တၢ်ကလုၢ်တဖၣ်: https://www.sbs.com.au/language/karen/kar/collection/podcast/0ms9u5vjn
တၢ်လၢ National Party of Australia အံၤ ဘၣ်တၢ်သ့ၣ်ညါစ့ၢ်ကီးအီၤလၢ Nationals မ့တမ့ၢ် Nats န့ၣ်လီၤ.
အဝဲသ့ၣ်ဘၣ်တၢ်သ့ၣ်ညါအီၤလၢ အပာ်ထီၣ်ထီအသးဒီး ပာ်တၢ်ပညိၣ်ဆူ အီစထြ့လယါကီၢ်ခိခိၣ်ဟီၣ်ကဝီၤန့ၣ်လီၤ.
နာ်သက့ တၢ်လၢ Nationals အံၤ အဟဲန့ၣ်ဖဲလဲၣ်? ဒီးအဝဲသ့ၣ်န့ၣ်မ့ၢ်မတဂၤလဲၣ်?
တၢ်လၢ Nationals အံၤ အခီၣ်ထံးခီၣ်ဘိန့ၣ်ဘၣ်တၢ်သ့ၣ်ညါအီၤလၢ Country Party န့ၣ်လီၤ.
ဖဲအဝဲသ့ၣ်အိၣ်ထီၣ် ဖဲ ၁၉၂ဝနံၣ်အခါန့ၣ်, အဝဲသ့ၣ် ကတိၤန့ၢ်ခဲးတၢ်လၢ ပှၤအီစထြ့လယါ ခိခိၣ်ဟီၣ်ကဝီၤသ့ၣ်တဖၣ်အဂီၢ်ဒိၣ်ဒိၣ်မုၢ်မုၢ်, လီၤဆီဒၣ်တၢ် သူၣ်ဖျးဒီး တၢ်ဘုၣ်ဆၣ်ဖိကီၢ်ဖိအဂ့ၢ်, ဆၢကတီၢ်အခါဖဲန့ၣ် တၢ်အံၤမ့ၢ်ဝဲတၢ်အရ့ဒိၣ်လၢ အီစထြ့လယါကီၢ်မုၢ်ကျိၤဝဲၤကွာ်အဂီၢ်န့ၣ်လီၤ.
National Party ထံကီၢ်ဒီဘ့ၣ်ကရၢခိၣ် Kay Hull စံးဝဲဒၣ်,
“လၢညါအခါတၢ်ဆိကမိၣ်န့ၣ်မ့ၢ်ဝဲဒၣ် ပှၤလၢအကဲခၢၣ်စးန့ၢ်သ့ၣ်တဖၣ်န့ၣ် မ့ၢ်ဝဲပှၤလၢအအိၣ်ဖဲကီၢ်အဝဲန့ၣ်အပှၤတဝၢအပူၤ လၢအမ့ၢ်ပှၤသ့ၣ်တဖၣ်လၢအနုာ်လီၤပၣ်ဃုာ်ဖဲပၣ်တံၣ်အပူၤန့ၣ်လီၤ.”
အဝဲစံးလၢ နံၣ်လါသ့ၣ်တဖၣ်လဲၤပူၤကွံာ်ဖးယံၤလံနာ်သက့ ပၣ်တံၣ်အံၤအတၢ်ပညိၣ်န့ၣ် တဆီတလဲအသးကဲၣ်ဆိးဘၣ်.
“ပၣ်တံၣ်အံၤအတၢ်သိၣ်တၢ်သီတၢ်ဘျၢန့ၣ် ထီဘိမ့ၢ်ဝဲလၢ တၢ်ဘံၣ်တၢ်ဘၢဒီး တၢ်ခွဲးတၢ်ယာ်, တၢ်အီၣ်ကုၤအီၣ်ပှဲၤ, တၢ်တုၤသိးထဲသိး လၢဒူဝီ, ခိခိၣ်ဟီၣ်ကဝီၤဒီး ဝ့ၢ်ချၢပှၤအီစထြ့လယါဖိသ့ၣ်တဖၣ်အဂီၢ် ဒီး လၢတၢ်ကပာ်ပနီၣ်အဝဲသ့ၣ်အလုၢ်အပှ့ၤဒီး ပာ်ကဲအဝဲသ့ၣ်တၢ်နုာ်လီၤပၣ်ဃုာ်မၤသကိးန့ၣ်လီၤ. အတၢ်ဂ့ၢ်မိၢ်ပှၢ်ဒီးအလုၢ်အပှ့ၤသ့ၣ်တဖၣ်န့ၣ် ဘၣ်သ့ၣ်သ့ၣ် အိၣ်ဝဲဒ်အလီၢ်လီၢ်အသိး န့ၣ်လီၤ.”
အဃိပၣ်တံၣ်အံၤအတၢ်ပညိၣ်န့ၣ်မ့ၢ်ဝဲအီစထြ့လယါကီၢ်ခိခိၣ်ဟီၣ်ကဝီၤန့ၣ်လီၤ.
Australian National University — ဖၠၣ်စိမိၤသရၣ်မုၣ်ဒိၣ် Dr Jill Sheppard စံးဝဲဒၣ် တၢ်အံၤပၣ်ဃုာ်ဒီး ခိခိၣ်ဟီၣ်ကဝီၤပနံးတၢ်ဖံးတၢ်မၤသ့ၣ်တဖၣ်န့ၣ်လီၤ.
“အဝဲသ့ၣ်အဲၣ်ဒိးတၢ်ဒီသဒၢလၢစဲးဖီကဟၣ်တၢ်ဖံးတၢ်မၤလီၢ်လီၤတံၢ်လီၤဆဲးတခါခါသ့ၣ်တဖၣ်အဂီၢ်, အါတက့ၢ်န့ၣ်အဝဲသ့ၣ်တအဲၣ်ဒိးတၢ်ကူၣ်လဲၤမၤကၤသဘျ့ဘၣ်, တၢ်ကူၣ်လဲၤမၤကၤသဘျ့အတၢ်သးလီၤပလိာ် မ့တမ့ၢ် တၢ်ထုးကွံာ်ခိသွဲန့ၣ် အဝဲသ့ၣ်ဘၣ်တၢ်မၤဆူၣ်. နာ်သက့ တၢ်လၢ Nationals န့ၣ် တအဲၣ်ဒိးတၢ်ကူၣ်လဲၤမၤကၤကရၢစ့ၢ်ကီးဘၣ်, ဒီးတၢ်အံၤမ့ၢ်ဝဲ အဝဲသ့ၣ်အတၢ်လီၤဆီလိာ်သးဒီး Labor Party န့ၣ်လီၤ. အဃိ Nationals ဆီၣ်ထွဲမၤစၢၤဝဲဒၣ် သူၣ်ဖျးစဲးဖီကဟၣ်တၢ်မၤလီၢ်သ့ၣ်တဖၣ်, နာ်သက့ အဝဲသ့ၣ် ဆီၣ်ထွဲအီၤနီၣ်နီၣ်န့ၣ်မ့ၢ်ဝဲ ပှၤလၢအဖီၣ်ဂၢၢ်ဃာ်တၢ်ဖံးတၢ်မၤလီၢ်သ့ၣ်တဖၣ်အံၤ, အါတက့ၢ်ပှၤထူစံာ်ဖိသ့ၣ်တဖၣ်န့ၣ်လီၤ.”
ဒ်သိးတၢ်မၤလဲၤထီၣ်လဲၤထီ ပှၤတဝၢအတၢ်အိၣ်သးခဲလၢာ်အဂီၢ် Ms Hull စံးဝဲ ဘၣ်မၤလဲၢ်ထီၣ်ဝဲတၢ်ဖံးတၢ်မၤအတကွီၣ်သ့ၣ်တဖၣ်န့ၣ်လီၤ.
