नर्दन टेरीटरीले आफ्नो राज्यमा क्वारीटीन क्षमतालाई दोब्बर बनाउने भएपछि अन्य मुलुकमा फसेका नागरिक फिर्ता लिएर आउन केही सहज हुने देखिन्छ ।
राज्यले सङ्घीय सरकार सँग हावर्ड स्पिङमा रहेको क्वरीनटिन व्यवस्थालाई पाँच सय बाट बढाएर एक हजार पुर्याउनका लागि सहमति जुटाउने प्रयास गरिरहेको बताइएको छ ।
हाल करिब ३६ हजार अस्ट्रेलियनहरू विभिन्न मुलुकमा फसिरहेको बताइन्छ । ति मध्ये ८ हजार भन्दा बढी मानिसहरू फर्कनै पर्ने अवस्थाका रहेको सरकारी तथ्याङ्कले देखाएको छ ।
प्रधानमन्त्री स्कट मोरीसनले राष्ट्रको क्वारीनटीन क्षमता कम भएका कारण अस्ट्रेलियाली घर फर्कन नपाएको दोष लगाउँदै आएका छन् ।
यता विपक्षी लेबरले राज्यद्वारा सञ्चालित होटेल क्वारीनटीनमा औला ठड्याउनुको सट्टा यसको क्षमता वृद्धिमा ध्यान दिन आग्रह गरिरहेको छ ।
विपक्षी नेता एन्थोनी अल्बानेजीले भने संबिधानत यो जिम्मेवारी कमलवेल्थ सरकारको रहेको जिकिर गर्छन् ।
“सबै श्रोतहरूको प्रयोग गरेर हामीले धेरै भन्दा धेरै मानिसहरूलाई फिर्ता ल्याउनु पर्छ” थ्री ए डब्ल्यु सँगको कुराकानीमा उनले भने ।
आउँदो डिसेम्बर सम्म करिब २६ हजार सात सय मानिसलाई अस्ट्रेलिया फिर्ता गरिसक्ने प्रधानमन्त्रीको योजना रहेको छ ।
“अस्ट्रेलियाले फसेकाहरूलाई घर फिर्ता गर्न सक्दो प्रयास गरिरहेको छ । ” बिहीबार क्यानबेरामा पत्रकारहरू सँग उनले भने ।
गत मार्च देखि हाल सम्म ४ लाख २६ हजार अस्ट्रेलियालीहरू घर फर्किसकेको सरकारको तथ्याङले देखाएको छ ।
भिक्टोरियाले २८ औ दिन सम्म पनि कोरोना मुक्त रहन सफल भएपछि आउँदो डिसेम्बर ७ देखि अन्तर्राष्ट्रिय आगमन लाई स्वीकार गर्ने भएको छ ।
अन्य राज्यहरूले पनि क्वारीनटीन क्षमतालाई हालसालै वृद्धि गरेका छन् ।
