ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn
Dr. Cynthia Maung စံးဝဲဒၣ် မ့ၢ်လၢထံဂုၤကီၢ်ဂၤ အတၢ်ဆီၣ်ထွဲမၤစၢၤသ့ၣ်တဖၣ် ဒီၣ်တဲာ်ကွံာ်အသးအဃိ ကီၢ်ပယီၤ—ကၠီၣ်တဲၣ်ကီၢ်, ထံဆၢကီၢ်ဆၢဒီတကျိၤ ဃုာ်ဒီးအဝဲသ့ၣ် မဲၢ်တီၢ်ကသံၣ်ဒၢး ဘၣ်ကွၢ်ဆၢၣ်မဲာ် တၢ်ဃံးတၢ်စ့ၤ ဟဲအါထီၣ် တကးဒ်ဘၣ် စးထီၣ်ဖဲ ၂ဝ၂၁နံၣ် ပယီၤသုးပဒိၣ် ဟံးန့ၢ်ဆူၣ်ကွံာ်ထံကီၢ်တၢ်စိတၢ်ကမီၤန့ၣ် အဝဲသ့ၣ် ကသံၣ်ဒၢးအပူၤ ပှၤဆါသ့ၣ်တဖၣ်ဟဲအါထီၣ်ဝဲဒၣ်ခံဆးန့ၣ်လီၤ.
ကတီၢ်ဖဲလၢအဝဲဟဲတုၤဖဲမဲလ်ဘၢဝ့ၢ်အခါ ဘၣ်ဃးဒီး အဝဲတၢ်ဟဲထံၣ်လိာ်တၢၣ်ပီၣ်တၢ်ဂ့ၢ်တၢ်ကျိၤဒီးပဒိၣ်ပပှၢ်သ့ၣ်တဖၣ်ဒီး ထံဆၢကီၢ်ဆၢ ဆူၣ်ချ့ တၢ်အိၣ်သးအဂ့ၢ် လၢခံကတၢၢ်သ့ၣ်တဖၣ်န့ၣ် SBS ကညီကျိာ်တၢ်ရဲၣ်တၢ်ကျဲၤ ယၤ ရှါဖီၤ ပထံၣ်လိာ်တဲသကိးဘၣ်တၢ်ဒီးအီၤန့ၣ်လီၤ. ခဲကနံၣ်အံၤန့ၣ် ပကဆဲးပာ်ဖျါဝဲဒၣ် ပတၢ်ထံၣ်လိာ်သံကွၢ်အီၤတၢ်ဂ့ၢ်တၢ်ကျိၤသ့ၣ်တဖၣ် ဒ်သိးတၢ်ပာ်ဖျါအကူာ် (၂) အသိးန့ၣ်လီၤ.
နုာ်လီၤဒိကနၣ်တၢ်သံကွၢ်စံးဆၢဒီး Dr. Cynthia Maung အကူာ် (၁) ဖဲအံၤ:
Dr. Cynthia Maung လၢအဘၣ်တၢ်သ့ၣ်ညါစ့ၢ်ကီးအီၤလၢ သရၣ်မုၣ် စ့ၣ်သံၣ်ယၣ်, မ့ၢ်ဝဲကညီကသံၣ်သရၣ်မုၣ်ဖးဒိၣ်လၢအတီခိၣ်ရိၤမဲ မဲၢ်တီၢ် ကသံၣ်ဒၢး—Mae Tao Clinic လၢအအိၣ်ဖဲဝ့ၢ်မဲၢ်ဆီး, ကၠီၣ်တဲၣ်ကီၢ် ဒီး အဝဲကသံၣ်ဒၢးအံၤ အံးထွဲကွၢ်ထွဲ ကူစါယါဘျါဝဲ ကီၢ်ပယီၤပှၤသုးလီၢ်အိၣ်ဆိး ပှၤမၤတၢ်ဖိသ့ၣ်တဖၣ်ဒီး ထံလီၢ်ကီၢ်ပူၤ ပှၤဘၣ်ကီဘၣ်ခဲလၢအဘၣ်ဃ့ၢ်မှံဟးဖျိးသ့ၣ်တဖၣ် န့ၢ်ဝဲ ၃၇နံၣ်လံ.
ခီဖျိလၢအဝဲဟ့ၣ်လီၤသး ဂဲၤလိာ်မၤစၢၤတၢ် လၢကီၢ်ပယီၤ တၢ်မုာ်တၢ်ခုၣ်အဂီၢ် လီၤဆီဒၣ်တၢ်လၢ ကမျၢၢ်ဆူၣ်ချ့တၢ်အံးထွဲကွၢ်ထွဲအဂီၢ်အဃိ Dr Cynthia Maung ဒိးန့ၢ်ဘၣ်ဝဲဒၣ် 2013 Sydney Peace Prize ခိၣ်ဖးတၢ်လၤကပီၤန့ၣ်လီၤ.
ဖဲလါဖ့ၤဘြူၤအါရံၤဘူးကလၢၤဒီး လါမးရှးထီၣ်သီ အခီၣ်ထံးတနွံအတီၢ်ပူၤ အဝဲဟဲဖဲအီစထြ့လယါကီၢ်အခါ လဲၤတ့ၢ်ဝဲဒၣ်ဖဲဝ့ၢ်သၢဖျၢၣ်, မဲလ်ဘၢ, ဆ့ၣ်ဒနံၤဒီး ဝ့ၢ်ခိၣ်ခဲဘါရါ လၢအဝဲထံၣ်လိာ်သးဒီးကညီကလုာ်ကရူၢ်ကရၢသ့ၣ်တဖၣ်ဒီး ပှၤဂဲၤလိာ်တၢ်လၢကီၢ်ပယီၤတၢ်မၤတၢ်ခုၣ်အဂီၢ်သ့ၣ်တဖၣ်န့ၣ်လီၤ.
အဝဲအတၢ်ဟဲဖဲအီစထြ့လယါကီၢ်တဘျီအံၤန့ၣ် ဘၣ်တၢ်ဆီၣ်ထွဲမၤစၢၤကွဲမုာ်အီၤလၢ အီစထြ့လယါကညီကလုာ်ကရၢ (AKO)ဒီး Burmese Community Development Collaboration (BCDC) န့ၣ်လီၤ.