“လၢကပြၢလိာ်သးဖဲဟီၣ်ခိၣ်ဖျၢၣ်ခိၣ်ဃၢၤတၢ်အိၣ်သးအပူၤကန့ၢ်အဂီၢ်, ဒူသဝီ, ခိခိၣ်ဟီၣ်ကဝီၤ, ဝ့ၢ်ချၢပှၤတဝၢသ့ၣ်တဖၣ် ခဲလၢာ်န့ၣ် အလီၢ်အိၣ်လၢနကဘၣ်အိၣ်ဒီးတၢ်ဂံၢ်ဆူၣ်ဘါဆူၣ်, တၢ်သးစွံကတုၤ, ပ့ၢ်ချ့, အိၣ်ဒီးစုကဝဲၤပီးလီအလၢအပှဲၤ, တမ့ၢ်ဧါ? တၢ်သ့ၣ်တဖၣ်အံၤမ့ၢ်တကဲထီၣ်အသးဘၣ်န့ၣ် တၢ်အံၤကဲထီၣ်တသ့ဘၣ်. အဃိပတၢ်ပညိၣ်န့ၣ်မ့ၢ်ဝဲ မၤလီၤတံၢ်လၢ ပအိၣ်ဒီး တၢ်ဆဲးကျိး, ဝံစိာ်တီဆှၢ, တၢ်သူၣ်ထီၣ်တိၤ, ကျဲမုၢ်လၢအဂ့ၤ, ဃုာ်ဒီးတၢ်အဂုၤအဂၤသ့ၣ်တဖၣ်. အရ့ဒိၣ်စ့ၢ်ကီးလၢ နကဘၣ်အိၣ်ဒီးပှၤသ့ၣ်တဖၣ်လၢ အကအိၣ်ဆိးသူၣ်လီၤအသးဖဲအံၤ. တၢ်ကူၣ်ဘၣ်ကူၣ်သ့လၢအကံၢ်အစီထီၣ်ဘး တၢ်ခွဲးတၢ်ယာ်သ့ၣ်တဖၣ် မ့ၢ်တအိၣ်န့ၣ် အဝဲသ့ၣ်တဟဲဘၣ်. နကဘၣ်အိၣ်ဒီး ဆူၣ်ချ့ဒီး ဝဲၤကျိၤအဂုၤအဂၤ လၢအကံၢ်အကစီထီၣ်ဘးဒီး အပှ့ၤအိၣ်ဖဲအကြၢး, ဘၣ်အိၣ်ဒီးပှၤတဝၢဝဲၤကျိၤဝဲၤဒ့သ့ၣ်တဖၣ်ဒီး ဃုာ်ဒီးပှၤတဝၢလၢအဂံၢ်ဆူၣ်ဘါဆူၣ်, ပှဲၤဒီးတၢ်ပူၤဖျဲးန့ၣ်လီၤ.”
ပၣ်တံၣ်အံၤ အနီၣ်ကစၢ်ဒၣ်ဝဲ တကဲထီၣ်ဘၣ်ပဒိၣ်နီတဘျီဘၣ်နာ်သက့, ဖဲအီစထြ့လယါကီၢ်ဘျီၣ်ဒိၣ်အပူၤန့ၣ် အတၢ်ဂဲၤလိာ်အိၣ်ဝဲဒိၣ်ဒိၣ်မုၢ်မုၢ်န့ၣ်လီၤ.
