ਰੈਡ ਕਰਾਸ ਦੁਆਰਾ ਕਰਵਾਏ ਸਰਵੇਖਣ ਦਾ ਮੰਨਣਾ ਹੈ ਕਿ ਆਸਟ੍ਰੇਲੀਆ ਹੋਰ ਵੀ ਵਧੀਆ ਰਹਿਣ ਦੀ ਜਗਾ ਬਣ ਸਕਦਾ ਹੈ ਜੇਕਰ ਇੱਥੋਂ ਦੇ ਲੋਕ ਹਰ ਦਿਨ ਘੱਟੋ-ਘੱਟ ਇੱਕ ਚੰਗਾ ਕੰਮ ਕਰਨ ਦੀ ਠਾਣ ਲੈਣ।
18 ਸਾਲਾਂ ਤੋਂ ਵਧ ਉਮਰ ਦੇ ਲਗਭਗ 1000 ਲੋਕਾਂ ਤੇ ਕੀਤੇ ਇਸ ਸਰਵੇਖਣ ਵਿੱਚ, ਦਸਾਂ ਵਿੱਚੋਂ ਹਰੇਕ 9 ਨੇ ਹੀ ਇਹ ਮੰਨਿਆ ਹੈ ਕਿ ਆਪਣੇ ਦੋਸਤਾਂ, ਪਰਿਵਾਰਕ ਮੈਂਬਰਾਂ, ਸਾਥੀ ਕਰਮਚਾਰੀਆਂ ਅਤੇ ਵਿਆਪਕ ਭਾਈਚਾਰੇ ਲਈ ਰੋਜਾਨਾਂ ਹੀ ਕੋਈ ਕੋਈ ਨਾ ਇੱਕ ਚੰਗਾ ਕਾਰਜ ਜਰੂਰ ਕਰਨਾ ਚਾਹੀਦਾ ਹੈ।
ਨਿਊ ਸਊਥ ਵੇਲਜ਼ ਰੈਡ ਕਰਾਸ ਦੀ ਡਾਇਰੈਕਟਰ ਪੋਪੀ ਬਰਾਊਨ ਨੇ ਦਸਿਆ ਕਿ ਸਰਵੇਖਣ ਕੀਤੇ 95% ਲੋਕਾਂ ਨੇ ਬੀਤੇ ਸਾਲ ਘੱਟੋ ਘੱਟ ਇੱਕ ਲੋਕ ਭਲਾਈ ਦਾ ਕੰਮ ਕੀਤਾ ਸੀ ਜਿਵੇਂ ਕਿ ਲੋੜਵੰਦਾਂ ਦੀ ਮਾਇਕ ਮਦਦ ਦੇ ਨਾਲ ਨਾਲ ਕਪੜੇ ਆਦਿ ਦੇਣੇ।
ਸਰਵੇਖਣ ਵਿੱਚ ਇਹ ਵੀ ਪਤਾ ਚਲਿਆ ਹੈ ਕਿ ਪੰਜਾਂ ਵਿੱਚ ਤਿੰਨ ਲੋਕ ਹੋਰ ਵੀ ਜਿਆਦਾ ਮਾਤਰਾ ਵਿੱਚ ਲੋਕ ਭਲਾਈ ਦੇ ਕੰਮ ਕਰਨ ਦੇ ਚਾਹਵਾਨ ਹਨ।
ਪਿਛਲੇ ਚਾਰ ਸਾਲਾਂ ਦੌਰਾਨ ਰੈਡ ਕਰਾਸ ਨੇ ਇਹ ਤੀਜਾ ਸਰਵੇਖਣ ਭਲਾਈ ਦੇ ਸਬੰਧ ਵਿੱਚ ਕਰਵਾਇਆ ਹੈ। ਇਹ ਸਰਵੇਖਣ ਉਸ ਸਮੇਂ ਕਰਵਾਇਆ ਗਿਆ ਹੈ ਜਿਸ ਸਮੇਂ ਆਸਟ੍ਰੇਲੀਅਨ ਭਾਈਚਾਰੇ ਦੇ 8500 ਤੋਂ ਵੀ ਜਿਆਦਾ ਲੋਕ ਆਪਣੇ ਗੁਆਂਢੀਆਂ ਅਤੇ ਹੋਰਨਾਂ ਲੋਕਾਂ ਦਾ ਹਾਲ ਚਾਲ ਜਾਨਣ ਦੀ ਕੋਸ਼ਿਸ਼ ਕਰਦੇ ਹਨ। ਰੈਡ ਕਰਾਸ ਵਲੋਂ ਕਰਵਾਏ ਜਾਣ ਵਾਲੇ ਇਸ ਪਰੋਗਰਾਮ ਤਹਿਤ ਸੇਵਾਦਾਰ ਇਕੱਲਤਾ ਵਿੱਚ ਰਹਿਣ ਵਾਲੇ ਲੋਕਾਂ ਦਾ ਰੋਜ਼ਾਨਾਂ ਜਾਂ ਹਰ ਹਫਤੇ ਹਾਲ ਚਾਲ ਪੁੱਛਦੇ ਹਨ।
ਮਿਸ ਬਰਾਊਨ ਅਨੁਸਾਰ ਇਕੱਲਤਾ ਵਿੱਚ ਜਿੰਦਗੀ ਗੁਜ਼ਾਰ ਰਹੇ ਲੋਕਾਂ ਵਾਸਤੇ ਇਹ ਸੰਪਰਕ ਕੀਤਾ ਜਾਣਾ ਹੀ ਉਹਨਾਂ ਵਾਸਤੇ ਬਾਹਰਲੀ ਦੁਨਿਆਂ ਨਾਲ ਸੰਪਰਕ ਬਨਾਉਣ ਵਾਲਾ ਹੋ ਨਿਬੜਦਾ ਹੈ। ਅਜਿਹੇ ਬਜ਼ੁਰਗ, ਖਾਸ ਕਰਕੇ ਦੂਜੀਆਂ ਭਾਸ਼ਾਵਾਂ ਬੋਲਣ ਵਾਲੇ ਤਾਂ ਇਹਨਾਂ ਸੇਵਾਦਾਰਾਂ ਨੂੰ ਬਹੁਤ ਸ਼ਿੱਦਤ ਨਾਲ ਉਡੀਕ ਕਰਦੇ ਹਨ।
ਇਹ ਖੋਜ ਦਰਸਾਉਂਦੀ ਹੈ ਕਿ ਆਸਟ੍ਰੇਲੀਅਨ ਲੋਕ ਕਾਫੀ ਦਿਆਲੂ ਹੁੰਦੇ ਜਾ ਰਹੇ ਹਨ। ਬਹੁਤਿਆਂ ਦਾ ਮੰਨਣਾ ਹੈ ਕਿ ਭਾਈਚਾਰੇ ਨੂੰ ਪਿਛਲੇ ਕਈ ਸਾਲਾਂ ਦੇ ਮੁਕਾਬਲੇ ਇਸ ਸਮੇਂ ਹੋਰ ਵੀ ਵਧੀਆ ਬਣਾਇਆ ਜਾਣਾ ਚਾਹੀਦਾ ਹੈ। ਚਾਲੀਆਂ ਸਾਲਾਂ ਤੋਂ ਉੱਪਰ ਦੇ ਲੋਕਾਂ ਵਿੱਚ ਇਹ ਭਾਵਨਾਂ, ਚਾਲੀਆਂ ਤੋਂ ਘੱਟ ਲੋਕਾਂ ਦੇ ਮੁਕਾਬਲੇ ਜਿਆਦਾ ਦੇਖੀ ਗਈ ਹੈ।
