ਆਸਟ੍ਰੇਲੀਆ ਦੇ ਪ੍ਰਧਾਨ ਮੰਤਰੀ ਐਂਥਨੀ ਅਲਬਨੀਜ਼ੀ ਵੱਲੋਂ ਵਿਰੋਧ ਦੇ ਬਾਵਜੂਦ ਵੀ ਰਾਸ਼ਟਰੀ ਸੋਗ ਦਾ ਦਿਨ ਐਲਾਨ ਕਰਨ ਦੇ ਆਪਣੇ ਫੈਸਲੇ ਨੂੰ ਸਹੀ ਠਹਿਰਾਇਆ ਜਾ ਰਿਹਾ ਹੈ।
ਆਪਣੇ ਇਸ ਫੈਸਲੇ ਦਾ ਬਚਾਅ ਕਰਦੇ ਹੋਏ ਉਹਨਾਂ ਕੈਨਬਰਾ ਦੇ ਸੰਸਦ ਭਵਨ ਵਿਖੇ ਗੱਲ ਕਰਦਿਆਂ ਕਿਹਾ ਕਿ ਪੂਰੇ ਦੇਸ਼ ਉੱਤੇ ਮਹਾਰਾਣੀ ਦੇ ਜੀਵਨ ਕਾਲ ਦੌਰਾਨ ਖ਼ਾਸ ਪ੍ਰਭਾਵ ਰਿਹਾ ਹੈ।
ਵਿਰੋਧੀ ਧਿਰ ਦੇ ਨੇਤਾ ਪੀਟਰ ਡਟਨ ਨੇ ਵੀ ਮਰਹੂਮ ਮਹਾਰਾਣੀ ਨੂੰ ਸ਼ਰਧਾਂਜਲੀ ਦਿੱਤੀ।
ਹਾਲਾਂਕਿ ਮੈਮੋਰੀਅਲ ਦੌਰਾਨ ਪਬਲਿਕ ਤੋਂ ਬਹੁਤ ਘੱਟ ਲੋਕਾਂ ਦੀ ਸ਼ਮੂਲੀਅਤ ਦੇਖਣ ਨੂੰ ਮਿਲੀ ਪਰ ਸਾਬਕਾ ਪ੍ਰਧਾਨ ਮੰਤਰੀ ਸਕਾਟ ਮੌਰੀਸਨ, ਜੌਨ ਹਾਵਰਡ ਅਤੇ ਪਾਲ ਕੀਟਿੰਗ ਸਮੇਤ ਲਗਭਗ 600 ਪਤਵੰਤਿਆਂ ਲਈ ਸੱਦਾ ਪੱਤਰ ਭੇਜੇ ਗਏ ਸਨ।
ਇਸ ਦੌਰਾਨ ਅੱਠ ਵਾਰ ਆਰਚੀਬਾਲਡ ਪੁਰਸਕਾਰ ਜੇਤੂ ਸਰ ਵਿਲੀਅਮ ਡਾਰਗੀ ਦੀ 1954 ਦੀ ਮਹਾਰਾਣੀ ਦੇ ਪੇਟਿੰਗ ਉੱਤੇ ਸ਼ਰਧਾਂਜਲੀ ਦੇ ਫੁੱਲ ਵੀ ਭੇਂਟ ਕੀਤੇ ਗਏ।
ਵਾਰਿਡਜੂਰੀ ਈਕੋਜ਼ ਵਜੋਂ ਜਾਣੇ ਜਾਂਦੇ ਇੱਕ ਸਮੂਹ ਵੱਲੋਂ ਇਸ ਸਮਾਗਮ ਵਿੱਚ ਰਸਮੀ ਤੌਰ 'ਸਵਦੇਸ਼ੀ ਸਵਾਗਤ' ਪੇਸ਼ ਕੀਤਾ ਗਿਆ।
ਪਰ ਬ੍ਰਿਸਬੇਨ, ਸਿਡਨੀ, ਕੈਨਬਰਾ ਅਤੇ ਮੈਲਬੌਰਨ ਵਿੱਚ ਇਕੱਠੀਆਂ ਹੋਈਆਂ ਭੀੜਾਂ ਲਈ ਇਹ ਕਾਫੀ ਨਹੀਂ ਸੀ।
ਪ੍ਰਦਰਸ਼ਨਕਾਰੀਆਂ ਵਿੱਚ ਫੈਡਰਲ ਗ੍ਰੀਨਜ਼ ਸੈਨੇਟਰ ਲਿਡੀਆ ਥੋਰਪੇ ਵੀ ਸ਼ਾਮਲ ਸਨ।
ਪ੍ਰਦਰਸ਼ਨਕਾਰੀਆਂ ਦਾ ਵਿਰੋਧ ਬਸਤੀਵਾਦ ਦੇ ਚੱਲ ਰਹੇ ਪ੍ਰਭਾਵਾਂ ਖਿਲਾਫ ਸੀ।
ਇਸ ਇਕੱਠ ਵਿੱਚ ਸ਼ਾਮਿਲ ਵੇਨ ਵਾਰਟਨ ਮੁਤਾਬਿਕ ਆਸਟ੍ਰੇਲੀਆ ਵਿੱਚ ਰਾਜਸ਼ਾਹੀ ਦੀ ਹੁਣ ਕੋਈ ਲੋੜ ਨਹੀਂ ਹੈ।