ပၣ်တံၣ်အံၤ ကဲထီၣ်ကရၢပာ်ဖှိၣ်အဆိကတၢၢ်န့ၣ်မ့ၢ်ဝဲဒၣ်ဖဲ ၁၉၂၂နံၣ် လၢအပာ်ဖှိၣ်ဃုာ်အသးဒီး ဖဲန့ၣ်အခါ Nationalist Party, ဒီး ခဲကနံၣ်အံၤပၣ်တံၣ်အမံၤအံၤတအိၣ်လၢၤဘၣ်. စးထီၣ်ဖဲန့ၣ်လံၤလံၤ အဝဲသ့ၣ်တၢ်သးလီၤပလိာ်သ့ၣ်တဖၣ်န့ၣ် လီၤဂာ်လိာ်အသးန့ၣ်လီၤ.
ဖဲ ၁၉၄၆နံၣ်န့ၣ် Nationals အံၤ ပာ်ဖှိၣ်ထီၣ်အကရူၢ်ဒီး Liberal Party, လၢအမ့ၢ်တၢ်မၤသကိးတဖုလၢအဆဲးအိၣ်တုၤမုၢ်မဆါတနံၤအံၤန့ၣ်လီၤ. မ့ၢ်လၢတၢ်အံၤအဃိ ပှၤခံဖုအံၤ အါတက့ၢ်တကိးအီၤလၢ ကရၢပာ်ဖှိၣ်န့ၣ် နကနၢ်ဟူဘၣ်ဝဲတလီၢ်လီၢ်န့ၣ်လီၤ.
ဒ်သိးလၢအမ့ၢ်ကရၢပာ်ဖှိၣ်တဖုအသိး, ပၣ်တံၣ်ခံခါအံၤ အဝဲသ့ၣ်မၤသကိးတၢ်ဒ်လဲၣ်န့ၣ် အိၣ်ဝဲဒီးတၢ်သးလီၤပလိာ်န့ၣ်လီၤ.
အဃိပၣ်တံၣ်တဖုလၢအန့ၢ်ဘၣ်လီၢ်ဆ့ၣ်နီၤအအါကတၢၢ်န့ၣ် ကဲထီၣ်ဝဲ ကရၢစၢဖှိၣ်အံၤအခိၣ်ဒိၣ်ကတၢၢ်ဒီး ပၣ်တံၣ်လၢအဆံးတဖုအခိၣ်တခီ ကဲထီၣ်ဝဲပၣ်တံၣ်အံၤကရၢခိၣ်ခံန့ၣ်လီၤ.
ပၣ်တံၣ်ခံဖုအံၤအကရၢဖိသ့ၣ်တဖၣ်တခီကဲထီၣ်ဝဲကိတိာ်သ့ၣ်တဖၣ်န့ၣ်လီၤ.
Liberal-National ကရၢပာ်ဖှိၣ်အတၢ်အိၣ်သးန့ၣ်, ထီဘိပှၤလၢအဒိးန့ၢ်ဘၣ်လီၢ်ဆ့ၣ်နီၤအါန့ၣ်မ့ၢ်ဝဲ Liberal ပၣ်တံၣ်, လၢ Liberal ပၣ်တံၣ်အခိၣ်သ့ၣ်တဖၣ်ကဲထီၣ် ကိတိာ်ခိၣ်ကျၢၢ်အိၣ်ဝဲန့ၣ်လီၤ.
Dr Sheppard စံးဝဲဒၣ် National Party အတၢ်မၤတုၤထီၣ်ထီၣ်ဘးသ့ၣ်တဖၣ်န့ၣ် တဘျီတခီၣ်မ့ၢ်ဝဲတၢ်စုဒုဖိန့ၣ်လီၤ.
