တၢ်ကလုၢ်တဖၣ်: https://www.sbs.com.au/language/karen/kar/collection/podcast/0ms9u5vjn
အီစထြ့လယါကီၢ်ပူၤအံၤ သဲစးတၢ်ဘျၢလီၤတံၢ်လီၤဆဲးလၢ ယီၣ်ကူၣ်ဆး (AI) အဂီၢ်တအိၣ်ဘၣ်.
မ့ၢ်လၢကီၢ်စၢဖှိၣ်တၢ်ဃုထၢဘူးထီၣ်လံအဃိ, ပှၤတီခိၣ်ရိၤမဲပၢဆှၢတၢ်အခိၣ် —၂ ဖဲ Tech Policy Design Institute ကရၢ Zoe Jay Hawkins စံးဝဲဒၣ်, တချုးတၢ်လဲၤဃီၤဆူတၢ်ဟ့ၣ်တၢ်ဖးအလီၢ်သ့ၣ်တဖၣ်ဒ်ဘၣ်အခါ “လၢအီစထြ့လါယကီၢ်ကဘှီဘၣ်မၤဂ့ၤထီၣ် သဲစးတၢ်ဘျၢဖးဒိၣ်တခါခါအဂီၢ်န့ၣ် စဲၤခံဒိၣ်မးလံန့ၣ်လီၤ.”
ဖဲတၢ်မၤတၢ်ဟူးတၢ်ဂဲၤလၢတၢ်ဃုထၢအဂီၢ်အခါ တၢ်ဂ့ၢ်လၢတၢ်တ့ဒုးအိၣ်ထီၣ်န့ၢ်ဒီး ယီၣ်ကူၣ်ဆး (AI) သ့ၣ်တဖၣ် မ့ၢ်တၢ်အယီၤအဘျၣ် မ့တမ့ၢ် တၢ်အမ့ၢ်အတီဧါန့ၣ် အိၣ်ဒၣ်လၢ ပှၤဟ့ၣ်တၢ်ဖးသ့ၣ်တဖၣ် ကဘၣ်ဆၢတဲာ်အီၤန့ၣ်လီၤ.
အီစထြ့လယါကီၢ်တၢ်ဃုထၢခီမ့ရှၢၢ် အပှၤကတိၤတၢ်ပၢ, Alex Morris စံးဝဲ, “အိၣ်ဒီးတၢ်ပလီၢ် နာ်သက့ တဘၣ်ထိၣ်ဟူးထိၣ်ဂဲၤတၢ်တဂ့ၤ”.
“နမ့ၢ်ထံၣ်တၢ်ဂ့ၢ်တခါခါ, နအုၣ်ကီၤအီၤလၢအမ့ၢ်တၢ်အမ့ၢ်အတီ တန့ၢ်ဘၣ်, နတသ့ၣ်ညါလီၤတံၢ်လၢအမ့ၢ် တၢ်လၢအဘၣ် ဘၣ်န့ၣ်, တချုးနသမံသမိးထံအီၤဒ်ဘၣ်န့ၣ် တဘၣ်ဟးနီၤလီၤဝ့ၤဝီၤအီၤတဂ့ၤ.”
တၢ်ပာ်ဖျါအကူာ်အံၤအပူၤန့ၣ် ပာ်ဖျါဝဲတၢ်ဂ့ၢ်လၢအမ့ၢ် ၂ဝ၂၅ ကီၢ်စၢဖှိၣ်တၢ်ဃုထၢဘူးထီၣ်လံအဃိ လၢယီၣ်ကူၣ်ဆး (AI) အအိၣ်န့ၣ် ပှၤအီစထြ့လယါသ့ၣ်တဖၣ်မုၢ်လၢ်တၢ်မနုၤသ့ၣ်တဖၣ်သ့လဲၣ်အဂ့ၢ်န့ၣ်လီၤ.
နမ့ၢ်ထံၣ်တၢ်ဂ့ၢ်လၢတၢ်တ့ဒုးအိၣ်ထီၣ်န့ၢ်အီၤ မ့တမ့ၢ် တၢ်ဂ့ၢ်တခါခါလၢအအိၣ်ဒီးတၢ်သံကွၢ် ဘၣ်ဃးတၢ်ဃုထၢန့ၣ်, နဒုးသ့ၣ်ညါဘၣ်ပှၤသ့ဝဲန့ၣ်လီၤ.
