One Nation ဆှၢနုာ်လီၤသနူတခါ လၢကပျဲဝဲ ဟံၣ်ကစၢ်သ့ၣ်တဖၣ်ဒီး ပှၤအိၣ်လဲဟံၣ်သ့ၣ်တဖၣ် ကန့ၢ်ထုးထီၣ်ဘၣ်အဝဲသ့ၣ် စူဖၢၣ်—မံၤတုၤပှၢ်တီၤကတီၢ်အဂီၢ်စ့ပာ်ဖှိၣ်သ့ၣ်တဖၣ် ဆိဆိ လၢကဟ့ၣ်လီၤ တၢ်အဘူးအလဲသ့ၣ်တဖၣ်အဂီၢ်န့ၣ်လီၤ. ဘၣ်ဃးဒီး တၢ်ဆှၢနုာ်လီၤသနူအံၤန့ၣ် ပဒိၣ်ကထုးသံကွံာ်အီၤ, ဒီးမ့မ့ၢ်လၢ ပှၤထီဒါတၢ်ကရၢဒီး ပှၤသ့ပှၤဘၣ်စဲၤနီၣ်လၢမုၢ်ကျိၤဝဲၤကွာ်ဂ့ၢ်ဝီသ့ၣ်တဖၣ်တခီ ဟ့ၣ်ပလီၢ်ဝဲလၢ သနူအံၤ ကမၤအါထီၣ်ဝဲဒၣ် စ့သိၣ်သွံ လၢအမ့ၢ်စ့အလုၢ်အပှ့ၤကလီၤဒိၣ်ထီၣ်, ဒီး ကဒုးကဲထီၣ်ဝဲ တၢ်ကဘၣ်မၤအါထီၣ်ကဒီးစ့အ့ၣ်သ့ၣ်တဖၣ် ဒီး ခါဆူညါန့ၣ် တၢ်ဆီၣ်သနံးကအိၣ်အါထီၣ်ဒီး တၢ်အိၣ်ဆိးအဘူးအလဲ အတၢ်လၢာ်ဘူၣ်လၢာ်စ့သ့ၣ်တဖၣ်န့ၣ်လီၤ.
ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn
One Nation အတၢ်ရဲၣ်တၢ်ကျဲၤဒိၣ်ဒိၣ်မုၢ်မုၢ်လၢ တၢ်ဒုးထီဒါ ဟံၣ်ဃီတၢ်ကိၢ်တၢ်ဂီၤတၢ်ဆီၣ်သနံးသ့ၣ်တဖၣ်အဂီၢ်န့ၣ် တၢ်ဆဲးတူၢ်ဘၣ်ဒံးဝဲဒၣ်အီၤတုၤမုၢ်မဆါတနံၤအံၤန့ၣ်လီၤ.
Pauline Hanson စံးဝဲဒၣ် ဖဲအဝဲပၣ်တံၣ် တၢ်ဆှၢနုာ်အဖီလာ်န့ၣ်, ပှၤအိၣ်လဲဟံၣ်သ့ၣ်တဖၣ်ဒီး ပှၤလၢအဟ့ၣ်လီၤကဒါက့ၤ စ့ဟံးလိၢ်လၢတၢ်ပှ့ၤဟံၣ်အဂီၢ်သ့ၣ်တဖၣ် ကနုာ်လီၤမၤန့ၢ်သူဘၣ်အဝဲသ့ၣ် စူဖၢၣ် သၢမျးကယၤ — ထီၣ်ဘးတုၤလၢသၢနံၣ်အဂီၢ်န့ၣ်လီၤ.
“တၢ်အဝဲအံၤန့ၣ်မ့ၢ်အဝဲသ့ၣ်နီၣ်ကစၢ်ကျိၣ်စ့, မ့ၢ်ဝဲပှၤကညီသ့ၣ်တဖၣ်အကျိၣ်အစ့, တမ့ၢ်ပဒိၣ်အကျိၣ်အစ့ဘၣ်, မ့ၢ်ဒၣ်ပှၤကညီသ့ၣ်တဖၣ်အစ့လီၤ. တၢ်အဝဲအံၤန့ၣ် အခီပညီမ့မ့ၢ်လၢ အဟ့ၣ်လီၤအဝဲသ့ၣ် တၢ်အိၣ်ဆိးခိၣ်ဒုးအလီၢ်တခါ မ့တမ့ၢ် ပာ်အီၤဒ်သိးအဟံၣ်အဃီတဖျၢၣ်အသိးတခီ, အဟံၣ်အဃီအံၤမ့ၢ်တအိၣ်လၢၤဘၣ်န့ၣ် အဝဲသ့ၣ်အတၢ်အိၣ်မူန့ၣ်ကဟးဂီၤကွံာ်န့ၣ်လီၤ.”