“ပှၤအီစထြ့လယါဖိထံရူၢ်ကီၢ်သဲးအပူၤန့ၣ် တၢ်ဆိတၢ်ကမီၤလၢ Nationals ဒိးန့ၢ်ဘၣ်အီၤအအါကတၢၢ်န့ၣ် မ့ၢ်ခီဖိ=အတၢ်မၤသကိးဘူးဘူးတံၢ်တံၢ်ဒီး Liberal ကိတိာ်ခိၣ်ကျၢၢ်န့ၣ်လီၤ. အဝဲသ့ၣ်အနီၣ်ကစၢ်ခွဲးယာ်ဒၣ်ဝဲန့ၣ် Nationals အံၤ အဒုးအိၣ်ထီၣ်ပဒိၣ် တအိၣ်နီတဘျီဘၣ်. အဝဲသ့ၣ်န့ၣ် အတဒိၣ်တုၤလၢ အလၢပှဲၤထီၣ်ဘးဘၣ်. အဃိအဝဲသ့ၣ်မၤသကိးတၢ်ဒီး Liberal Party ဒ်ကရၢစၢဖှိၣ်အသိး, ဒီးအဝဲသ့ၣ်မၤစၢၤ အီၤလၢကဒုးအိၣ်ထီၣ်ပဒိၣ်, ဖဲ Nationals အံၤမ့ၢ်တပၣ်ဃုာ်ဘၣ်အခါ, အါတက့ၢ် Labor Party ကဲထီၣ်ပဒိၣ်အါန့ၢ်ဒ်အဝဲသ့ၣ်န့ၣ်လီၤ. တၢ်အံၤအခီပညီတမ့ၢ်လၢ Liberals ဒီး Nationals အဘၢၣ်စၢၤတၢ်ရ့လိာ်န့ၣ် အမုာ်ဒိၣ်မးဘၣ်, ခီဖျိလၢ အပှၤခံဖုလၢၤအံၤ အဆီၣ်ထွဲပနံးတၢ်ဖံးတၢ်မၤအမဲာ်ညါန့ၣ်, ပၣ်တံၣ်တဖုန့ၣ် ဘၣ်သးဝဲ တၢ်ကူၣ်လဲၤမးကၤသဘျ့ဒိၣ်မး ဒီး ပၣ်တံၣ်အဝဲတဖုတခီန့ၣ် အသးဟ့ တၢ်ကူၣ်လဲၤမၤကၤသဘျ့အဃိန့ၣ်လီၤ. ဒီးဖဲနတၢ်ဖံးတၢ်မၤပျဲၢ်စီၣ်အဖီခိၣ်န့ၣ် တၢ်အံၤမ့ၢ်တၢ်ဂ့ၢ်ဖးဒိၣ်တခါအဃိ, တၢ်ကီသပှၢ်ကတၢၢ်န့ၣ်လီၤ. အဃိ ယဆိကမိၣ် Nationals အနီၣ်ဝံာ်လၢ တၢ်မၤတုၤထီၣ်ထီၣ်ဘးသ့ၣ်တဖၣ်န့ၣ် မ့ၢ်တၢ်လၢအထုးဃာ် တၢ်လၢ Liberal Party ကမၤအီၤသ့ၣ်တဖၣ်. ဒီးအတမ့ၢ်တၢ်လၢတၢ်ထံၣ်အီၤသ့ထီဘိဘၣ်န့ၣ်လီၤ.”
ခီဖျိလၢမၤသကိးတၢ်တပူၤဃီဒ်သိးကရၢစၢဖှိၣ်အသိးအဃိ, ပၣ်တံၣ်ခံဖုအံၤ ထုးန့ၢ်ပှၤဟ့ၣ်တၢ်ဖးအသးသ့ဝဲန့ၣ်လီၤ.
Liberal Party န့ၣ် ပာ်တၢ်ပညိၣ်လၢ ဝ့ၢ်ဖးဒိၣ်အတၢ်ဂ့ၢ်သ့ၣ်တဖၣ်သ့ဝဲဒီး National Party န့ၣ် ကဲပှၤစဲၤနီၣ်လီၤလီၤဆီဆီ လၢခိခိၣ်ဟီၣ်ကဝီၤအဂီၢ်သ့ဝဲန့ၣ်လီၤ.
ဘၣ်ဆၣ်သနာ်က့ Dr Sheppard စံးဝဲဒၣ် လီၢ်ကဝီၤတၢ်ပြၢသ့ၣ်တဖၣ် အိၣ်ဒ်ဝဲစှၤကိးခါန့ၣ်လီၤ.
