တၢ်ဃုထၢတဘျီအံၤ ပှၤသုးလီၢ်အိၣ်ဆိးသနူသ့ၣ်တဖၣ် မ့ၢ်ဝဲတၢ်ဂ့ၢ်ခိၣ်တီလၢအကိၢ်ဟဲတခါ, နာ်သက့ ကလုာ်ဒူၣ်အါကလုာ်အပှၤတဝၢသ့ၣ်တဖၣ် အဝဲသ့ၣ်ကဟ့ၣ်တၢ်ဖးဒ်လဲၣ်န့ၣ်တအိၣ်ဖျါရှဲရှဲဒ်ဘၣ်.
တၢ်ကလုၢ်တဖၣ်: https://www.sbs.com.au/language/karen/kar/collection/podcast/0ms9u5vjn
Fowler ဟီၣ်ကဝီၤ ခၢၣ်စးအိၣ်သဘျ့ကရၢဖိ Dai Le စံးဝဲဒၣ် ပှၤအိၣ်အါမး ဖဲအဝဲတၢ်ဟ့ၣ်တၢ်ဖးအလီၢ်, လၢအမ့ၢ် ဆ့ၣ်ဒနံၤဝ့ၢ် လုၢ်လၢ်ဆဲးလၤအိၣ်ဖှိၣ်အါမးအတၢ်လီၢ်တတီၤအပူၤန့ၣ်, အီစထြ့လယါကီၢ်ထံရူၢ်ကီၢ်သဲးသနူသ့ၣ်တဖၣ် မၤတၢ်မၤဒ်လဲၣ်န့ၣ် တသ့ၣ်ညါနၢ်ပၢၢ်သ့ၣ်ဝဲဒၣ်ဘၣ်.
တၢ်သ့ၣ်ညါနၢ်ပၢၢ်ထံရူၢ်ကီၢ်သဲးတအိၣ်နီတဆဲးဖိဘၣ်, Zero လီၤ.Dai Le, federal member for Fowler
အဝဲတဲဘၣ် SBS Examines တၢ်ရဲၣ်တၢ်ကျဲၤလၢ ပၣ်တံၣ်ဖးဒိၣ်သ့ၣ်တဖၣ် ကျဲးစၢးဃ့သကွံကညးပှၤသုးလီၢ်အိၣ်ဆိးအပှၤတဝၢသ့ၣ်တဖၣ်, နာ်သက့ အဝဲသ့ၣ်န့ၣ် အတပာ်တၢ်ပညိၣ်လီၤဆူ ပှၤသုးလီၢ်အိၣ်ဆိးသ့ၣ်တဖၣ်အတၢ်ထံၣ်တၢ်ပာ်သးသ့ၣ်တဖၣ်အဖီခိၣ်ဘၣ်.
အဝဲစံးဝဲဒၣ်, “အဝဲသ့ၣ်သူပှၤသုးလီၢ်အိၣ်ဆိးသ့ၣ်တဖၣ်အတၢ်ဖး, တၢ်လၢအဝဲသ့ၣ်မၤအီၤတခီန့ၣ် လီၤဆီလိာ်အသးဒီးပှၤသုးလီၢ်အိၣ်ဆိးသ့ၣ်တဖၣ် အတၢ်လိၣ်ဘၣ်ဒီး အတၢ်ဂ့ၢ်ကီသ့ၣ်တဖၣ်.”
“ယဆၢမုၢ်လၢ်လၢတၢ်အံၤ ကဆီတလဲအသး. အဃိန့ၣ်, မ့ၢ်တၢ်လီၤသးစၢၢ်ဆၢတခါ လၢပကထံၣ်ဘၣ်အီၤဖဲ တၢ်ဃုထၢတဘျီအံၤ အကဆီတလဲတၢ်အံၤဒ်လဲၣ်, ခီဖျိလၢခၢၣ်စးသဘျ့သ့ၣ်တဖၣ်အါထီၣ်အဃိန့ၣ်လီၤ. ယဆၢမုၢ်လၢ်လၢ တၢ်အံၤကဆီတလဲအသး တဆဲးဖိန့ၣ်လီၤ.”
သရၣ်မုၣ်ဒိၣ်စိသဃဲၤ Sukhmani Khorana လၢ University of New South Wales တဂၤ မၤတၢ်ဃိထံသ့ၣ်ညါဘၣ်ဃး အီစထြ့လယါကီၢ်ပူၤ တရူးဒီးအ့ရှၢၢ်ကလံၤထံးအပှၤတဝၢလၢအဒိၣ်ထီၣ်ချ့မးသ့ၣ်တဖၣ် တၢ်သ့ၣ်ညါနၢ်ပၢၢ်ထံရူၢ်ကီၢ်သဲးဒီးတၢ်နုာ်လီၤပၣ်ဃုာ်အဂ့ၢ်န့ၣ်လီၤ.
အဝဲစံးလၢ ပှၤတဝၢသ့ၣ်တဖၣ်အံၤ မ့ၢ်ပှၤဟ့ၣ်တၢ်ဖးလၢ အတအိၣ်ပာ်စၢၤဒီးတၢ်ဆၢတဲာ်ဘၣ် — လၢကဟ့ၣ်တၢ်ဖးဆူပၣ်တံၣ်တခါအဂီၢ် —အလီၢ်န့ၣ် အဝဲသ့ၣ်ဟ့ၣ်ဝဲတၢ်ဖးလၢတၢ်ဂ့ၢ်သ့ၣ်တဖၣ်အဖီခိၣ်န့ၣ်လီၤ.
အဝဲစံးဝဲဒၣ်, “ဒိးသန့ၤထီၣ်အသးလၢ တၢ်လီၤတၢ်ကရၢကရိလၢတၢ်ဃုထၢအဂီၢ်အဖီခိၣ် တၢ်ပာ်သးသ့ၣ်တဖၣ်န့ၣ် အိၣ်သုးအသး လၢ Labor ဆူ Liberal န့ၣ်လီၤ.”
မတဂၤမ့ၢ်စုထွဲ? မတဂၤမ့ၢ်စုစ့ၣ်? တၢ်ပာ်ဖျါအံၤ ပကွၢ်ဝဲဒၣ် ပှၤသုးလီၢ်အိၣ်ဆိးအပှၤတဝၢသ့ၣ်တဖၣ် သုးဘူးထီၣ်အသးဒီး အီစထြ့လယါကီၢ်ပူၤ ထံရူၢ်ကီၢ်သဲးဒ်လဲၣ်န့ၣ်လီၤ.
