दर्शकहरूमा निकै चर्चित खाना पकाउने प्रतियोगिता मास्टर सेफ अस्ट्रेलियाका निर्णायक मण्डलमध्येका एक जर्ज कलम्बरिसले आफ्ना कर्मचारीहरूको ८० लाख डलर पारिश्रमिक ठगी गरेको समाचारहरू आइरहँदा आगामी वर्षको कार्यक्रममा उनी नरहने भएका छन्।
महान्यायाधिवक्ता क्रिस्टियन पोर्टरले ८० लाख डलरको पारिश्रमिक ठगी गर्ने कलाम्बरिसलाई २ लाख डलर मात्र जरिवाना गरिनु अत्यन्त कम भएको बताएका छन्।
गत हप्ता मात्र उनलाई आफ्नो रेस्टुरेन्टमा काम गर्ने कर्मचारीहरूलाई कम तलब दिएर काम लगाएको भन्दै २ लाख डलर जरिवाना तिर्न भनिएको थियो।
एबिसी रेडियोमा कुरा गर्दै पोर्टरले सरकारले पारिश्रमिक ठगी गर्नेलाई तिराइने जरिवाना बारे सरकारले समीक्षा गर्ने पनि बताएका छन्।
कलाम्बरिसको कर्मचारीहरूलाई कम पारिश्रमिक दिएको विषय सतहमा आए पछि मास्टर सेफ अस्ट्रेलिया कार्यक्रमबाट उनलाई हटाइनु पर्ने दबाब नेटवर्क टेनले झेलिरहेको थियो।
यसै बिच जर्ज कलाम्बरिस सँगै ११ वर्ष देखि उक्त कार्यक्रमको निर्णायकका रूपमा रहेका ग्यारी मीगन र म्याट प्रिस्टनले पनि यो वर्षको कार्यक्रम नै आफूहरूको अन्तिम सिजन हुने बताएका छन्।
मङ्गलवार (जुलाई २३) मा अन्तिम पटक देखा परेका तिनै जनाले व्यापारिक समझदारीमा कुरा नमिले पछि कार्यक्रम छोडेको नेटवर्क टेनका प्रमुख कार्यकारी अधिकृत पल एण्डर्सनले बताएका छन्।
महिनौँ सम्म समझदारीको प्रयास भए पनि त्यो असफल भए पछि उनीहरू आगामी वर्षको कार्यक्रममा नदेखिने एण्डर्सनको भनाइ रहेको छ।
उता, ग्यारी मीगनले चाहिँ कार्यक्रम छोड्नुको पछाडि आर्थिक कारण नभएको बताएका छन्।