“လီၢ်ဆ့ၣ်နီၤအိၣ်ဝဲတနီၤလၢအဝဲသ့ၣ်နုာ်လီၤပြၢအီၤ. သကုၤထံကီၢ်ဒီဘ့ၣ်အပူၤ လီၢ်ဆ့ၣ်နီၤအိၣ်ဝဲယဲၢ်ခါဃၣ်ဃၣ် လၢ Liberal Party ဒီး National Party ခၢၣ်စးဒိးဃုထၢသးသ့ၣ်တဖၣ် တဂၤဒီးတဂၤန့ၣ် ပြၢလိာ်အသး. ဘၣ်မနုၤလၢအဝဲသ့ၣ်ဘၣ်ပြၢလိာ်အသးလဲၣ်န့ၣ်တၢ်ဂ့ၢ်တအိၣ်နီတမံၤဘၣ်. မ့ၢ်ကွၢ်လၢကျိၤကျဲတၢ်မၤခိၣ်သ့ၣ်န့ၣ်မ့ၢ်ဝဲတၢ်လၢအတဂ့ၤဘၣ်သပှၢ်ကတၢၢ်တခါန့ၣ်လီၤ. ဘၣ်ဆၣ်သနာ်က့အဝဲသ့ၣ်ဆဲးမၤဝဲဒၣ်အီၤ, အါတက့ၢ်ဒုကမ့ၢ်ခီဖျိ လၢအကံၢ်အလဲအပူၤန့ၣ်, အဝဲသ့ၣ်တဖုစုာ်စုာ်အံၤ တအဲၣ်ဒိးလိာ်အသးဘၣ်သပှၢ်ပှၢ်န့ၣ်လီၤ. အဃိ အဝဲသ့ၣ်မ့ၢ်အိၣ်ဒီးတၢ်ဆီၣ်သနံး အတြဲၤဖိတဆဲးန့ၣ်, သကုၤထံကီၢ်ဒီဘ့ၣ်တၢ်ပြၢအပူၤ လၢအဝဲသ့ၣ်ဘၣ်ပြၢလိာ်သးလိၤလိၤန့ၣ်, အိၣ်ဖျါဒ်သိးအမ့ၢ် တၢ်လၢအဝဲသ့ၣ်လိၣ်ဘၣ်အီၤခဲကနံၣ်အံၤန့ၣ်လီၤ. ကိးဆၢကတီၢ်ဒဲးအပူၤ ၉၉ မျးကယၤန့ၣ် အဝဲသ့ၣ်မ့ၢ်ပှၤမၤသကိးတၢ်လၢအအိၣ်ဒီးတၢ်သးဖှံန့ၣ်လီၤ.”
ခဲကနံၣ်အံၤန့ၣ်, David Littleproud မ့ၢ်ဝဲ National အခိၣ် လၢအမ့ၢ် တၢ်လၢအဒုးကဲထီၣ်အီၤ ကရၢစၢဖှိၣ် အကရၢခိၣ်ခံတဂၤန့ၣ်လီၤ.
ကရၢစၢဖှိၣ်အံၤမ့ၢ်မၤနၢၤတၢ်ဃုထၢန့ၣ်, အဝဲကကဲထီၣ်ဘၣ်ဝဲ အီစထြ့လယါကီၢ် ကိတိာ်ခိၣ်ကျၢၢ် —၂ န့ၣ်လီၤ.
မဲာ်သၣ်အဂၤတဘ့ၣ်လၢ တၢ်ပလီၢ်ဘၣ်အီၤန့ၣ်မ့ၢ်ဝဲဒၣ် Barnaby Joyce, လၢအမ့ၢ်ပှၤတဂၤလၢအအိၣ်ဒ်ဖဲဘျီၣ်ဒိၣ်အပူၤဒီး တီခိၣ်ရိၤမဲဝဲပၣ်တံၣ်အံၤခံဘျီညါန့ၣ်လီၤ.
ဖဲ Queensland ဒီး Northern Territory အပူၤန့ၣ် အဝဲသ့ၣ်ပာ်ဖှိၣ်ဃုာ်အသးဒီး Liberal Party, လၢအဘၣ်တၢ်သ့ၣ်ညါအီၤဒ်သိး LNP ဒီး ပာ်ဒိၣ်ပာ်ထီအီၤဒ်သိး Country Liberal Party န့ၣ်လီၤ.
ဖဲတၢ်ဃုထၢအံၤ, Nationals ပာ်လီၤဝဲသနူသ့ၣ်တဖၣ် လၢအအိၣ်ဒီးတၢ်ပညိၣ်လၢကမၤလဲၤထီၣ်လဲၤထီအီစထြ့လယါကီၢ်ခိခိၣ်ဟီၣ်ကဝီၤ လၢအပၣ်ဃုာ်:
- မၤစှၤလီၤလီမ့ၣ်အူအတၢ်လၢၤဘူၣ်လၢၤစ့ ဒ်အမ့ၢ်တၢ်မၤအါထီၣ်တၢ်သူဂာ်သဝံ
- သူၣ်အါထီၣ်ဟံၣ်ဃီဖဲခိခိၣ်ဟီၣ်ကဝီၤသ့ၣ်တဖၣ်အပူၤ
- ထုးသံကွံာ်တၢ်တြီတံာ် တၢ်ဆါဟးထီၣ်သိလၢအမူသ့ၣ်တဖၣ်ဆူထံချၢကီၢ်ချၢ
- ဒီးမၤလဲၤထီၣ်လဲၤထီ ပနံးတၢ်ဖံးတၢ်မၤဖးဒိၣ် လၢအလီၤဂာ်ဒ်သိးစူဖၢၣ်မၣ်ကဲၣ်သ့ၣ်တဖၣ် အတၢ်ရ့ပှၤထူစံာ်ဖိအကျိၤအကျဲ.
အဃိပၣ်တံၣ်အံၤအဂံၢ်ခီၣ်ထံးသနူတၢ်ဘိးဘၣ်ရၤလီၤန့ၣ်ဖီၣ်ဂၢၢ်ကျၢၤဃာ်ဝဲဒ်လဲၣ်?
Dr Sheppard စံးလၢ ဖီၣ်ဂၢၢ်ဃာ်ဝဲန့ၢ်ဂ့ၤဂ့ၤဖိန့ၣ်လီၤ.
“Nationals အံၤ အဝဲသ့ၣ်အိၣ်တီအိၣ်လိၤဝဲဒီးအဝဲသ့ၣ်တၢ်ထံၣ်တၢ်ဆိကမိၣ် ဒ်အဝဲသ့ၣ်အဲၣ်ဒိးအပၣ်တံၣ်အသိးန့ၣ်လီၤ. အခဲအံၤန့ၣ်, ဘၣ်သ့ၣ်သ့ၣ် ဖဲ Nationals အံၤအပူၤ ပှၤလၢအတသးလီၤပလိာ်ဒီးယၤဘၣ်ကအိၣ်ဝဲ, နာ်သက့ ဘၣ်ဃးဒီး တၢ်အိၣ်ဒီး တၢ်သ့ၣ်ညါတၢ်ပညိၣ်ရှဲရှဲဖိအဂ့ၢ်န့ၣ်, မ့ၢ်ဝဲ ပကဲခၢၣ်စးလၢ စဲးဖီကဟၣ်တၢ်ဖံးတၢ်မၤလီၢ်သ့ၣ်တဖၣ်အံၤအဂီၢ်ဒီး အဝဲသ့ၣ်န့ၣ် အတဆီတလဲနီတစဲးဘၣ်န့ၣ်လီၤ.”
