မဲလ်ဘၢကညီသးစၢ် စီၤစါလ့မၠ့ၣ် မ့ၢ်ပှၤတဂၤလၢ အပာ်ဖျါထီၣ်ဒီး ကၢၤဃးက့ၤကညီလုၢ်လၢ်ဆဲးလၤတၢ်ဂဲၤကလံၣ် “ဒိ” ဒ်အမ့ၢ်ပှၤနဲၣ်လိ တၢ်ဂဲၤကလံၣ် “ဒိ” သရၣ်တဂၤန့ၣ်လီၤ.
အဝဲအသးနံၣ်မ့ၢ်အိၣ်ဒၣ်ထဲ ၂၆ နံၣ် နာ်သက့ အဝဲမ့ၢ် Australian Karen Preserving and Promoting History, Cultural Association - AKP တၢ်ကရၢကရိအံၤ အပှၤပၢၤလီၢ်ဆ့ၣ်နီၤ ၂ ဂၤတဂၤဒီး မ့ၢ်စ့ၢ်ကီးသးစၢ်တဂၤလၢအဒိးသူအသးလၢပှၤတဝၢ တၢ်မုာ်သးမၤကလီ အတၢ်ဖံးတၢ်မၤသ့ၣ်တဖၣ်န့ၣ်လီၤ.
ခဲကနံၣ်အံၤမ့ၢ်လၢတၢ်ဆၢကတီၢ်ဘူးထီၣ်လံလၢတၢ်ကမၤလၤကပီၤကညီနံၣ်ထီၣ်သီမူးအဃိ တၢ်ဆၢကတီၢ်မ့ၢ်အိၣ်စှၤဘၣ်ဆၣ်သနာ်က့ စါလ့ ကျဲးစၢးကရၢကရိထီၣ်ဝဲဒၣ် ပှၤသးစၢ်ဒီး ပှၤမုၢ်ပှၢ်သ့ၣ်တဖၣ် ဒီးနဲၣ်လိအဝဲသ့ၣ်တၢ်ဂဲၤကလံၣ်“ဒိ” လၢကလဲၤဂဲၤကလံၣ်ပာ်ဖျါထီၣ်ကညီတၢ်ဆဲးတၢ်လၤဖဲ ဝံးထိရံယါကီၢ်စဲၣ် ကညီတဝၢသ့ၣ်တဖၣ် အတၢ်မၤလၤကပီၤ ကညီနံၣ်ထီၣ်မူးပူၤအဂီၢ်န့ၣ်လီၤ.
Victoria Karen Communities Network Group — ဝံးထိရံယါကညီတဝၢပှာ်ဘျးစဲကရူၢ် — VKCNG လၢအမ့ၢ်ကတဝၢပာ်ဖှိၣ်ဖဲဝံးထိရံယါကီၢ်စဲၣ်အပူၤခဲကလၢာ်ဖီၣ်လိာ်စုမၤသကိးတၢ်ကရူၢ် ရဲၣ်ကျဲၤလၢ ကမၤလၤကပီၤဝဲဒၣ် ကညီနံၣ်သီ တနံၣ်အံၤဖဲ လါဒံၤစဲဘၢၣ် အသီ ၁ဝ ဖဲ Horsham တၢ်လီၢ် လၢအအိၣ်ဖဲ ဝံးထိရံယါကီၢ်စဲၣ်မုၢ်နုာ်တကပၤန့ၣ်လီၤ.
စါလ့ဒီး အသကိးပှၤစၢ် ဃုာ်ဒီး ပှၤမုၢ်ပှၢ်သ့ၣ်တဖၣ် ထီဘိန့ၣ် ပာ်ဖျါထီၣ်ဝဲဒၣ် ကညီတၢ်ဂဲၤကလံၣ် “ဒိ” ဖဲကညီဖိမုၢ်နံၤဒိၣ်မုၢ်နံၤထီ လၢအပၣ်ဃုာ် ကညီနံၣ်ထီၣ်သီအမူး, ကညီဖိလါခူးကံၢ်စုအမူးဒီး ကညီဒီကလုာ်မုၢ်နံၤ တၢ်မၤလၤကပီၤအမူးသ့ၣ်တဖၣ်န့ၣ်လီၤ.
