Дан ганц Монголчуудын төдийгүй Австралийн олон түмэнд үндэсний урлагаа таниулан сурталчлах ажилд хоёргүй сэтгэлээр зүтгэж буй тэр хүн бол олон түмнээ Бөхө хэмээн танигдсан уран бүтээлч, хөөмийч Ганбүргэдийн Бөхчулуун юм.
Өдгөө Австралийн Сидней хотод эхнэр хоёр хүүхдийн хамт оршин суугаа тэрээр 2009 онд анх энэ тивд хөл тавьж байжээ. Түүнээс хойш үндэсний урлаг морин хуур, хөөмийгөө Австраличуудад таниулах ажилыг зогсолтгүй хийж ирсэн бөгөөд дэлхийн хэмжээний шоу болох The Voice-д оролцож байсныг нь бидний олонх андахгүй мэдэх билээ.
