ကညီမိၢ်သးစၢ် နီၣ်စရံနၣ်ရွ့ၣ် ခဲကနံၣ်အံၤအိၣ်ဆိးဖဲအီစထြ့လယါကီၢ် ကလံၤစိၤတၢ်ပၢဟီၣ်ကဝီၤဒိၣ်အဝ့ၢ်ခိၣ် ဒါဝ့ဝ့ၢ်တဂၤ ဖဲတယံၤဒ်ဘၣ်န့ၣ် ဖျိထီၣ်ဝဲ ဖၠၣ်စိမိၤတီၤဒိၣ်ခံတီၤတတီၤလၢအဘၣ်ဃးသဲစးတၢ်ဘျၢအဂ့ၢ် Master of Law ဒံၢ်ကရံၣ် န့ၣ်လီၤ.
အဝဲဖျိထီၣ်ဖၠၣ်စိမိၤတီၤဒိၣ်အံၤဖဲ University of New South Wales လၢအမၤလိလီၤဆီဘၣ်ဃး ထံဂုၤကီၢ်ဂၤသဲစးအဂ့ၢ်ဒီး ပှၤဟီၣ်ခိၣ်ဖိခွဲးယာ်ဒီးသနူဂ့ၢ်ဝီ အဂ့ၢ်န့ၣ်လီၤ.
စရံ အိၣ်ဒီး အဖိခံဂၤ ဖိမုၣ်ဖိတဂၤဒီး အဖိခွါဆံးဖိတနံၣ်ဘျဲၣ်တဂၤ အတၢ်မၤလိမၤဒိး တၢ်လဲၤကျဲအံၤ တမ့ၢ်တၢ်လၢအဝဲမၤန့ၢ်အီၤ ညီညီဖိဘၣ် နာ်သက့ အဝဲတၢ်ကျဲးစၢးဒီး တၢ်ထဲးဂံၢ်ထဲးဘါအဃိ မၤန့ၢ်ဝဲဒၣ် တၢ်မၤလိအသူးအသၣ်အံၤန့ၣ်လီၤ.
ဖဲအဝဲမၤလိတၢ်အဆၢကတီၢ်န့ၣ် စရံ အနီၣ်ကစၢ်ဒၣ်ဝဲ မၤစ့ၢ်ကီးတၢ်ဖံးတၢ်မၤဖဲ Legal Aids သဲစးတၢ်မၤစၢၤဝဲၤကျိၤ လၢအအိၣ်ဖဲဒါဝ့ဝ့ၢ် ဒီး ဘၣ်ကွၢ်ထွဲစ့ၢ်ကီးအဖိမုၣ်ဖိ မ့ၢ်လၢ တဘျီတခီၣ်န့ၣ် အဝဲအဝၤ လၢအမ့ၢ်အီစထြ့လယါသုးအပှၤဘၣ်မူဘၣ်ဒါတဂၤ ဘၣ်လဲၤလီၤမူဒါလၢတၢ်လီၢ်ယံၤ အဃိန့ၣ်လီၤ နာ်သက့ တၢ်တာ်တၢ်သ့ၣ်တဖၣ် မ့ၢ်အိၣ်အကလုာ်ကလုာ်နာ်သက့ စရံစံးလၢ အဝဲတမ့ၢ်ပှၤတဂၤ လၢအဟ့ၣ်ရှူတၢ် ဟ့ၣ်ဃၣ်ကွံာ်တၢ် ညီကဒၣ်ဖိဘၣ်န့ၣ်လီၤ.
Share