One Nation သနူအံၤ ပဒိၣ် ပဲာ်အၢပဲာ်သီဝဲဒၣ်အီၤ — လၢအစံးဝဲဒၣ်, သနူအံၤ ကဒုးဖှီၣ်လီၤယာ်လီၤဝဲပှၤအီစထြ့လယါဖိအကကွဲၢ်အါမးဒီး မၤဂီၤကွံာ်ဝဲဒၣ် စူဖၢၣ်—မံၤတုၤပှၢ်တီၤကတီၢ်အဂီၢ်စ့ပာ်ဖှိၣ်သနူလၢအအိၣ်ပာ်စၢၤအံၤန့ၣ်လီၤ.
မ့မ့ၢ်ပှၤထီဒါတၢ်ကရၢခိၣ် Angus Taylor န့ၣ် ဃ့ထီၣ်ဝဲဒၣ် တၢ်ကပာ်ဖျါအါထီၣ် သနူအံၤအတၢ်ဂ့ၢ်တၢ်ကျိၤ လီၤတံၢ်လီၤဆဲးသ့ၣ်တဖၣ်န့ၣ်လီၤ.
ပှၤထီဒါတၢ်ကရၢ ပှၤဟံၣ်တအိၣ်ဃီတအိၣ်ဒီး ဟံၣ်ဃီဂ့ၢ်ဝီကိတိာ် Andrew Bragg စံးဝဲဒၣ်, လၢတၢ်ခီဆၢကဒါက့ၤတၢ်ဂ့ၢ်အံၤအဂီၢ် ကရၢစၢဖှိၣ်န့ၣ်က့ၤကွၢ်သမံသမိးကဒါက့ၤဝဲဒၣ် အနီၣ်ကစၢ်ဒၣ်ဝဲ စူဖၢၣ် သနူသ့ၣ်တဖၣ်န့ၣ်လီၤ.
အဝဲစံးဝဲဒၣ် တၢ်ဃုထၢ လၢအမ့ၢ်ဒ်သိး တၢ်ပျဲပှၤကညီသ့ၣ်တဖၣ် ကသူဆိအဝဲသ့ၣ် စူဖၢၣ်လၢ တၢ်ဟ့ၣ်လီၤကဒါက့ၤ စ့ဟံးလိၢ်လၢတၢ်ပှ့ၤဟံၣ်အဂီၢ်န့ၣ် ကကဲထီၣ်ဝဲတၢ်မၤစၢၤ ပှၤအီစထြ့လယါဖိလၢအအိၣ်ဘှံးကွံာ်လၢတၢ်ဖံးတၢ်မၤအပူၤ ဒီး အနီၣ်ကစၢ်ဟံၣ်ဃီတအိၣ်ဘၣ်သ့ၣ်တဖၣ် အနီၣ်ဂံၢ်ကစှၤလီၤဝဲန့ၣ်လီၤ.
“ပှၤအိၣ်ဘှံးကွံာ်လၢတၢ်ဖံးတၢ်မၤအပူၤ လၢအနီၣ်ကစၢ်ဟံၣ်ဃီတအိၣ်ဘၣ် အိၣ်ဝဲအါမး, ဒီး မံၤတုၤပှၢ်တီၤကတီၢ်တၢ်အိၣ်ဘှံးကွံာ်လၢတၢ်ဖံးတၢ်မၤအပူၤ သနူကျိၤကွာ်သ့ၣ်တဖၣ်န့ၣ် အလီၢ်အိၣ်လၢပကဘၣ်ကွၢ်ထိၣ်ဃူဘၣ်လိာ်က့ၤအီၤ, ဃုာ်ဒီး ဟံၣ်ဃီ သနူကျိၤကွာ်သ့ၣ်တဖၣ်— ဒ်သိးလၢကမၤလီၤတံၢ် ပအိၣ်ဒီး ပှၤအိၣ်ဘှံးလၢမံၤတုၤပှၢ်တီၤကတီၢ် လၢအအိၣ်ဒီးနီၣ်ကစၢ်ဒၣ်ဝဲဟံၣ်ဃီအနီၣ်ဂံၢ်ကအိၣ်အါထီၣ်အဂီၢ်န့ၣ်လီၤ. ဒ်သိးပှၤပာ်လီၤသနူသ့ၣ်တဖၣ်အသိး တၢ်အဝဲအံၤန့ၣ်မ့ၢ်ဝဲပမူပဒါလၢအသညူးသပှၢ်တခါနၣ်လီၤ.”
