ਮੈਲਬੌਰਨ ਤੋਂ ਸੁਖਨੂਰ ਅਤੇ ਖੁਸ਼ਨੂਰ ਕੌਰ ਰੰਗੀ ਨੇ ਇਸ ਵੇਲ਼ੇ ਵਿਸ਼ਵ ਅਥਲੈਟਿਕਸ ਰੈਂਕਿੰਗ ਦੀਆਂ ਪਹਿਲੀਆਂ ਦੋ ਥਾਵਾਂ ਮੱਲੀਆਂ ਹੋਈਆਂ ਹਨ। ਕੌਮੀ ਪੱਧਰ ਉੱਤੇ ਉਨ੍ਹਾਂ ਦੀ ਪ੍ਰਾਪਤੀਆਂ ਤੇ ਜਿੱਤੇ ਹੋਏ ਸੋਨੇ-ਚਾਂਦੀ ਦੇ ਤਗਮਿਆਂ ਤੋਂ ਸਹਿਜੇ ਹੀ ਅੰਦਾਜ਼ਾ ਲਾਇਆ ਜਾ ਸਕਦਾ ਹੈ ਕਿ ਉਹ ਆਉਣ ਵਾਲ਼ੇ ਸਮੇਂ ਵਿੱਚ ਆਸਟ੍ਰੇਲੀਆ ਹੀ ਨਹੀਂ ਬਲਕਿ ਵਿਸ਼ਵ ਦੀਆਂ ਸਿਰਕੱਢ ਅਥਲੀਟ ਬਣਨ ਦੀ ਤਾਕਤ ਅਤੇ ਨਿਪੁੰਨਤਾ ਰੱਖਦੀਆਂ ਹਨ।
ਮੈਲਬੌਰਨ ਦੀ ਮੈਰੀਬਿਰਨੌਂਗ ਸਪੋਰਟਸ ਅਕੈਡਮੀ ਵਿੱਚ ਪੜ੍ਹਦੀਆਂ 16-ਸਾਲਾ ਜੁੜਵਾ ਪੰਜਾਬੀ ਭੈਣਾਂ ਅੰਡਰ-18 ਵਰਗ 'ਚ ਆਸਟ੍ਰੇਲੀਆ ਦੀਆਂ ਮੋਹਰੀ ਪੋਲ ਵਾਲਟਰ ਹਨ, ਜੋ ਐਥਲੈਟਿਕਸ ਦੀ ਦੁਨੀਆ 'ਚ ਆਪਣੀ ਛਾਪ ਛੱਡਣ ਲਈ ਨਿਰੰਤਰ ਯਤਨਸ਼ੀਲ ਹਨ।
ਪੋਲ ਵਾਲਟਿੰਗ ਇੱਕ ਅਜਿਹਾ ਖੇਡ ਮੁਕਬਲਾ ਹੁੰਦਾ ਹੈ ਜਿਸ ਵਿੱਚ ਖਿਡਾਰੀ ਨੇ ਇੱਕ ਰਨਵੇ ਉੱਤੇ ਦੌੜਕੇ ਇੱਕ ਲਚਕੀਲੀ ਸੋਟੀ ਦੇ ਸਹਾਰੇ ਉੱਚੀ ਛਾਲ ਮਾਰਨੀ ਹੁੰਦੀ ਹੈ।
ਸੁਖਨੂਰ 3.70 ਮੀਟਰ ਦੇ ਨਿੱਜੀ ਸਰਵੋਤਮ ਸਥਾਨ ਨਾਲ ਤੇ ਖੁਸ਼ਨੂਰ 3.50 ਮੀਟਰ ਦੀ ਉਚਾਈ ਨਾਲ ਕਈ ਰਾਸ਼ਟਰੀ ਅਤੇ ਰਾਜ ਪੱਧਰ ਦੀਆਂ ਪੋਲ ਵਾਲਟਿੰਗ ਚੈਂਪੀਅਨਸ਼ਿਪਾਂ ਵਿੱਚ ਸੋਨੇ ਅਤੇ ਚਾਂਦੀ ਦੇ ਤਗਮੇ ਜਿੱਤ ਚੁੱਕੀਆਂ ਹਨ।
