ခဲကနံၣ်အံၤ တၢ်စးထီၣ်ဟ့ၣ်လီၤတၢ်ဖး ဒ်သိး တၢ်ဟံးန့ၢ်ကမျၢၢ်တၢ်ဘၣ်သး လၢတၢ်ကပာ်ပနီၣ် ပှၤထူလံၤဖိခၢၣ်စးဖဲဘျီၣ်ဒိၣ်အပူၤအဂီၢ်လံန့ၣ်လီၤ.
လါအီးကထိဘၢၣ် ၁၄သီအနံၤန့ၣ် မ့ၢ်ဝဲဒၣ် တၢ်ဟ့ၣ်တၢ်ဖးလၢတၢ်ကပာ်ပနီၣ် ပှၤထူလံၤဖိခၢၣ်စးဖဲဘျီၣ်ဒိၣ်အပူၤ The Indigenous Voice to Parliament အဂီၢ်အမုၢ်နံၤ ဒီး ကမ့ၢ်ဝဲတၢ်ဟ့ၣ်တၢ်ဖးလၢခံကတၢၢ်တနံၤန့ၣ်လီၤ.
ခီဖျိလၢနတၢ်အိၣ်ဆူၣ်အိၣ်ချ့ မ့တမ့ၢ် ဟးတကဲလဲၤတကဲဘၣ်အဃိမ့ၢ်ဂ့ၢ်ဂ့ၤ, နဘၣ်ကွၢ်ထွဲပှၤတဂၤဂၤအဃိ လဲၤတၢ်က့ၤတၢ်တချုးဘၣ်မ့ၢ်ဂ့ၤ, ဖဲတၢ်ဟ့ၣ်တၢ်ဖးအမုၢ်နံၤန့ၣ် နကအိၣ်ယံၤဒီး တၢ်ဟ့ၣ်တၢ်ဖးအလီၢ်အါန့ၣ် ၈ကံလိမံထၢၢ်မ့ၢ်ဂ့ၤ, နပတံထီၣ်လၢ နကဟ့ၣ်လီၤတၢ်ဖးခီဖျိ တၢ်ဆှၢအီၤဆူလံာ်တၢးတဆီသ့ဝဲန့ၣ်လီၤ.
တၢ်ဟ့ၣ်တၢ်ဖးလၢ တၢ်ဆှၢခီဖျိအီၤဖဲလံာ်တၢးတဆီ အလံာ်တကွီၣ်ဒိသ့ၣ်တဖၣ်န့ၣ် ဘၣ်တၢ်ပာ်ထီၣ်ဝဲဒၣ်အီၤဖဲ အီစထြ့လယါတၢ်ဃုထၢခီမ့ရှၢၣ် A-E-C အလီပှာ်ယဲၤသန့အပူၤ ဒီး တၢ်ကဘၣ်မၤဝံၤဝဲဒၣ်အီၤဖဲ လါအီးကထိဘၢၣ် ၁၁သီ တနံၤအံၤ တချုး ဟါခီ ၆နၣ်ရံၣ်ဒ်ဘၣ်န့ၣ်လီၤ.
မ့မ့ၢ်လၢတၢ်ဟ့ၣ်တၢ်ဖးအမုၢ်နံၤန့ၣ် နတၢ်ဟ့ၣ်တၢ်ဖးအလံာ်က့န့ၣ် နကဘၣ်မၤပှဲၤ ဒီး မၤတံၢ်ဝဲဒၣ်အီၤဂ့ၤဂ့ၤ တချုးလၢ ဟါခီ ၆နၣ်ရံၣ်ဘၣ်ဒ်ဘၣ် ဒီး ကဘၣ်တုၤဝဲဒၣ်ဆူ A-E-C အအိၣ် လၢအတဘၣ်စဲၤခံန့ၢ်ဒ်လါအီးကထိဘၢၣ် ၂၇သီဘၣ်န့ၣ်လီၤ.
ဖဲတၢ်ဟ့ၣ်တၢ်ဖးအမုၢ်နံၤန့ၣ် နမ့ၢ်လဲၤဆူ ထံချၢကီၢ်ချၢတခီ နဟ့ၣ်လဲၤဟ့ၣ်လီၤတၢ်ဖးဖဲ အီစထြ့လယါမီၣ်သီဝဲၤဒၢး Australian Embassies, Consulates ဒီး High Commissions ဝဲၤဒၢး သ့ဝဲဒၣ် ဒီး အီစထြ့လယါမီၢ်သီဝဲၤဒၢးသ့ၣ်တဖၣ်အံၤ အိၣ်ဝဲဒၣ်ဖဲ ဝ့ၢ်အဖျၢၣ် ၁ဝ၈ ဖျၢၣ် လၢအအိၣ်သကုၤ ဟီၣ်ခိၣ်ဒီဘ့ၣ်န့ၣ်လီၤ.
ပှၤလၢအမဲာ်ချံတထံၣ်တၢ်ဘၣ်, မ့တမ့ၢ် အမဲာ်ချံတၢ်ထံၣ်တဂ့ၤကဲၣ်ဆိးဘၣ်သ့ၣ်တဖၣ်ဒီး ပှၤလၢအအိၣ်ဖဲ Antarctica အပူၤသ့ၣ်တဖၣ် တၢ်အိးထီၣ်ပာ်စ့ၢ်ကီးန့ၢ်အဝဲသ့ၣ်လၢကဟ့ၣ်လီၤတၢ်ဖးဖဲလီတဲစိအပူၤတဆီန့ၣ်လီၤ.
ဖဲလါအီးကထိဘၢၣ် ၁၄သီအနံၤန့ၣ် နမ့ၢ်တအိၣ်ဖဲနဟီၣ်ကဝီၤအပူၤဘၣ်တခီ, နဟ့ၣ်လဲၤဟ့ၣ်လီၤတၣ်ဖး ဖဲတၢ်ဟ့ၣ်တၢ်ဖးအလီၢ် တဖျၢၣ်ဂ့ၤတဖျၢၣ်ဂ့ၤသ့ဝဲဒၣ် သကုၤ ကီၢ်စဲၣ်ဒီး ကဝီၤဒိၣ်တၢ်ပၢဖဲနလဲၤတုၤအိၣ်အလီၢ် ဒီး နမ့ၢ်လိၣ်ဘၣ်တၢ်ဂ့ၢ်တၢ်ကျိၤဘၣ်ဃး ကီၢ်စဲၣ်အဂုၤအဂၤ တၢ်ဟ့ၣ်တၢ်ဖးအလီၢ်န့ၣ် A-E-C ပာ်ဖျါထီၣ်ပာ်ဝဲဒၣ်ဖဲ အဝဲသ့ၣ် အလီပှာ်ယဲၤသန့အပူၤန့ၣ်လီၤ.
တၢ်အလီၢ်ခံကတၢၢ်တခါလၢ ပှၤဟ့ၣ်တၢ်ဖးသ့ၣ်တဖၣ် ကဘၣ်ပာ်သူၣ်ပာ်သးဒီးသ့ၣ်ညါအီၤန့ၣ်မ့ၢ်ဝဲဒၣ် ဖဲတၢ်ဟ့ၣ်တၢ်ဖးလံာ်က့အလိၤန့ၣ် နကဘၣ်ကွဲးလီၤဒၣ်ထဲ - YES မ့တမ့ၢ် NO တဖျၢၣ်ဧိၤန့ၣ်လီၤ.
နမ့ၢ်အဲၣ်ဒိးသ့ၣ်ညါအါထီၣ်တၢ်ဂ့ၢ်တၢ်ကျိၤဘၣ်ဃး တၢ်ဟံးန့ၢ်ကမျၢၢ်တၢ်ဘၣ်သးအဂ့ၢ်န့ၣ် နလဲၤအိၣ်သကိး ဃုသ့ၣ်ညါအါထီၣ်အီၤဖဲ SBS Voice Referendum အလီပှာ်ယဲၤသန့ www.sbs.com.au/voicereferendum အပူၤ သ့ဝဲဒၣ်န့ၣ်လီၤ.