Senator Bragg အတၢ်ပာ်ဖျါထီၣ်တၢ်ထံၣ်တၢ်ပာ်သးအံၤ ဒုးကဲထီၣ်ဝဲ ပှၤပၢၤစ့ Jim Chalmers လၢကပာ်ဒ့ၣ်ပာ်ကမၣ်ဝဲ ကရၢစၢဖှိၣ် လၢအမ့ၢ်အတၢ်မၤကဲဒိး One Nation သနူသ့ၣ်တဖၣ်န့ၣ်လီၤ.
“One Nation အ စူဖၢၣ်သနူအံၤမ့ၢ်တၢ်လၢအတအိၣ်ဒီးတရဲၣ်လီၤကျဲၤလီၤမူးမူးနီၣ်နီၣ်ဘၣ်, ဒီး အခဲအံၤန့ၣ် ကရၢစၢဖှိၣ် အဲၣ်ဒိးမၤကဲဒိးအဝဲသ့ၣ်. ဖဲလၢပှၤအါဒံအါဂၤ အဲၣ်ဒိးဃ့ၢ်ယံၤကွံာ်အသးဒီး တၢ်တပံတကၠီၣ်အံၤ, လၢအမ့ၢ် One Nation အစူဖၢၣ်သနူအံၤအခါ, အခဲအံၤန့ၣ် ပနၢ်ဟူဘၣ်လၢ Andrew Bragg အဲၣ်ဒိးမၤကဲဒိးအီၤ. တနံၤအံၤ ကရၢစၢဖှိၣ်အပှၤကတိၤတၢ်ပၢ Andrew Bragg ပာ်ဖျါဝဲရှဲရှဲဖိ, လၢအကဂ့ၢ်လိာ်ကွံာ်ဝဲ One Nation စူဖၢၣ်အတၢ်ပျုၢ်အံၤအလီၢ်န့ၣ်, အဝဲသ့ၣ် အဲၣ်ဒိး မၤကဲဒိးဝဲအီၤန့ၣ်လီၤ.”
လ့ၢ်ဘရၢၢ်ဘျီၣ်ဒိၣ်ထးခီခၢၣ်စး Paul Scarr စံးဝဲဒၣ်, တၢ်လီၢ်လၢတၢ်ကဘှီဘၣ်မၤက့ၤထီၣ်တၢ်အဂီၢ်သ့ၣ်တဖၣ်အိၣ်ဝဲဒီး ကရၢစၢဖှိၣ်န့ၣ် ကွၢ်ဃုသ့ၣ်ညါဝဲကျိၤကျဲလၢတၢ်ကဘှီဘၣ်မၤဂ့ၤအီၤထီၣ်တၢ်အံၤအဂီၢ်, တၢ်ဆီတလဲလၢတၢ်မၤအီၤသ့သ့ၣ်တဖၣ် တၢ်မၤကွၢ်အီၤန့ၣ်မ့ၢ်ဝဲတၢ်လၢအရ့ဒိၣ်န့ၣ်လီၤ.
“အပူၤကွံာ်လၢညါအခါန့ၣ် ကရၢစၢဖှိၣ်အိၣ်ဝဲဒီး သနူသ့ၣ်တဖၣ် လၢအပျဲပှၤကညီသ့ၣ်တဖၣ် နုာ်လီၤဟံးန့ၢ် အဝဲသ့ၣ်စူဖၢၣ် ဒ်တၢ်ပာ်ပနီၣ်အီၤအသိး ဒီး သူအီၤလၢတၢ်ပှ့ၤအဝဲသ့ၣ်နီၣ်ကစၢ်ဟံၣ်အဆိကတၢၢ်တဖျၢၣ်အဂီၢ်, လၢအအိၣ်ဒီးတၢ်ပာ်ပနီၣ်အတၢ်အိၣ်သးသ့ၣ်တဖၣ်မူးမူးနီၣ်နီၣ်, လၢအပၣ်ဃုာ်ဒီးတၢ်ဂ့ၢ်လၢအမ့ၢ် — ဖဲလၢတၢ်ဆါလီၤကဒါက့ၤဟံၣ်အံၤအခါ, ကျိၣ်စ့အဝဲန့ၣ် မ့ၢ်တၢ်က့ၤဘျၢနုာ်လီၤကဒါက့ၤအီၤဖဲစူဖၢၣ်အပူၤန့ၣ်လီၤ. အဃိ, ယဆိကမိၣ်ဒု ကရၢစၢဖှိၣ်အံၤ ဆိကမိၣ်ထံဝဲဒၣ်အသနူအံၤ, ဘၣ်ဆၣ်သနာ်က့ တၢ်အရ့ဒိၣ်နီၣ်နီၣ်န့ၣ်မ့ၢ်ဝဲနကဘၣ်အိၣ်ဒီး တၢ်သိၣ်တၢ်သီတၢ်ဘျၢ လၢအဘၣ်လိာ်ဖိးဒ့သ့ၣ်တဖၣ်န့ၣ်လီၤ.”