ਸੁਖਨੂਰ ਨੇ ਪਿਛਲੇ ਸਾਲ ਮਾਰਚ ਵਿੱਚ ਰਾਸ਼ਟਰੀ ਖਿਤਾਬ ਜਿੱਤਿਆ ਸੀ ਅਤੇ ਵਿਕਟੋਰੀਅਨ ਆਲ ਸਕੂਲ ਚੈਂਪੀਅਨਸ਼ਿਪ ਜਿੱਤੀ ਸੀ, ਜਦਕਿ ਖੁਸ਼ਨੂਰ ਨੇ ਦੋਵਾਂ ਮੌਕਿਆਂ 'ਤੇ ਚਾਂਦੀ ਦਾ ਤਗਮਾ ਜਿੱਤਿਆ ਸੀ।
ਉਨ੍ਹਾਂ ਨੇ ਪਿਛਲੇ ਸਾਲ ਦਸੰਬਰ ਵਿੱਚ ਐਡੀਲੇਡ ਵਿੱਚ ਆਯੋਜਿਤ 2022 ਆਸਟ੍ਰੇਲੀਅਨ ਆਲ ਸਕੂਲ ਟ੍ਰੈਕ ਅਤੇ ਫੀਲਡ ਚੈਂਪੀਅਨਸ਼ਿਪ ਵਿੱਚ ਵੀ ਕ੍ਰਮਵਾਰ ਸੋਨੇ ਅਤੇ ਚਾਂਦੀ ਦੇ ਤਗਮੇ ਜਿੱਤੇ ਸਨ।
ਐਸਬੀਐਸ ਪੰਜਾਬੀ ਨਾਲ ਆਪਣੀਆਂ ਪ੍ਰਾਪਤੀਆਂ ਬਾਰੇ ਗੱਲ ਕਰਦੇ ਹੋਏ ਇਹਨਾਂ ਭੈਣਾਂ ਨੇ ਦੱਸਿਆ ਕਿ ਉਹ ਵਿਸ਼ਵ ਪੱਧਰ 'ਤੇ ਨਾਮਣਾ ਖੱਟਣ ਲਈ ਨਿਰੰਤਰ ਮੇਹਨਤ ਕਰ ਰਹੀਆਂ ਹਨ।
ਸੁਖਨੂਰ ਨੇ ਦੱਸਿਆ ਕਿ ਫਿੱਟ ਰਹਿਣ ਤੇ ਤਾਕਤ ਵਧਾਉਣ ਲਈ ਉਨ੍ਹਾਂ ਲਈ ਜਿਮ ਅਤੇ ਕਸਰਤ ਸੈਸ਼ਨ ਕਾਫੀ ਜ਼ਰੂਰੀ ਹੁੰਦੇ ਹਨ।
"ਯੋਗ ਸਿਖਲਾਈ, ਖਾਣ-ਪੀਣ ਦੀਆਂ ਆਦਤਾਂ ਅਤੇ ਪ੍ਰੋਟੀਨ-ਭਰਪੂਰ ਭੋਜਨ ਦਾ ਵੀ ਇਸ ਵਿੱਚ ਆਪਣਾ ਰੋਲ ਹੁੰਦਾ ਹੈ," ਉਨ੍ਹਾਂ ਕਿਹਾ।
ਉਨ੍ਹਾਂ ਆਪਣੀਆਂ ਪ੍ਰਾਪਤੀਆਂ ਦਾ ਸਿਹਰਾ ਮੇਹਨਤ, ਮਾਪਿਆਂ ਤੇ ਆਪਣੇ ਕੋਚਜ਼ ਨੂੰ ਦਿੱਤਾ ਹੈ।
ਉਨ੍ਹਾਂ ਦੇ ਮਾਪਿਆਂ, ਨਵਦੀਪ ਸਿੰਘ ਰੰਗੀ ਅਤੇ ਮਨਪ੍ਰੀਤ ਕੌਰ ਰੰਗੀ ਨੂੰ ਉਨ੍ਹਾਂ ਦੀਆਂ ਪ੍ਰਾਪਤੀਆਂ ਉੱਤੇ ਮਾਣ ਹੈ।
