢ်အိၣ်ခိးကွၢ်တၢ်ကရၢ လၢအဘၣ်တၢ်သ့ၣ်ညါအီၤဒ် ACCC ကအိၣ်ခိးကွၢ် သမံသမိးဝဲ တၢ်ပာ်ပနီၣ်တၢ်ဖိတၢ်လံၤအပှ့ၤသ့ၣ်တဖၣ်န့ၣ်လီၤ. တၢ်သမံသမိးထံအံၤ တၢ်မၤအီၤ ၁၂လါဒီး မ့ၢ်ထံၣ်န့ၢ် တၢ်ခီပတာ်တၢ်ဘျၢဒိၣ်ဒိၣ်မုၢ်မုၢ်တခါခါန့ၣ် တၢ်ဆါဖၠါသ့ၣ်တဖၣ်အံၤ ကဘၣ်ဝဲဒၣ်တၢ်ကမၣ် စ့အီၣ်လီးအမျးကယၤ ၁ဝ န့ၣ်လီၤ.
ပှၤလၢ အဒိးန့ၢ်ဘၣ် JobSeeker စ့တၢ်မၤစၢၤသ့ၣ်တဖၣ် စ့ၢ်ကီးကန့ၢ်ဘၣ်အါထီၣ်ကျိၣ်စ့တၢ်မၤစၢၤ လၢအကစးထီၣ်အသးဖဲလါစဲၤပထ့ဘၢၣ်အလၢၤန့ၣ်လီၤ.