Greens ပၣ်တံၣ်အခိၣ် Larissa Waters စံးဝဲဒၣ်, လၢကမၤဖှံလီၤကွံာ်အဝဲသ့ၣ်ဟံၣ်ဃီဒီး တၢ်အိၣ်ဆိးအတၢ်လၢာ်ဘူၣ်လၢာ်စ့တၢ်ကိၢ်တၢ်ဂီၤသ့ၣ်တဖၣ်အဂီၢ် ပှၤအီစထြ့လယါသ့ၣ်တဖၣ် တကြၢးတူၢ်ရှူကွံာ် အဝဲသ့ၣ် စူဖၢၣ်—မံၤတုၤပှၢ်တီၤကတီၢ်အဂီၢ်စ့ပာ်ဖှိၣ်ဘၣ်န့ၣ်လီၤ.
“လၢနကန့ၢ်ဘၣ်တၢ်အိၣ်ကဒုအလီၢ်တခါဒီး တၢ်ပှ့ၤအီၣ်တၢ်အီၣ်တၢ်အီအဂီၢ် နတကြၢးသူဝဲဒၣ် နမံၤတုၤပှၢ်တီၤကတီၢ်အဂီၢ်စ့ပာ်ဖှိၣ်ဘၣ်. တၢ်လၢပဒိၣ်ကဘၣ်မၤအီၤအခဲအံၤန့ၣ်မ့ၢ်ဝဲ ကဘၣ်ဖီၣ်ဂၢၢ်ကွံာ်ဝဲတၢ်အိၣ်လဲဟံၣ်အပှ့ၤသ့ၣ်တဖၣ်, ကဘၣ်ပတုာ်ကွံာ်စ့တၢးသ့ၣ်တဖၣ် အတၢ်ဟံးန့ၢ်တၢ်အဘျုးအဖှိၣ် လၢပှၤဘၣ်ဟ့ၣ်က့ၤစ့ဟံးလိၢ်လၢတၢ်ပှ့ၤဟံၣ်အဂီၢ်သ့ၣ်တဖၣ်အအိၣ်န့ၣ်လီၤ.”
ဘၣ်ဆၣ်သနာ်က့ One Nation ကျိၣ်စ့ဝဲၤကျိၤအပှၤကတိၤတၢ်ပၢ Barnaby Joyce စံးဝဲဒၣ်, ပှၤလၢအထီဒါတၢ်ဂ့ၢ်အံၤန့ၣ် မ့ၢ်ပှၤလၢ အဂ့ၢ်လိာ်ကွံာ် ပှၤအီစထြ့လယါဖိသ့ၣ်တဖၣ် အတၢ်နုာ်လီၤဟံးန့ၢ် အနီၣ်ကစၢ်စ့ပာ်ဖှိၣ်အံၤ ဒီးပဲၤအၢဝဲအီၤန့ၣ်လီၤ.
“အဝဲသ့ၣ်န့ၣ် အသးဟဲဒိၣ်ထီၣ်ဝဲတၢ်တထံၣ်ဃီ ခီဖျိလၢ အဝဲသ့ၣ်တအဲၣ်ဒိးပှၤကညီသ့ၣ်တဖၣ်နုာ်လီၤမၤန့ၢ်အနီၣ်ကစၢ်ဒၣ်ဝဲအကျိၣ်အစ့ဘၣ်. တၢ်အဝဲအံၤန့ၣ်မ့ၢ်ဝဲ တၢ်ဂ့ၢ်ကီအဂံၢ်ထံးတခါန့ၣ်လီၤ. တၢ်အဝဲအံၤန့ၢ် မ့ၢ်ဝဲ နနီၣ်ကစၢ်ကျိၣ်စ့. တမ့ၢ်အဝဲသ့ၣ်အကျိၣ်စ့ဘၣ်. မ့ၢ်ဝဲနစ့ဒၣ်နဝဲန့ၣ်လီၤ.”
လၢတၢ်ကနုာ်လီၤထုးထီၣ် စူဖၢၣ်အဂီၢ် One Nation အတၢ်ဆီၣ်သခူအံၤ အခီပညီမ့ၢ်ဝဲဒၣ်, တၢ်ထိၣ်ဃူနီၣ်ဂံၢ်အဖီခိၣ် ပှၤမၤတၢ်ဖိလၢအမၤတၢ်မၤ တၢ်ဆၢကတီၢ်ပှဲၤပှဲၤ ဒီးအကျိၣ်စ့တၢ်ဟဲနုာ်အိၣ်ဖဲတနံၣ် ၉၁,ဝဝဝ ဒီလၣ်ဃၣ်ဃၣ်ဃၣ်တဂၤန့ၣ်, တနွံအတီၢ်ပူၤ နုာ်လီၤဟံးန့ၢ်အစူဖၢၣ်စ့ပာ်ဖှိၣ်န့ၢ်ဝဲ ၄၄ဒီလၣ်န့ၣ်လီၤ.
မ့မ့ၢ်ဟံၣ်ဖိဃီဖိတဒူၣ်လၢအတၢ်ဟဲနုာ်ပာ်ဖှိၣ်ခဲလၢာ်အိၣ် ၁၆၈,ဝဝဝ ဒီလၣ်န့ၣ်, တနွံအတီၢ်ပူၤ နုာ်လီၤဟံးန့ၢ်ဝဲကန့ၢ် ၈၂ ဒီလၣ်ဃၣ်ဃၣ်န့ၣ်လီၤ.
တၢ်ဆှၢနုာ်လီၤအံၤ ပှၤအိၣ်လဲဟံၣ်သ့ၣ်တဖၣ်ဒီး ပှၤပှ့ၤဟံၣ် ဟံၣ်ကစၢ်သ့ၣ်တဖၣ် အိၣ်ဒီးတၢ်ခီဆၢကဒါ အကလုာ်ကလုာ်န့ၣ်လီၤ...
တနီၤန့ၣ်စံးဝဲဒၣ်လၢ တၢ်အဝဲအံၤလၢတၢ်ဆၢကတီၢ်ဖုၣ်ကိးအဂီၢ်န့ၣ် တၢ်သူအီၤသ့ဝဲ နာ်သက့ လၢတၢ်ဆၢကတီၢ်ဖးယံၤအဂီၢ်န့ၣ် ကမ့ၢ်ဝဲတၢ်ကီတၢ်ခဲ, လီၤဆီဒၣ်တၢ်ဖဲလၢ မံၤတုၤပှၢ်တီၤအိၣ်ဘှံးကွံာ်လၢတၢ်ဖံးတၢ်မၤအခါန့ၣ်လီၤ. တနီၤတခီ လၢတၢ်ဂ့ၢ်အကလုာ်ကလုာ်အဖီခိၣ်န့ၣ် တမ့ၢ်လၢအဝဲသ့ၣ်သးလီၤပလိာ်ဃုာ်ဒီး One Nation ဘၣ်နာ်သက့ ဆိကမိၣ်ဝဲလၢ တၢ်အဝဲအံၤန့ၣ် အတမ့ၢ်တၢ်ဆိကမိၣ်လၢ အအၢတခါဘၣ်. မ့မ့ၢ်တနီၤတခီဆိကမိၣ်ဝဲလၢ တၢ်ထံၣ်တၢ်ဆိကမိၣ်လၢအပျုၢ်အတြီၤတခါန့ၣ်လီၤ.
ပှၤသ့ပှၤဘၣ်စဲၤနီၣ်လၢ မုၢ်ကျိၤဝဲၤကွာ် သ့ၣ်တဖၣ် ဟ့ၣ်ပလီၢ်ဝဲလၢ, တၢ်ပၢနုာ်လီၤအါထီၣ်ကျိၣ်စ့ဖဲ မုၢ်ကျိၤဝဲၤကွာ်အပူၤန့ၣ် ကမ့ၢ်ဝဲဒၣ် မ့ၣ်ဆၣ်လၢ စ့သိၣ်သွံအဂီၢ်—လၢအမ့ၢ်စ့အလုၢ်အပှ့ၤကလီၤဒိၣ်ထီၣ်, ကဒုးကဲထီၣ်စ့ၢ်ကီး လီၢ်ခၢၣ်သးစ့တၢး ကမၤအါထီၣ်စ့အ့ၣ်အလုၢ်အပှ့ၤသ့ၣ်တဖၣ်, လၢအကကဲထီၣ်တၢ် ဆီၣ်ဖျိးတခါလၢ ကဘၣ်ဟ့ၣ်လီၤအါထီၣ်စ့ဖဲ တၢ်က့ၤဟ့ၣ်လီၤကဒါကျိၣ်စ့ လၢတၢ်ဟံးန့ၢ်လိၢ်န့ၢ်အီၤလၢတၢ်ပှ့ၤဟံၣ်အဂီၢ်, တကးဒ်ဘၣ် ဟံၣ်ဒိးလဲသ့ၣ်တဖၣ် အပှ့ၤကဟဲအါထီၣ်စ့ၢ်ကီးန့ၣ်လီၤ.
Australia Institute ကရၢ ပတီၢ်ဒိၣ် ပှၤသ့ပှၤဘၣ်စဲၤနီၣ်လၢမုၢ်ကျိၤဝဲၤကွာ်, Matt Grudnoff စံးဝဲဒၣ်, သနူအံၤ အကမၤဖှီၣ်မၤနးဒိၣ်ထီၣ်ဝဲဒၣ် တၢ်အိၣ်ဆိးအပှ့ၤ တၢ်လၢာ်ဘူၣ်လၢာ်စ့ အတၢ်ကိၢ်တၢ်ဂီၤန့ၣ်လီၤ.
“တၢ်အဝဲအံၤ ဘၣ်မနုၤအဃိလၢအမ့ၢ် သနူတခါလၢပှၤဘၣ်သးအီၤအါလဲၣ်န့ၣ် ယကွၢ်အီၤဖျါဝဲဒၣ်. ခဲကနံၣ်အံၤန့ၣ်, ပှၤကညီသ့ၣ်တဖၣ် အတၢ်ဖံးတၢ်မၤအဘူးအလဲန့ၣ် အတဂ့ၤဘၣ်. တၢ်အံၤအခီပညီန့ၣ်မ့ၢ်ဝဲ ဒီးအဝဲသ့ၣ်ကျိၣ်စ့တၢ်ဟဲနုာ်အံၤ အဝဲသ့ၣ်ပှ့ၤတၢ်တန့ၢ်အါအါဘၣ်. တူၢ်ဘၣ်ဝဲဒ်သိးဘၣ်သူ ကတီၤဝဲဒၣ်အကျိၣ်အစ့, ဒီး အဝဲသ့ၣ်သူၣ်ဒိၣ်သးဖျိးတၢ်ဒီးတၢ်မၤသးအံၤ. နာ်သက့ တၢ်ဘူၢ်တၢ်တီၢ်တဂ့ၤဘၣ်တခါန့ၣ်မ့ၢ်ဝဲ, သနူအံၤ တမ့ၢ်လၢအကကဲထီၣ်တၢ်မၤစၢၤဘၣ်. အဃိ တၢ်အဝဲအံၤ မ့ၢ်ကဲထီၣ်ဘၣ်ဖုးသပှၢ်ကတၢၢ်န့ၣ်, တၢ်လၢအကမၤအသးန့ၣ်မ့ၢ်ဝဲဒၣ် လီၢ်ခၢၣ်သးစ့တၢး ကဖုးဘၣ်အသးဒီး ကမၤအါထီၣ်ဝဲစ့အ့ၣ်အလုၢ်အပှ့ၤသ့ၣ်တဖၣ်ကွ့ၢ်ကွ့ၢ်န့ၣ်လီၤ.”
လၢကမၤစၢ်လီၤကွံာ် တၢ်အိၣ်ဆိးအပှ့ၤဒိၣ်ထီၣ်အံၤအဂီၢ် အလီၢ်အိၣ်လၢ ကဘၣ်မၤတၢ်ဆီတလဲ နာ်သက့ အဝဲစံးဝဲဒၣ် လၢကဃုမၤန့ၢ်တၢ်အဆၢသ့ၣ်တဖၣ်အဂီၢ် ပှၤဂဲၤလိာ်ထံရူၢ်ကီၢ်သဲးသ့ၣ်တဖၣ် ကဘၣ်ကွၢ်ဃုဝဲကျိၤကျဲလၢအဂုၤအဂၤသ့ၣ်တဖၣ်န့ၣ်လီၤ.
“တၢ်ဂ့ၢ်ကီနီၣ်နီၣ်ကီၢ်ကီၢ်န့ၣ်မ့ၢ်ဝဲ, ပှၤအိၣ်လၢတၢ်ဖီခိၣ်ကတၢၢ်သ့ၣ်တဖၣ်န့ၣ် တၢ်ပျဲအဝဲသ့ၣ်လၢ အကဟ့ၣ်စှၤလီၤခိသွဲန့ၣ်လီၤ. အဃိ One Nation အံၤ အမ့ၢ်အဲၣ်ဒိးမၤစၢၤဝဲဒၣ် ပှၤလၢအတၢ်ဟဲနုာ်အိၣ်စှၤဒီး အိၣ်ဖဲအကြၢးသ့ၣ်တဖၣ် သပှၢ်ကတၢၢ်န့ၣ်, လၢကပျဲဟံၣ်ဒူၣ်ဃီဒူၣ်သ့ၣ်တဖၣ်ထုးထီၣ်သူကွံာ် အဝဲသ့ၣ် စူဖၢၣ်—စ့ပာ်ဖှိၣ်အလီၢ်န့ၣ်, ကြၢးဘၣ်လၢ တၢ်ဒီၣ်တဲာ်ကွံာ် ပှၤကျိၣ်စ့တၢ်ဟဲနုာ်အိၣ်အါသ့ၣ်တဖၣ် အတၢ်ဟ့ၣ်စှၤလီၤ စူဖၢၣ်စ့ အမျးကယၤ ၂ဝ န့ၣ် ဒီး သူအီၤလၢတၢ်မၤစှၤလီၤ တၢ်အိၣ်ဆိးအပှ့ၤထီၣ် တၢ်ဆီၣ်သနံးသ့ၣ်တဖၣ်အဂီၢ်, လၢအမ့ၢ်တၢ်ထုးစှၤလီၤကွံာ် တၢ်ဆီၣ်သနံးလၢဟံၣ်ဒူၣ်ဃီဒူၣ်သ့ၣ်တဖၣ်အလိၤန့ၣ်လီၤ.”
စူဖၢၣ်ကရၢဖိကီၣ်ကးကရၢ—Super Members Council, လၢအမ့ၢ်ထံကီၢ်အံၤ စူဖၢၣ်ကရၢဖိသ့ၣ်တဖၣ်အကရၢမိၢ်ပှၢ် စံးဝဲဒၣ်, One Nation အတၢ်ဆှၢနုာ်အံၤ မ့ၢ်ဒၣ်ထဲလၢ တၢ်ဆၢကတီၢ်ဖုၣ်ကိးဖိအဂီၢ် ဒီး ကဒုးအိၣ်ထီၣ်တၢ်ဟးဂူာ်ဟးဂီၤဒီး တၢ်ဂ့ၢ်လၢအကပိာ်ထွဲထီၣ်အသး လၢတၢ်ဆၢကတီၢ်ဖးယံၤအဂီၢ်န့ၣ်လီၤ.
ကီၣ်ကးကရၢအံၤ ပှၤပၢဆှၢရဲၣ်ကျဲၤတၢ်အခိၣ်ဒိၣ် Misha Schubert စံးဝဲဒၣ်, သနူအံၤအခီပညီမ့ၢ်ဝဲ အီစထြ့လယါပှၤပတီၢ်မုၢ်ဖိသ့ၣ်တဖၣ် ကဘၣ်ရှူကွံာ် အဝဲသ့ၣ် မံၤတုၤပှၢ်တီၤကတီၢ်အဂီၢ်စ့ပာ်ဖှိၣ် ဒီလၣ် လၢအကလးအါမးန့ၣ်လီၤ.
“တၢ်အိၣ်သးန့ၣ် အိၣ်ဖျါဝဲဒၣ် ရှဲရှဲ ပျီပျီ, ဒီး မ့ၢ်တၢ်သညူးသပှၢ်တခါန့ၣ်လီၤ. တၢ်ဆှၢနုာ်လီၤ သနူ လၢတၢ်ကမၤအီၤ ၃နံၣ်အဂီၢ်အံၤ, တၢ်မၤအီၤမ့ၢ်ကဲထီၣ်လိၣ်ထီၣ်သပှၢ်ကတၢၢ်န့ၣ်, ဖဲပကီၢ်ပူၤအံၤ ပှၤလၢအကျိၣ်စ့တၢ်ဟဲနုာ်အိၣ်ဖဲအကြၢး—တၢ်ခၢၣ်သးအပတီၢ်သ့ၣ်တဖၣ်, မ့ၢ်တုၤဖဲအဝဲသ့ၣ်အိၣ်ဘှံးကွံာ်လၢတၢ်ဖံးတၢ်မၤအဆၢကတီၢ်တစုန့ၣ်, အဝဲသ့ၣ်အတၢ်ဟဲနုာ် တနံၣ်န့ၣ် ကဖှီၣ်လီၤကွံာ်ဝဲဒီလၣ် ၂၅,ဝဝဝ, ဒီး မ့မ့ၢ် ပှၤနီၣ်ဒီမါဝၤခံဂၤလၢာ်န့ၣ် ကဖှီၣ်လီၤကွံာ်ဝဲဒီလၣ် ၅ဝ,ဝဝဝ န့ၣ်လီၤ. တၢ်အံၤမ့ၢ်ဝဲ ၃နံၣ်အတီၢ်ပူၤ တၢ်ဘၣ်ဒိဘၣ်ထံးန့ၣ်လီၤ.”
အဝဲစံးဝဲဒၣ် ပှၤလၢအကဘၣ်ထံးနးကတၢၢ်န့ၣ်မ့ၢ်ဝဲပှၤလၢ အဂံၢ်စၢ်ဘါစၢ်ကတၢၢ်သ့ၣ်တဖၣ်န့ၣ်လီၤ.