ਲੋਕ ਭਲਾਈ ਲਈ ਕੀਤੇ ਜਾਣ ਵਾਲੇ ਕੰਮਾਂ ਵਿੱਚ ਦੱਖਣੀ ਆਸਟ੍ਰੇਲੀਆ ਦੇ ਲੋਕਾਂ ਨੇ ਬਾਜ਼ੀ ਮਾਰੀ ਹੋਈ ਹੈ। 93% ਲੋਕਾਂ ਨੇ ‘ਹਰੇਕ ਦਿਨ, ਇੱਕ ਲੋਕ ਭਲਾਈ ਦਾ ਕੰਮ’ ਕਰਨ ਦਾ ਟੀਚਾ ਮਿੱਥਿਆ ਹੋਇਆ ਹੈ। ਇਸ ਤੋਂ ਬਾਅਦ ਸੂਚੀ ਵਿੱਚ ਆਉਂਦੇ ਹਨ ਕੂਈਨਜ਼ਲੈਂਡ, ਵਿਕਟੋਰੀਆ ਅਤੇ ਪੱਛਮੀ ਆਸਟ੍ਰੇਲੀਆ।
ਮੈਰੀ-ਐਨ ਯੋ ਪਿਛਲੇ ਇੱਕ ਦਹਾਕੇ ਤੋਂ ਰੈਡ ਕਰਾਸ ਨਾਲ ਜੁੜ ਕੇ ਸੇਵਾ ਕਰ ਰਹੀ ਹੈ। ਇਹ ‘ਫਾਈਂਡ ਮਾਈ ਫੈਮਿਲੀ’ ਨਾਮਕ ਉਸ ਉਪਰਾਲੇ ਲਈ ਸੇਵਾ ਕਰਦੀ ਹੈ ਜੋ ਉਹਨਾਂ ਲੋਕਾਂ ਨੂੰ ਆਪਣੇ ਪਰਿਵਾਰਾਂ ਨਾਲ ਜੁੜਨ ਵਿੱਚ ਮਦਦ ਕਰਦੀ ਹੈ, ਜੋ ਕਿ ਯੁੱਧਾਂ, ਕੁਦਰਤੀ ਕਰੋਪੀਆਂ ਜਾਂ ਪ੍ਰਵਾਸ ਆਦਿ ਕਰਕੇ ਇੱਕ ਦੂਜੇ ਤੋਂ ਅਲੱਗ ਹੋ ਚੁੱਕੇ ਹੁੰਦੇ ਹਨ।
ਮਰਦਾਂ ਦੇ ਮੁਕਾਬਲੇ ਔਰਤਾਂ ਜਿਆਦਾ ਹਮਦਰਦ-ਦਿਲ ਦੀਆਂ ਹੁੰਦੀਆਂ ਹਨ ਅਤੇ ਇਸੀ ਕਰਕੇ ਔਰਤਾਂ ਵਲੋਂ ਲੋਕ ਭਲਾਈ ਦੇ ਕੰਮ ਵੀ ਜਿਆਦਾ ਕੀਤੇ ਜਾਂਦੇ ਹਨ। ਇਹ ਅਨੁਪਾਤ 84% ਦੇ ਮੁਕਾਬਲੇ 62% ਦਰਜ ਕੀਤਾ ਗਿਆ ਹੈ।
ਪ੍ਰੋਫੈਸਰ ਬਾਉਮਾ ਦਾ ਮੰਨਣਾ ਹੈ ਕਿ ਸਿੱਖਿਆ ਦੁਆਰਾ ਲੋਕਾਂ ਵਿੱਚ ਭਲਾਈ ਕਰਨ ਦੀ ਜਾਗਰੂਕਤਾ ਹੋਰ ਵੀ ਚੰਗੀ ਤਰਾਂ ਨਾਲ ਫੈਲਾਈ ਜਾ ਸਕਦੀ ਹੈ।
Listen to SBS Punjabi Monday to Friday at 9 pm. Follow us on Facebook.
