အီစထြ့လယါသးစၢ်ကဒိးန့ၢ်ဘၣ်တၢ်မၤကွၢ်ကလီ DNA လၢအဃုသ့ၣ်ညါ ခဲစၢၣ်ဒီး သးတၢ်ဆါအိၣ်တအိၣ်

ပှၤအီစထြ့လယါသးစၢ် အကထိအါမး လၢတၢ်ပာ်ပနီၣ်အီၤဒ်အမ့ၢ် ပှၤလၢအတၢ်လီၤဘၣ်ယိၣ်အိၣ်ဒိၣ်လၢ ကန့ၢ်ဘၣ်ခဲစၢၣ်တၢ်ဆါဒီး သးတၢ်ဆါသ့ၣ်တဖၣ် တၢ်ကမၤကွၢ်ကလီန့ၢ်အဝဲသ့ၣ် D-N-A လၢအကဃုသ့ၣ်ညါ မ့ၢ်အဝဲသ့ၣ်တၢ်လီၤဘၣ်ယိၣ်အိၣ်လၢတၢ်ဆါသ့ၣ်တဖၣ်အံၤဧါန့ၣ်လီၤ။

ဟီၣ်ခိၣ်ဒီဖျၢၣ်အပူၤ တၢ်အံၤမ့ၢ်ဝဲ တၢ်ရဲၣ်တၢ်ကျဲၤ အဆိကတၢၢ်တခါ လၢတၢ်ကမၤကွၢ်ကလီန့ၢ်အဝဲသ့ၣ်န့ၣ်လီၤ။ ခီဖျိလၢတၢ်မၤကွၢ်အံၤအဃိ တၢ်မ့ၢ်ထံၣ်န့ၢ်ဆိပာ်စၢၤလၢတၢ်လီၤဘၣ်ယိၣ်အိၣ်န့ၣ် တၢ်ဒီသဒၢဆိအီၤကန့ၢ်ဝဲဒီး ကမၤပူၤဖျဲးသးသမူအါမးန့ၣ်လီၤ။

တၢ်မၤကွၢ်ဆိ အတၢ်ရဲၣ်တၢ်ကျဲၤအံၤ ကမၤစၢၤဆူၣ်ချ့ဝဲၤကျိၤ အတၢ်လၢၤဘူၣ်လၢၤစ့ မ့ၢ်လၢတၢ်သ့ၣ်ညါဆိအဃိ တၢ်ဒီသဒၢဆိအီၤကန့ၢ်ဝဲအဃိန့ၣ်လီၤ။