“တၢ်ဒီသဒၢဂၢၢ်ဂၢၢ်ကျၢၤကျၢၤသ့ၣ်တဖၣ်မ့ၢ်တအိဘၣ်န့ၣ်, ပှၤလၢအကဖှီၣ်လီၤဒိၣ်ထီၣ်န့ၣ်မ့ၢ်ဝဲ ပှၤလၢအဂံၢ်စၢ်ဘါစၢ်ကတၢၢ်သ့ၣ်တဖၣ်, ပှၤသးစၢ်သ့ၣ်တဖၣ်, ဟံၣ်ဒူၣ်ဃီဒူၣ်လၢအတၢ်ဟဲနုာ်အိၣ်ဖဲအကြၢးဒီး အစှၤကတၢၢ်သ့ၣ်တဖၣ်, ဒီး ပှၤကညီလၢအမ့ၢ်ကလုာ်ဒူၣ်ဆဲးလၤအါကလုာ်အပှၤတဝၢ လၢအအိၣ်သကုၤထံကီၢ်ဒီဘ့ၣ်အပူၤ, တၢ်အိၣ်ဒီး စူဖၢၣ်—စ့ပာ်ဖှိၣ်အဃိ ဖဲလၢအဝဲသ့ၣ်မ့ၢ်အိၣ်ဘှံးကွံာ်လၢတၢ်ဖံးတၢ်မၤအပူၤန့ၣ် အကဒုးအိၣ်ထီၣ်ဝဲတၢ်လီၤဆီဒိၣ်ဒိၣ်အါအါန့ၣ်လီၤ.”
အဝဲစံးဝဲဒၣ် တၢ်ဆှၢနုာ်လီၤ တၢ်ဆီတလဲသ့ၣ်တဖၣ်အံၤ ကမၤဘၣ်ဒိဘၣ်ထံးဝဲ သနူလၢ ထံကီၢ်လၢအဂုၤထီၣ်ပသီပာ်လံအါမး မိၣ်န့ၢ်သးလီအီၤအံၤန့ၣ်လီၤ.
“ထံကီၢ်အဂုၤအဂၤန့ၣ် လၢတၢ်ဆီၣ်ထွဲမၤစၢၤ ပှၤသူၣ်က့သးပှၢ် ပ့ၣ်စ့—စ့တၢ်မၤစၢၤအဂီၢ်န့ၣ် အဝဲသ့ၣ်ဘၣ်ဒိးသန့ၤဒၣ်အသး ကမျၢၢ်အတၢ်ဟ့ၣ်လီၤခိသွဲထဲတခါဧိၤ ဒီး မ့ၢ်လၢပှၤသူၣ်က့သးပှၢ်အနီၣ်ဂံၢ်န့ၣ်ဟဲအါထီၣ်အဃိ ပှၤဟ့ၣ်ခိသွဲသ့ၣ်တဖၣ်စှၤလီၤ ဒီး အဝဲသ့ၣ် ဘၣ်ကွၢ်ဆၢၣ်မဲာ်ဒီး ခါဆူညါအဂီၢ်စ့တိာ်ပာ်တအိၣ်လၢပှဲၤဘၣ်တၢ်ကီတၢ်ခဲသ့ၣ်တဖၣ်န့ၣ်လီၤ. အဝဲသ့ၣ်ကွၢ်ဝဲဒၣ်အီစထြ့လယါကီၢ်န့ၣ် ဒီး အဝဲသ့ၣ်ဆိကမိၣ်ဝဲလၢ, “ပမုၢ်လၢ်လၢပကသူၣ်ထီၣ်ဘၣ်ဝဲသနူလၢအဂၢၢ်ကျၢၤ ဒီး အိၣ်ဒီးတၢ်တုၤထီၣ်ထီၣ်ဘး ဒ်သိးအီစထြ့လယါကီၢ်သနူန့ၣ်လီၤ.” အဃိန့ၣ် လၢပဝဲကိးဂၤဒဲးအဂီၢ် တၢ်အံၤမ့ၢ်ဝဲ တၢ်ကစီၣ်ရှဲရှဲတခါ, ပအိၣ်ဒီးတၢ်ဟံးမူဒါ လၢအမ့ၢ် မူဒါတၢ်ဖံးတၢ်မၤလၢ ကဘၣ်ပာ်ဝဲဒၣ် အီစထြ့လယါကီၢ် စူဖၢၣ်သနူ ဂံၢ်ခီၣ်ထံးတၢ်သူၣ်ထီၣ်ဆီလီၤအံၤ ဂၢၢ်ဂၢၢ်ကျၢၤကျၢၤ လၢအမ့ၢ်တၢ်ဒီသဒၢ ဆူမဲာ်ညါ ပှၤအီစထြ့လယါဖိ အဂၤ ၁၇ ကကွဲၢ်, လၢအမ့ၢ်ပှၤသ့ၣ်တဖၣ်လၢ အမံၤတုၤပှၢ်တီၤကတီၢ်အဂီၢ် စူဖၢၣ်န့ၣ် ဒိးသန့ၤဒၣ်အသးဒီး အဝဲသ့ၣ်တၢ်ဖံးတၢ်မၤအဘူးအလဲန့ၣ်လီၤ.”
