महारानी एलिजाबेथ द्वितीयालाई सम्मान व्यक्त गर्नका लागि २२ सेप्टेम्बरमा अस्ट्रेलियालीहरूले सार्वजनिक बिदा पाउने भएका छन्।
प्रधानमन्त्री एन्थनी एल्बनिजीले आइतबार सो कुराको पुष्टि गरेका हुन्।
उनले भने, "मैले सम्पूर्ण प्रिमियरहरू तथा मुख्य मन्त्रीहरूसँग हिजो कुरा गरेको थिएँ र आज बिहान मैले यो आधिकारिक रूपमा लेखेर पठाएको छु। उहाँहरूले आफ्नो पत्र अहिले सम्ममा प्राप्त गरिसक्नु भएको होला। उहाँहरू सबैले एक दिनका लागि राष्ट्रिय बिदा दिने कुरा उपयुक्त भएकोमा सहमति जनाउनु भएको छ।"
राष्ट्रिय शोक दिवस मनाउने घोषणा सँगै आज गभर्नर जेनेरल डेभिड हार्लीले राजा चार्ल्स तृतीयले राज सिंहासनमा बसेको घोषणा गर्ने छन्।
नोर्मन राजा विलियम द कन्कररले इङ्ग्लिस राजगद्दीलाई सन् १०६६ मा कब्जामा लिएपछि राजगद्दीमा आसीन हुने राजा चार्ल्स ४१ औँ हुन्।
शनिवार नै लन्डनस्थित सेन्ट जेम्सेज प्यालेसमा आयोजित एक विशेष समारोहमा उनलाई राजा घोषणा गरिए सकिएको छ।
इतिहासमा पहिलो पटक टेलिभिजनमा प्रसारण गरिएको घोषणा समारोहको इतिहास भने सयौँ वर्षा पहिलेको इतिहाससँग जोडिएको छ।
१९ सेप्टेम्बरमा हुने महारानीको अन्त्येष्टिमा अमेरिकी राष्ट्रपति जो बाइडेन र अस्ट्रेलियाका प्रधानमन्त्री एन्थनी एल्बनिजीको पनि उपस्थिति रहने अनुमान गरिएको छ।
