လါအ့ဖြ့ၣ် ၂၅သီအနံၤ ဒ်အမ့ၢ် Anzac Day — အဲၣ်န်ဇဲၣ်မုၢ်နံၤ အသိး ကညီဖိလၢအဟဲတုၤအိၣ်ဆိးဖဲ အီစထြ့လယါကီၢ်ပူၤသ့ၣ်တဖၣ် ပာ်ဒိၣ်ပာ်ကဲ မၤလၤကပီၤသကိး စ့ၢ်ကီးမုၢ်နံၤအံၤန့ၣ်လီၤ.
အီစထြ့လယါကီၢ်ပူၤအံၤ Anzac အမုၢ်နံၤန့ၣ် တၢ်ပာ်ပနီၣ်အီၤဒ်အမ့ၢ် တၢ်သ့ၣ်နီၣ်မၤလၤကပီၤ အီစထြ့လယါကီၢ်ဒီး နယူဇံၣ်လဲၣ်ကီၢ် ပှၤသုးဖိသ့ၣ်တဖၣ် ဃုာ်ဒီး ကလုာ်ဒူၣ်ဆဲးလၤအါကလုာ် ပှၤသုးဖိသ့ၣ်တဖၣ် အတၢ်ဟ့ၣ်လီၤသးလၢထံကီၢ်ဒီးကလုာ်ဂီၢ်န့ၣ်လီၤ.
ကညီဖိလၢအဟဲတုၤအိၣ်ဆိးဖဲအီစထြ့လယါကီၢ်ပူၤ လၢအနုာ်လီၤကဲသုးဖဲ အီစထြ့လယါတၢ်ဒီသဒၢဝဲၤကျိၤအပူၤ အနီၣ်ဂံၢ် အိၣ်အါထီၣ်ဝဲဒၣ်ကွ့ၢ်ကွ့ၢ်န့ၣ်လီၤ.
အဃိဖဲမုၢ်နံၤဆၢကတီၢ်အံၤ ပကပာ်ဖျါထီၣ်ဝဲဒၣ် ကညီဖိလၢအကဲသုးဖဲ အီစထြ့လယါကီၢ်တၢ်ဒီသဒၢဝဲၤကျိၤအပူၤ တဂၤ အဟံၣ်ဖိဃီဖိ တၢ်ပာ်သးလၢအဘၣ်ဃး Anzac Day — အဲၣ်န်ဇဲၣ်မုၢ်နံၤအံၤန့ၣ်လီၤ.
ကညီဖိလၢအနုာ်လီၤကဲသုးဖဲ အီစထြ့လယါသုးပူၤအကျါန့ၣ် ပၣ်ဃုာ်ဒီး စီၤတီဒိၣ်မူ အဖိခွါ စီၤကီၢ်ဖျိးစိန့ၣ်လီၤ.
စီၤကီၢ်ဖျိးစိအပၢ် စီၤတီဒိၣ်မူ စံးဝဲဒၣ် အဖိခွါနုာ်လီၤကဲသုးဖဲ အီစထြ့လယါသုးပူၤအဃိ အဝဲပာ်ကဖၢလၢဘၣ်အသး ဒ်အမ့ၢ် တၢ်ဟ့ၣ်ဆၢက့ၤ အီစထြ့လယါကီၢ် အပှၤတဝၢတၢ်ဘျုးတၢ်ဖှိၣ်တခါအသိးန့ၣ်လီၤ.