"ਇੱਕ ਪ੍ਰਵਾਸੀ ਹੋਣ ਦੇ ਨਾਤੇ, ਤੁਸੀਂ ਨਿਰੰਤਰ ਸੰਘਰਸ਼ ਕਰਦੇ ਹੋ। ਆਪਣੇ ਪਰਿਵਾਰ ਨੂੰ ਸਥਾਪਿਤ ਕਰਨ ਅਤੇ ਬੱਚਿਆਂ ਦੇ ਸੁਨਹਿਰੀ ਭਵਿੱਖ ਨੂੰ ਨਿਸ਼ਚਿਤ ਕਰਨ ਲਈ ਬਹੁਤ ਕੁਰਬਾਨੀਆਂ ਵੀ ਕਰਨੀਆਂ ਪੈਂਦੀਆਂ ਹਨ।
“ਪਰ ਜਦੋਂ ਇਹੋ ਜਿਹੀਆਂ ਪ੍ਰਾਪਤੀਆਂ ਤੇ ਰਿਜ਼ਲਟ ਆਓਂਦੇ ਹਨ ਤਾਂ ਔਖੇ ਵੇਲ਼ੇ ਭੁੱਲ ਜਾਂਦੇ ਹਨ। ਸਾਨੂੰ ਆਪਣੀਆਂ ਕੁੜੀਆਂ 'ਤੇ ਮਾਣ ਹੈ ਅਤੇ ਅਸੀਂ ਉਨ੍ਹਾਂ ਦੀ ਬੇਹਤਰ ਭਵਿੱਖ ਦੀ ਕਾਮਨਾ ਕਰਦੇ ਹਾਂ,” ਉਨ੍ਹਾਂ ਮਾਣ ਨਾਲ਼ ਕਿਹਾ।
ਲੁਧਿਆਣੇ ਜਿਲੇ ਦੇ ਡੇਹਲੋਂ ਲਾਗਲੇ ਪਿੰਡ ਰੰਗੀਆਂ ਨਾਲ਼ ਸਬੰਧ ਰੱਖਣ ਵਾਲੇ ਨਵਦੀਪ ਰੰਗੀ 1997 ਵਿੱਚ ਆਸਟ੍ਰੇਲੀਆ ਆਏ ਸਨ ਅਤੇ ਉਹ ਵਾਲੀਵਾਲ ਦੀ ਖੇਡ ਨਾਲ਼ ਲੰਬੇ ਸਮੇ ਤੱਕ ਜੁੜੇ ਰਹੇ ਹਨ।
ਰੰਗੀ ਭੈਣਾਂ ਦੀਆਂ ਨਜ਼ਰਾਂ ਹੁਣ 43ਵੀਆਂ ਸਲਾਨਾ ਸਿਮਪਲੌਟ ਖੇਡਾਂ, ਜੋ ਉੱਤਰੀ ਅਮਰੀਕਾ ਵਿੱਚ ਆਈਡਾਹੋ ਸਟੇਟ ਯੂਨੀਵਰਸਿਟੀ ਵਿੱਚ ਹੋ ਰਹੀ ਇੱਕ ਪ੍ਰਮੁੱਖ ਇਨਡੋਰ ਹਾਈ ਸਕੂਲ ਟਰੈਕ ਅਤੇ ਫੀਲਡ ਈਵੈਂਟ ਹੈ, ਵਿੱਚ ਮੈਡਲ ਜਿੱਤਣ ਉੱਤੇ ਹੋਣਗੀਆਂ।
ਰੰਗੀ ਪਰਿਵਾਰ ਨਾਲ ਪੰਜਾਬੀ ਵਿਚ ਇੰਟਰਵਿਊ ਸੁਣਨ ਲਈ ਆਡੀਓ ਆਈਕਨ 'ਤੇ ਕਲਿੱਕ ਕਰੋ:
