विगत १० दिन यता लगातार शून्य सङ्क्रमण देखिएको न्यु साउथ वेल्समा शुक्रवार देखि प्रतिबन्धहरूमा हेरफेर हुने भएको छ ।
गएको २४ घण्टामा शून्य सङ्क्रमण रहँदा राज्यका नियमहरूमा फेरबदल हुने भएको हो ।
भवन भित्र र बाहिर हुने जमघटहरूको सङ्ख्या बढाइएको छ भने सामाग्री खरिद गर्न पसलहरूमा जाँदाको अनिवार्य मास्क प्रयोगको नियमलाई पनि हटाइने भएको छ ।
राज्यकी प्रिमीयर ग्लेडीज बेरीजिक्लीयनले शुक्रवार देखि लागु हुने गरी ३० जना सम्म पाहुना घरमा बोलाउन सकिने बताइन् ।
यसै गरी पिकनिक तथा घर बाहिर हुने भेटघाटका कार्यक्रममा ५० जना सम्म भेला हुन पाउनेछन् ।
यसै गरी विवाह र अन्त्येष्टि समारोहमा ३ सय जना सम्म मानिसहरू भेला हुन पाउने भएका छन् ।
धार्मिक स्थल एवम् कर्पोरेट इभन्टेस्,आतिथ्य व्यवसाय लगायतमा भने यस अघिका भेला हुन पाउने सीमालाई हटाइएको छ ।
यद्यपि प्रति व्यक्ति चार वर्ग मिटरको दुरी भने कायम हुनु पर्ने प्रिमीयरले बताइन ।
प्रतिव्यक्ति चार वर्ग मिटरको दुरीलाई कम गरी दुई वर्ग मिटरमा झार्ने सम्बन्धी निर्णय केही हप्तामा गर्न सकिने पनि उनले बताइन् ।
“सार्वजनिक यातायातमा मास्कको प्रयोग अनिवार्य छ,यद्यपि पसलहरूमा भने समाजीक दुरी कायम गर्न नसकिने अवस्थामा मास्कको प्रयोग गर्न सुझाव दिइन्छ । ” प्रिमीयरले भनिन् ।
“हामी सँग अस्ट्रेलियाको सबैभन्दा बलियो क्वारीनटीन प्रणाली छ यद्यपि जति बलियो वा उत्तम प्रणाली भए पनि प्रकोपको जोखिम रहन्छ ।” उनले भनिन् ।
मास्क प्रयोग सम्बन्धी नियममा भने खुद्रा पसल जाँदा अनिवार्य नगरिने भएको छ ।
यद्यपि पब भित्रका गेमीङ जोन, धार्मिक स्थलहरूमा जाँदा र आतिथ्य व्यवसायमा ग्राहक सँग प्रत्यक्ष सरोकार राख्ने कर्मचारीले भने मास्क अनिवार्य लगाउनु पर्नेछ ।
सार्वजनिक यातायातमा पनि मास्कको प्रयोग अनिवार्य गरिएको छ ।
यसैबिच ढलको फोहर पानीमा कोभिड–१९ का अंशहरू भेटिएपछि सिड्नीको दक्षिण पश्चिमी क्षेत्रका बासिन्दाहरूलाई कोरोनाका लक्षणहरूका बारेमा ख्याल राख्न र जँचाउन आग्रह गरिएको छ ।
गएको २४ घण्टामा १० हजार मानिसले कोभिड–१९ को जाँच गराएकोमा यसलाई बढाउनु पर्नेमा प्रिमीयरले जोड दिएकी छन् ।
