တၢ်ကဘှီဘၣ်မၤဂ့ၤထီၣ် အီစထြ့လယါ ပှၤနုာ်ကီၢ်သနူ လၢအဘံဘူလီၤဂာ်ဒ်သိးခီနီဘိ

ပှၤသ့ပှၤဘၣ်စဲၤနီၣ်ကရူၢ်အံၤ အတၢ်သမံသမိးကွၢ်အပူၤန့ၣ် ထံၣ်ဘၣ်ဝဲလၢ ပှၤနုာ်ကီၢ်ဝဲၤကျိၤသနူအံၤ အတမၤတၢ်မၤဘၣ်အမဲာ်ညါန့ၣ် သနူအံၤ ဒုးအိၣ်ထီၣ်ဝဲ ခိၣ်ဃၢၤတၢ်အိၣ်သးလၢ တၢ်ကအီၣ်တူၢ်အီၣ်ကလီၤ ဟံးန့ၢ်တၢ်ဘျုးတၢ်ဖှိၣ်လၢ ပှၤလၢအအိၣ်ဟဲန့ၢ်လၢထံချၢကီၢ်ချၢသ့ၣ်တဖၣ်အဖီခိၣ်စ့ၢ်ကီးန့ၣ်လီၤ.

ဒ်အမ့ၢ်တၢ်စံးဆၢကဒါက့ၤ တၢ်ကွၢ်သမံသမိးက့ၤတၢ်ဖံးတၢ်မၤအံၤအသိး Ms O'Neil ပာ်ဂၢၢ်ပာ်ကျၢၤဝဲဒၣ်လၢ တၢ်ဟ့ၣ်ကူၣ်ဟ့ၣ်ဖးသ့ၣ်တဖၣ်အကျါ ၂ခါန့ၣ် တယံၤလၢၤဘၣ်အတီၢ်ပူၤ တၢ်ကမၤကဲထီၣ်လိၣ်ထီၣ်အီၤန့ၣ်လီၤ.

တခါန့ၣ်မ့ၢ်ဝဲ တၢ်ကပာ်ပနီၣ်န့ၣ် တၢ်ဖံးတၢ်မၤအဘူးအလဲအအါကတၢၢ်လၢ ပှၤသုးလီၢ်အိၣ်ဆိး တၢ်မၤဖိ လၢအဟဲန့ၢ်လၢ ထံချၢကီၢ်ချၢသ့ၣ်တဖၣ်အဂီၢ် လၢအမ့ၢ် ခဲကနံၣ်အံၤ လါလဲတနံၣ်အဂီၢ် တၢ်ပာ်ပနီၣ်အိၣ်ဝဲ ဒီလၣ် ၅၃,ဝဝဝ အလီၢ်န့ၣ် တၢ်ကဆီတလဲမၤအါထီၣ်အီၤဆူ တနံၣ် ဒီလၣ် ၇ဝ,ဝဝဝ ဒီး တၢ်ကစးထီၣ်အီၤဖဲ လါယူၤလံ ၁သီန့ၣ်လီၤ.

Ms O'Neil စံးစ့ၢ်ကီးဝဲဒၣ်လၢ မ့ၢ်လၢတၢ်ပာ်ပနီၣ် လါလဲအအါကတၢၢ် လၢတနံၣ်အဂီၢ်န့ၣ် ထဲဒၣ် ဒီလၣ် ၅၃,ဝဝဝ အဃိ ထုးန့ၢ်ပှၤအိၣ်ဒီး တၢ်သ့တၢ်ဘၣ် အကံၢ်အစီထီၣ်ဘး လၢအအိၣ်ဖဲကီၢ်ချၢသ့ၣ်တဖၣ်အသးတန့ၢ်ဘၣ်န့ၣ်လီၤ.